كەشە قاسىم-جومارت توقاەۆتىڭ توراعالىق ەتۋىمەن پارلامەنت سەناتى بيۋروسىنىڭ وتىرىسى بولدى, دەپ حابارلادى وسى پالاتانىڭ ءباسپاسوز قىزمەتى.
پالاتا توراعاسى ق.توقاەۆ بىرقاتار سەناتورلارعا تمد پارلامەنتارالىق اسسامبلەياسىنىڭ ناگرادالارىن تابىس ەتتى. اتاپ ايتقاندا, تمد پاا كەڭەسىنىڭ شەشىمىمەن ەلەۋسىن ساعىندىقوۆ «دوستاستىق» وردەنىمەن, حۋساين ۆاليەۆ پەن ورىنباي راحمانبەرديەۆ «پارلامەنتتىك ىنتىماقتاستىقتى نىعايتقانى ءۇشىن» مەدالىمەن ماراپاتتالدى.
بيۋرو مۇشەلەرى پالاتانىڭ 27 ناۋرىزدا بولاتىن وتىرىسىنىڭ كۇن ءتارتىبىن قارادى. وتىرىستا 2011 جىلعى 18 قازانداعى ەركىن ساۋدا ايماعى تۋرالى شارتتى ونىڭ تاراپتارى مەن وزبەكستان رەسپۋبليكاسى اراسىندا قولدانۋ تۋرالى حاتتامانى راتيفيكاتسيالاۋ تۋرالى, زاڭناماعا الەۋمەتتىك قامسىزداندىرۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى ء(بىرىنشى وقىلىم), «قازاقستان رەسپۋبليكاسىنىڭ ۇلتتىق قورىنان 2014-2016 جىلدارعا ارنالعان كەپىلدەندىرىلگەن ترانسفەرت تۋرالى» زاڭعا وزگەرىس ەنگىزۋ تۋرالى, «2014-2016 جىلدارعا ارنالعان رەسپۋبليكالىق بيۋدجەت تۋرالى» زاڭعا وزگەرىستەر مەن تولىقتىرۋلار ەنگىزۋ تۋرالى زاڭ جوبالارىن قاراۋ جوسپارلاندى.
بيۋرودا ماجىلىستە ماقۇلدانعان زاڭ جوبالارىنا سەناتتىڭ باس كوميتەتتەرى بەلگىلەندى.