«كوكجايلاۋ» شاتقالى ىلە-الاتاۋى ۇلتتىق پاركىنە قايتارىلدى

«قر ۇكىمەتىنىڭ قاۋلىسىمەن الماتى قالاسى مەدەۋ اۋدانىنداعى 1002,0 گەكتار اۋماقتى قۇرايتىن كوكجايلاۋ شاتقالى ىلە-الاتاۋى مەملەكەتتىك ۇلتتىق تابيعي پاركىنىڭ قۇرامىنا قايتارىلدى. كوكجايلاۋ – بىرەگەي تابيعيتىمەن قۇندى. وندا قىلقان جاپىراقتى شىرشالى ورمان بار. اسىرەسە قۇمبەل جوتاسىنىڭ باۋرايىنداعى تومەنگى بولىگىندەگى ەستەتيكالىق لاندشافتىڭ قۇندىلىعى زور. مۇندا قازاقستان رەسپۋبليكاسىنىڭ قىزىل كىتابىنا ەنگەن وسىمدىكتەر وسەدى: شرەنك شىرشاسى, سيۆەرس الما اعاشى, كادىمگى ورىك, قىزعالداق جانە تاعى باسقالارى», دەپ حابارلادى قر ەكولوگيا, گەولوگيا جانە تابيعي رەسۋرستار مينيسترلىگىنiڭ ورمان شارۋاشىلىعى جانە جانۋارلار دۇنيەسى كوميتەتىنەن.

ەسكە سالا كەتەيىك, 2014 جىلى ۇكىمەتتىڭ قاۋلىسىمەن جالپى اۋماعى 1002 گەكتار ىلە-الاتاۋى مەملەكەتتىك ۇلتتىق تابيعي پاركىنىڭ جەرى ايرىقشا قورعالاتىن تابيعي اۋماق ساناتىنان الماتى قالاسىنىڭ مەدەۋ اۋدانىنىڭ قورى ساناتىنا «كوكجايلاۋ» تاۋ شاڭعىسى كۋرورتىنىڭ قۇرىلىسى مەن جۇمىس ىستەۋى ءۇشىن بەرىلگەن بولاتىن.

2019 جىلعى قازاندا قازاقستان رەسپۋبليكاسىنىڭ پرەزيدەنتى قاسىم-جومارت توقاەۆ جۇرتشىلىقتىڭ پىكىرىن ەسكەرە كەلىپ, «كوكجايلاۋ» شاتقالىندا تاۋ شاڭعىسى كۋرورتىن سالۋ جوباسىنا تىيىم سالعان ەدى. 2021 جىلدىڭ قازان ايىندا كوكجايلاۋ شاتقالىندا ورنالاسقان 1002,0 گەكتار جەر ۋچاسكەسىن, ىلە-الاتاۋى مەملەكەتتىك ۇلتتىق پاركىنە قايتارۋ ماسەلەسىن قاراستىرۋ جونىندەگى كوميسسيا قۇرىلدى.

«كوميسسيا مەملەكەتتىك ەكولوگيالىق ساراپتامانىڭ وڭ قورىتىندىسى بولعان جاعدايدا كوكجايلاۋ شاتقالىن ىلە-الاتاۋى ۇلتتىق پاركىنە بەرۋ تۋرالى شەشىمدى زاڭدى دەپ تانىدى», دەپ قوستى ۆەدومستۆادان.