ۇلتتىق بانك توراعاسى عالىمجان ءپىرماتوۆ تولەم كارتالارىنىڭ بانكارالىق جانە جەدەل تولەم جۇيەسى ىسكە قوسىلعانىن مالىمدەدى, دەپ حابارلايدى Egemen.kz.
مەملەكەت باسشىسىنىڭ تاپسىرماسىن ورىنداۋ اياسىندا 2021 جىلعى قاراشادا ۇلتتىق بانك ۇلتتىق تولەم جۇيەسىنىڭ قۇرامداس بولىكتەرى - كارتالىق وپەراتسيالاردى وڭدەۋگە ارنالعان بانكارالىق تولەم كارتالارى جۇيەسىن جانە ءموبيلدى ونلاين تولەمدەرگە قىزمەت كورسەتۋگە ارنالعان جەدەل تولەم جۇيەسىن پيلوتتىق رەجيمدە ىسكە قوستى.
«ۇلتتىق تولەم جۇيەسى جۇمىس ىستەۋى ءۇشىن قاجەتتى نورماتيۆتىك-قۇقىقتىق بازا ازىرلەندى, ول 1 شىلدەگە دەيىن تولىق ىسكە قوسىلادى دەپ كۇتىلەدى», دەدى ءپىرماتوۆ پرەزيدەنت قاسىم-جومارت توقاەۆتىڭ قاتىسۋىمەن وتكەن ۇكىمەتتىڭ كەڭەيتىلگەن وتىرىسىندا.
ونىڭ ايتۋىنشا, 2021 جىلى ۇلتتىق بانك «تسيفرلىق تەڭگەنى» ەنگىزۋ بويىنشا پيلوتتىق جوبانى قولعا العان.
«قازىرگى ۋاقىتتا پلاتفورمانىڭ ءپروتوتيپىن ازىرلەۋ اياقتالدى, 2021 جىلدىڭ جەلتوقسانىندا پيلوتتىق جوبانىڭ ناتيجەلەرى تۋرالى قورىتىندى ەسەپ جاريالاندى. بيىل پايدا مەن شىعىنداردى باعالاي وتىرىپ, تسيفرلىق تەڭگەنى ەنگىزۋ مودەلى بويىنشا تۇپكىلىكتى شەشىم قابىلدانادى», دەپ قوستى ول.