تۇركىستان وبلىسىندا جولدا قالعان 23 جولاۋشى جىلىتۋ بەكەتتەرىنە جەتكىزىلدى, دەپ حابارلايدى Egemen.kz.
توتەنشە جاعدايلار دەپارتامەنتىنە «سوزاق - ەكپىندى – ۇلانبەك» باعىتىنداعى وبلىستىق ماڭىزى بار جولداردا جولاۋشىلار مەن تەحنيكالاردىڭ قالىپ قويعاندىعى تۋرالى اقپارات تۇسكەن.
وقيعا ورنىنا جەتكەن تۇركىستان وبلىسى تجد-ءنىڭ 2 تەحنيكاسى مەن 10 قىزمەتكەرى جولدا قالىپ قويعان 53 تەحنيكانى قار قۇرساۋىنان شىعارىپ, 23 ادامدى جىلىتۋ بەكەتتەرىنە جەتكىزدى.
«قازىرگى تاڭدا اششىساي - كەنتاۋ, سوزاق – ۇلانبەك جولدارى مەن مۇزدىبەل اسۋى ۋاقىتشا جابىق. بارلىق كولىكتەردىڭ جۇرۋىنە شەكتەۋ قويىلىپ وتىر. «وڭتۇستىك جولدار» مەكەمەسىنىڭ 10 تەحنيكاسى مەن 22 قىزمەتكەرى جولداردى اشۋ جۇمىستارىن جۇرگىزىپ جاتىر», دەدى وبلىستىق تجد توتەنشە جاعدايلاردى جويۋ باسقارماسىنىڭ باس مامانى ي.ەلەۋسيزوۆ.
سونداي-اق, ماماندار بوراندى كۇنى الىس جولعا شىقپاۋ كەرەكتىگىن ەسكەرتەدى.