مادەنيەت جانە سپورت ءمينيسترى داۋرەن اباەۆ مادەنيەت سالاسىنا زور ۇلەس قوسقان قايراتكەرلەرگە مەملەكەتتىك ستيپەنديالاردى تاپسىردى, دەپ حابارلايدى Egemen.kz مينيسترلىكتىڭ ءباسپاسوز قىزمەتىنە سىلتەمە جاساپ.
اتالعان ستيپەنديالار جىل سايىن مەملەكەت باسشىسىنىڭ جارلىعىمەن ەلدىڭ مادەني سالاسىن ساقتاۋعا جانە دامىتۋعا ۇلەس قوسقان شىعارماشىل قىزمەتكەرلەردى قولداۋ ماقساتىندا بەرىلەدى.
بيىل مەملەكەتتىك ستيپەنديا ادەبيەت پەن ونەردىڭ 74 قايراتكەرىنە تاعايىندالدى. ستيپەندياعا يە بولعاندار قاتارىندا
ولجاس سۇلەيمەنوۆ, دۋلات يسابەكوۆ, سوفى سماتاەۆ, ءاسانالى ءاشىموۆ, اقۇشتاپ باقتىگەرەەۆا, مىرزاتاي جولداسبەكوۆ, ءسابيت دوسانوۆ, بيبىگۇل تولەگەنوۆا, يۋري پومەرانتسەۆ, دوسحان جولجاكسىنوۆ جانە ت.ب. مايتالماندار بار. سونىمەن قاتار, رۋحيا بايدۇكەنوۆا, بەيبىت سارىباي, سايدا قالىقوۆا, ەرجان ماكسيم, ناۋرىز ەرنات, تەمىرلان ولجاباي سەكىلدى جاس دارىندارعا مەملەكەتتىك قولداۋ كورسەتىلدى.
مينيستر سالتاناتتى ءراسىمدى اشا وتىرىپ, ماراپات يەلەرىن شىن جۇرەكتەن قۇتتىقتاپ, مەملەكەتتىك ستيپەنديالاردى تاپسىرۋ - ولاردىڭ وتاندىق مادەنيەتتى دامىتۋعا قوسقان ەلەۋلى ۇلەسىن مويىنداۋ ەكەنىن اتاپ ءوتتى.
سونداي-اق, مينيستر بيىل ەلىمىز احمەت بايتۇرسىن ۇلىنىڭ 150 جىلدىعىن, مۇحتار اۋەزوۆتىڭ 125 جىلدىعىن, ءازىلحان نۇرشايىقوۆ پەن روزا باعلانوۆانىڭ 100 جىلدىق مەرەيتويلارىن اتاپ وتەتىندىگىن ەسكە سالدى.
كەزدەسۋ سوڭىندا داۋرەن اباەۆ راسىمگە قاتىسۋشىلارعا شىعارماشىلىق تابىس جانە وتباسىلىق باقىت تىلەدى.