4 اقپاندا بەيجىڭدە XXIV قىسقى وليمپيادا ويىندارىنىڭ اشىلۋ سالتاناتى وتەدى. وليمپيادانىڭ اشىلۋ سالتاناتى «قۇستىڭ ۇياسى» ۇلتتىق ستاديونىندا وتەدى, دەپ حابارلايدى Egemen.kz.
قازاقستاندا بۇل شارانىڭ تىكەلەي ترانسلياتسياسىن ءۇش تەلەارنا – «حابار», «Qazsport» جانە «Qazaqstan» ۇيىمداستىرادى.
ول نۇر-سۇلتان ۋاقىتىمەن 17:55-تە باستالادى. قازاقستاننىڭ اشىلۋ سالتاناتىندا شورت-ترەكشى ابزال اجعاليەۆ پەن كونكيشى ەكاتەرينا ايدوۆا تۋ ۇستايدى.
بەيجىڭدەگى وليمپيادا ويىندارى 4-20 اقپان ارالىعىندا وتەدى. سپورتشىلار 109 مەدال جيىنتىعىن ساراپقا سالادى.
بۇل جارىستارعا قازاقستان قۇراماسى 34 سپورتشىمەن قاتىسۋدا. وتاندىق سپورتشىلار وليمپيادانى 3 اقپاندا باستادى. العاشقى بولىپ فريستايلشىلار شىقتى. ەرلەر مەن ايەلدەر اراسىنداعى ىرىكتەۋ قورىتىندىسى بويىنشا قازاقستاندىقتاردىڭ ەشقايسىسى ءبىرىنشى ارەكەتتە فينالعا شىعا المادى (ەكىنشى ىرىكتەۋ 5 جانە 6 اقپاندا وتەدى).