قوستانايداعى ءى.وماروۆ اتىنداعى قازاق تەاترىندا الاشتىڭ اقيىق اقىنى مۇقاعالي ماقاتاەۆتىڭ شىعارماشىلىعىنا ارنالعان ادەبي كەش ءوتتى. شاراعا جەرگىلىكتى زيالى قاۋىم وكىلدەرى, وبلىسقا تانىمال جاس اقىندار مەن تەاتر ونەرپازدارى قاتىستى.
ەركىن اڭگىمە تۇرىندە وربىگەن باسقوسۋدا جازۋشىلار وداعى جەرگىلىكتى فيليالىنىڭ توراعاسى جانۇزاق ايازبەكوۆ مۇقاعالي مۇراسىنىڭ بۇگىندە ءبۇتىن ۇلتقا ورتاق رۋحاني قازىناعا اينالعانىن تارقاتا اڭگىمەلەي كەلىپ, اقىن شىعارماشىلىعىنىڭ تاقىرىپتىق اۋقىمى مەن ومىرشەڭدىگىنىڭ سىرىن ساراپتاپ تالداپ ءوتتى.
ساليقالى اڭگىمەدەن كەيىن تەاتر ارتىستەرى بىرىنەن كەيىن ءبىرى ءىلىپ اكەتىپ جاتقا وقىعان ويلى ولەڭ-جىر كەرۋەنى مەن اقىن سوزىنە جازىلعان سىرلى اندەرگە كەزەك بەرىلدى. كەش بارىسىندا ابىلاي ماۋدانوۆ, جاندوس جۇسىپبەك, داۋلەت جادىراسىن سىندى دارىندار دا ءسوز الىپ, ءوز ولەڭدەرىن وقىدى.
شارانى ۇيىمداستىرۋشىلاردىڭ ايتۋىنشا, مۇنداي ادەبي باسقوسۋلار الداعى ۋاقىتتا دا جالعاسىن تابادى.
– مۇزبالاق اقىن مۇقاعالي ماقاتاەۆتىڭ تۋعان كۇنىنە وراي ءوتىپ جاتقان بۇگىنگى رۋحاني كەشتىڭ ماڭىزى ەرەكشە. نەگىزگى ماقسات – قالاداعى ادەبيەتكە بەيىمى بار جاستاردىڭ باسىن قوسىپ, رۋحاني ورتا قالىپتاستىرۋ. بۇل قاتىپ قالعان رەسمي تۇردە ەمەس, وسى ورتانى ىزدەپ كەلەتىن جاستاردىڭ ەركىن شىعارماشىلىق ورتاسى بولادى دەگەن ويدامىز. مىسالى, بۇگىن كەلۋ كەرەك, وسى ورتادان تابىلۋ كەرەك كىسىلەردىڭ ءبارى بولدى, كوڭىلدەن شىقتى. ەندى مۇنداي ادەبي كەشتەردى اي سايىن وتكىزەمىز دەپ جوسپارلاپ وتىرمىز. ماسەلەن, كەلەسى كەشتى سەيىت كەنجەاحمەت اعامىزعا ارناساق, تەاتردىڭ كەز كەلگەن جەرىنەن ورىن تابىلادى. ەڭ باستىسى, جاستار جانىمەن تىلەپ, ىزدەپ كەلىپ وتىراتىن, كەلەلى وي, سۇبەلى ءسوز ايتىلاتىن ورتاعا اينالسا دەپ ويلايمىز, – دەدى تەاتر باسشىسى ءالىمحان مىرزاحان.
قوستاناي وبلىسى