ەلىمىزدە العاش رەت عىلىم سالاسىنىڭ ساقالارى سارالاندى. بىلتىردان باستاپ قولعا الىنعان رەسپۋبليكالىق «ۇزدىك عىلىمي قىزمەتكەر-2021» بايقاۋى ەندى جىل سايىن زەرتتەۋشىلەردى ىنتالاندىرۋ, ولاردىڭ ەڭبەگىن باعالاۋ ماقساتىندا وتكىزىلمەك. اتالعان عىلىم بايگەسىنىڭ جاقىندا شىققان قورىتىندىسى بويىنشا 50 عالىم 6 ملن تەڭگە كولەمىندە سىياقى الدى.
«ۇزدىك عىلىمي قىزمەتكەر-2021» بايقاۋىندا ەلىمىزدىڭ 6 عىلىمي-زەرتتەۋ ينستيتۋتى مەن جوعارى وقۋ ورىندارىنىڭ 50 عالىمى جەڭىمپاز اتاندى. ۇزدىكتەر قارجىلاي سىياقىعا قوسا كەۋدەگە توسبەلگىلەر تاعىنىپ, سەرتيفيكاتتاردى يەلەندى. جەڭىمپازداردى ماراپاتتاۋ سالتاناتىندا ءسوز العان ءبىلىم جانە عىلىم ءمينيسترى اسحات ايماعامبەتوۆ: «بيىلدان باستاپ وتاندىق عىلىم سالاسى دامۋىنىڭ جاڭا كەزەڭى باستالدى. 3 مىڭعا جۋىق عالىم جوباسىنا گرانت ۇتقان-ۇتپاعانىنا قاراماستان تۇراقتى تۇردە جالاقى الادى. تۇراقتى قارجىلاندىرۋ زەرتتەۋلەردى كەدەرگىسىز جۇرگىزۋگە مۇمكىندىك بەرەدى. سونداي-اق گرانتتىق جانە ماقساتتى قارجىلاندىرۋ مەحانيزمىن وزگەرتتىك. سوڭعى جىلدارى عىلىم سالاسىن قارجىلاندىرۋ ەكى ەسە ءوستى. پرەزيدەنتتىڭ تاپسىرماسى اياسىندا وسى جاڭاشىلدىقتاردى بەكىتكەن زاڭ قابىلداندى. ءبىز ءۇشىن بارلىق پروتسەدۋرانىڭ اشىقتىعىن قامتاماسىز ەتۋ ماڭىزدى», دەدى.
مينيستر ءوز سوزىندە عىلىمي قاۋىمداستىققا عىلىمنىڭ دامۋىنا قوسقان ۇلەسى ءۇشىن العىس ءبىلدىردى جانە مەملەكەت باسشىسىنىڭ قولداۋىمەن عىلىم سالاسىندا زاڭنامالار جەتىلدىرىلىپ, قارجىلاندىرۋ ەكى ەسە وسكەنىن ايتتى.
«جاس عالىمدارعا جان-جاقتى قولداۋ كورسەتىلىپ, ۇلتتىق عىلىمي-زەرتتەۋ ينستيتۋتتارىنىڭ ماتەريالدى-تەحنيكالىق بازاسى جاڭارتىلىپ كەلەدى. سونداي-اق عالىمدار جەتەكشى عىلىمي ورتالىقتاردا تاجىريبەدەن وتۋگە جىبەرىلەدى, عىلىم سالاسىنداعى بيۋروكراتيانى توقتاتۋ بويىنشا جۇمىس جۇرگىزىلىپ جاتىر», دەدى ا.ايماعامبەتوۆ.
مينيسترلىكتىڭ مالىمدەۋىنشە, بايقاۋعا تاپسىرىلعان وتىنىمدەر ارنايى قۇرىلعان اقپاراتتىق پلاتفورمادا قابىلدانعان. قۇجاتتاردى تەكسەرۋ كوميسسياسىنىڭ قۇرامىنا ساراپشىلار, عالىمدار, عىلىم اكادەمياسىنىڭ وكىلدەرى, جاس عالىمدار كەڭەسى جانە جاس عالىمدار اليانسىنىڭ, سونداي-اق عىلىمي ۇيىمداردىڭ مۇشەلەرى ەندى.