سوت شەشىمىن كۇشىندە قالدىردى

شاراينا

يتاليانىڭ كاسساتسيالىق سوتى ەلدىڭ بۇرىنعى پرەمەر-ءمينيسترى سيلۆيو بەرلۋسكونيدى ەكى جىل بويى مەملەكەتتىك قىزمەتپەن اينالىسۋعا تىيىم سالۋ جونىندەگى تومەنگى سوتتىڭ شەشىمىن كۇشىندە قالدىردى. وتكەن جىلدىڭ كۇزىندە بەرلۋسكونيگە ونىڭ ءوزى باقىلاۋ جاسايتىن «مەدياسەت» حولدينگىندەگى سالىق الاياقتىعىنا بايلانىس­تى سوت وسىنداي شەشىم شىعارعان بولاتىن. سونداي-اق, ول وسى ىسكە قاتىستى سەناتورلىق مانداتتان دا ايىرىلعان ەدى. العاشقى سوتتا 77 جاستان اسقان ونى بەس جىل بويى مەملەكەتتىك قىزمەتپەن اينالىسۋعا تىيىم سالۋ جونىندە ماسەلە كوتەرىلگەنى بار. بىراق, ەكس-پرەمەردىڭ قورعاۋشىلارى وعان جول بەرمەدى. ناتيجەسىندە ونىڭ مەملەكەتتىك قىزمەتپەن اينالىسپاۋ مەرزىمى ەكى جىلعا دەيىن تومەندەتىلدى. ەرەۋىل سوڭى تارتىپسىزدىككە ۇلاستى نەپال استاناسى – كاتماندۋدە جانار-جاعارماي باعاسىنىڭ وسۋىنە قارسى ەرەۋىل سوڭى جاپپاي تارتىپسىزدىككە ۇلاستى. بۇل جونىندە «اسسوشەيتەد پرەسس» اگەنتتىگى حابارلادى. ەرەۋىل ەل ۇكىمەتى بەنزين, كەروسين جانە ديزەل وتىنى تاريفتەرىنىڭ كوتەرىلگەندىگى تۋرالى جاريا ەتكەننەن كەيىن باستالعان. مۇنداي شەشىمنىڭ قابىلدانۋىنا مەملەكەت قاراماعىنداعى «Nepal Oil» كومپانياسىنىڭ قارجىلىق قيىن جاعدايى سەبەپ بولسا كەرەك. ونىڭ ۇستىنە بۇل كومپانيا ەلدىڭ وتىن-ەنەرگەتيكاسى سالاسىندا مونوپوليست بولىپ تابىلادى. باعانىڭ قىمباتتاۋىنا العاشقى بولىپ قارسى شىققاندار ستۋدەنتتەردىڭ كاسىپوداقتارى ەكەن. ال كەشە ەرەۋىلگە قاتىسۋشىلار كاتماندۋ كوشەلەرىندە قالاداعى دۇكەندەردىڭ جۇمىس ىستەۋىن توقتاتۋدى تالاپ ەتكەن. سونداي-اق, اۆتوكولىكتەردى اۋدارعان جانە ورتەگەن. وسىعان بايلانىستى پوليتسيا 80-گە جۋىق ادامدى ۇستاپتى. جۇمىسىن توقتاتۋدى تالاپ ەتتى اقش بيلىگى سيريانىڭ ۆاشينگتونداعى ەلشى­­لىگىنىڭ, سونداي-اق ميچيگان مەن تەحاستاعى كون­سۋلدىقتارىنىڭ جۇمىسىن توقتاتۋدى تالاپ ەتتى. اقپارات اگەنتتىكتەرىنىڭ حابارلاۋىنشا, سيريانىڭ ديپلو­ماتيالىق وكىلدىكتەرىندە جۇمىس ىستەيتىن سيريالىق ازاماتتاردىڭ بارلىعى اقش اۋماعىن تاستاپ شىعۋلارى ءتيىس. اقش-تىڭ سيريا بويىنشا ارنايى وكىلى دانيەل رۋبينشتەيننىڭ حاباردار ەتۋىنشە, سيريا باسشىسى باشار اساد تاعايىنداعان ديپلوماتتاردىڭ ەل اۋماعىندا قىزمەت ەتۋى «قولايسىز» اسەر قالدىرادى.

قىسقا قايىرىپ ايتقاندا:

