كوروناۆيرۋس ينفەكتسياسىن جۇقتىرعاننان كەيىن وقشاۋلانعان تۇركيا پرەزيدەنتى رەجەپ تايىپ ەردوعاننىڭ COVID-19-عا تاپسىرعان سىناماسى تەرىس ناتيجە كورسەتتى, دەپ حابارلايدى Egemen.kz Reuters اگەنتتىگىنە سىلتەمە جاساپ.
بۇل تۋرالى تۇركيا كوشباسشىسىنىڭ ەمدەۋشى دارىگەرى, پروفەسسور سەركان توپالوعلى مالىمدەدى.
«سوڭعى ەكى كۇندە تاپسىرعان پتر-سىناما تەرىس ناتيجە بەردى», دەدى ول.
دارىگەردىڭ ايتۋىنشا, مەملەكەت باسشىسى ەرتەڭ جۇمىسقا ورالۋى مۇمكىن.
«مەنىڭ ويىمشا, جاقىن ارادا, ءتىپتى ەرتەڭ پرەزيدەنت ادەتتەگى جۇمىس ۋاقىتىنا ورالادى», دەلىنگەن حابارلامادا.
ەردوعانعا كوروناۆيرۋس دياگنوزى قويىلعانى 5 اقپاندا بەلگىلى بولدى. ول اۋرۋدىڭ جەڭىل بەلگىلەرى باستالعاننان كەيىن جۇبايىمەن COVID-19-عا سىناما تاپسىرىپ, تەست وڭ ناتيجە بەرگەنىن ايتتى.