*رەسەيدىڭ ۇلتتىق انتيتەررورلىق كوميتەتى «يمارات كاۆكاز» ۇيىمىنىڭ جەتەكشىسى دوكۋ ۋماروۆتىڭ ءولىمى تۋرالى اقپاراتتىڭ جوق ەكەندىگىن مالىمدەدى. ء*يزرايلدىڭ اسكەري-اۋە كۇشتەرى سەيسەنبىدەن سارسەنبىگە قاراعان ءتۇنى گولان جوتاسىنا ورنالاسقان سيريانىڭ اسكەري نىساندارىن زىمىرانمەن اتقىلادى. ولار مۇنى وسىدان بىرەر كۇن بۇرىن سيريالىقتاردىڭ ارەكەتىنە جاۋاپ رەتىندە جاساپ وتىر. *تۇركيا ستاتيستيكا ينستيتۋتىنىڭ كارس قالاسىنداعى وفيسىندە بولعان اتىس كەزىندە جەتى ادام وققا ۇشتى. جۇمىستان بوساتىلعان ءبىر قىزمەتكەر وفيسكە كەلىپ, ءوزىنىڭ بۇرىنعى ارىپتەسىن كەپىلگە العان. الدىمەن ول التى ادامدى اتىپ ولتىرگەن. ارتىنان وزىنە وق جۇمساعان. *گرەكيانىڭ اسكەري-تەڭىز كۇشتەرى  «تۋرە-214» جوباسى بويىنشا 2015 جىلعا قاراي ءۇش سۇڭگۋىر قايىعىمەن تولىعادى. بۇل جونىندە ەلدىڭ قورعانىس ءمينيسترى د.اۆراموپۋلوس مالىمدەدى. ەسكى مونەتا جاڭاسىمەن اۋىستىرىلادى ۇلىبريتانيا 2017 جىلى جاساندى اقشا جاساۋعا قارسى كۇرەسۋ ماقساتىندا ءبىر فۋنت ستەرلينگ مونەتاسىن جاڭاسىمەن اۋىستىرۋدى جوسپارلاپ وتىر. بۇل جاڭا مونەتا الەمدەگى ەڭ جاقسى قورعالعان اقشا بولىپ تابىلادى. كورولدىك مونەتا سارايىنىڭ باعالاۋى بويىنشا, قازىرگى كەزدە اينالىمدا جۇرگەن ءبىر فۋنتتىق مونەتالاردىڭ ءۇش پايىزعا جۋىعى قولدان جاسالعان. ۇلىبريتانيانىڭ كەيبىر ايماقتارىندا ونىڭ ۇلەسى التى پايىزعا جەتەدى. قولدان جاسالعان مونەتالاردىڭ جالپى سانى 45 ميلليون دانانى قۇرايدى ەكەن. ەكى ءتۇستى جاڭا مونەتا ءۇش دەڭگەيلى قاۋىپسىزدىك بەلگىسىنە يە. ال ەلدە ءبىر فۋنتتى جاساندى مونەتالار, اسىرەسە, وتكەن ونجىلدىقتىڭ سوڭىندا ءجيى كورىنىس بەرە باستاپتى. ەكى جۇك كەمەسى سوقتىعىستى توكيو شىعاناعىندا ەكى جۇك كەمەسىنىڭ سوقتىعىسۋى سالدارىنان قىتايدىڭ توعىز ازاماتى ءىز-ءتۇزسىز جوعالىپ كەتتى. بۇل جونىندە جاپونيا جاعالاۋ كۇزەتىنىڭ وكىلى حابارلادى. دەرەك كوزدەرىنە قاراعاندا, اپات جەرگىلىكتى ۋاقىت بويىنشا تۇنگى ساعات ۇشتەر شاماسىندا بولعان. پانامانىڭ جۇك كەمەسى وڭتۇستىك كورەيانىڭ كەمەسىمەن سوقتىعىسقاننان كەيىن سۋعا باتىپ كەتكەن. وقيعانىڭ نە سەبەپتەن بولعانى جونىندە ناقتى اقپارات جوق. سۋعا باتقان كەمە ەكيپاجىنىڭ 20 مۇشەسى قۇتقارىلعان. قىتاي قۇتقارۋشى قىزمەتى وكىلىنىڭ حابارلاۋىنشا, قىتايلىق تاراپ اپات بولعان جەرگە وزدەرىنىڭ قۇتقارۋشى كەمەسىن جىبەرمەۋ تۋرالى شەشىم قابىلداعان. سەبەبى, اپاتتى وقيعا جاپونيانىڭ اۋماعىندا ورىن العان. كۇشىك  1,9 ميلليون دوللارعا ساتىلدى قىتايدىڭ چجەتسزيان پروۆينتسياسىندا تيبەتتىك ماس­تيف تۇقىمدى كۇشىك 1,9 ميلليون دوللارعا ساتىلدى. اتالعان اقپاراتتى كەشە «فرانس-پرەسس» اگەنتتىگى جەرگىلىكتى باق-تارعا سىلتەمە جاساي وتىرىپ تاراتتى. تيبەتتىك ماستيف تۇقىمدى يت وسىرۋمەن اينالىساتىن چجەتسزيان پروۆينتسياسى تۇرعىنىنىڭ ايتۋىنشا, الەمدەگى ەڭ قىمبات تۇراتىن كۇشىكتىڭ جاڭا يەسى تسينداوداعى قۇرىلىس كومپانياسىنىڭ باسشىسى بولىپ تابىلادى. سونىمەن بىرگە, ول وسى تۇقىمداس تاعى ءبىر كۇشىكتى 1 ميلليون دوللارعا ساتقان ەكەن. كۇشىكتەر باعاسىنىڭ وسىنشالىقتى جوعارى بولۋى ءيتتىڭ بۇل تۇقىمى وتە سيرەك كەزدەسەدى جانە ول قىتايدىڭ ۇلتتىق يگىلىگى رەتىندە ەسەپتەلەدى.

ينتەرنەت ماتەريالدارى نەگىزىندە ازىرلەندى.