سەنات سپيكەرى ماۋلەن اشىمباەۆتىڭ توراعالىعىمەن پالاتا وتىرىسى ءوتتى. وتىرىس بارىسىندا سەناتورلار «قازاقستان رەسپۋبليكاسىنىڭ حالىقارالىق شارتتارى تۋرالى» قازاقستان رەسپۋبليكاسىنىڭ زاڭىنا وزگەرىستەر مەن تولىقتىرۋلار ەنگىزۋ تۋرالى» زاڭدى قاراپ, قابىلدادى, دەپ حابارلايدى Egemen.kz قر پارلامەنتى سەناتىنىڭ ءباسپاسوز قىزمەتىنە سىلتەمە جاساپ.
زاڭ حالىقارالىق شارتتارعا قاتىستى زاڭناماداعى ولقىلىقتار مەن نورمالاردىڭ قايشىلىعىن جويۋعا مۇمكىندىك بەرەدى. سونداي-اق وندا «دايەكتەۋ», «حالىقارالىق شارت جاساسۋ», «قول قويۋ» جانە «وكىلەتتىكتەر» ۇعىمدارى ناقتى انىقتالعان.
«قابىلدانعان زاڭ حالىقارالىق شارتتاردى جاساسۋ ءتارتىبىنىڭ جەكەلەگەن ەرەجەلەرىن ناقتىلايدى. سونداي-اق, حالىقارالىق شارتتاردى جاساسۋ اياسىندا ءتيىستى راسىمدەردى جەتىلدىرۋدى كوزدەيدى», دەگەن ماۋلەن اشىمباەۆ وسى زاڭدى ازىرلەگەن پارلامەنت دەپۋتاتتارىنا العىس ءبىلدىردى.
سونىمەن قاتار پالاتا وتىرىسىندا سەناتور بەيبىت يساباەۆ انت بەردى. ودان بولەك, بىرقاتار دەپۋتات ۇكىمەتكە ءوز ساۋالدارىن جولدادى.
اتاپ ايتقاندا, داۋرەن ادىلبەكوۆ قاراپايىم جانە تۇسىنىكتى تەتىكتەرمەن شوب-تى مەملەكەتتىك قولداۋدىڭ بىرىڭعاي ەرەجەلەرىن ازىرلەۋدى ۇسىندى. سونداي-اق كاسىپكەرلەردى مەملەكەتتىك قولداۋدىڭ بىرىڭعاي اقپاراتتىق پورتالىن قۇرۋ تۋرالى ءسوز قوزعادى.
ال, اقمارال ءالنازاروۆا ءتيىستى ءارى جۇيەلى دايىندىقسىز جانە ماسەلەنى مۇقيات زەرتتەمەي جاتىپ ايتۆ (ۆيچ) ينفەكتسياسىنىڭ دياگنوستيكاسىن باسەكەلەس ورتاعا بەرمەۋدى سۇرادى.
ءوز كەزەگىندە باۋىرجان قانيەۆ ەلىمىزدىڭ يمپورتقا تاۋەلدىلىگىن تومەندەتۋ ءۇشىن رەزەرۆتىك قورلار قۇرۋ قاجەتتىگىن ايتتى.
ءابدالى نۇراليەۆ قوسالقى جانە ۇساق شارۋا قوجالىقتارىنا مەملەكەتتىك قولداۋ كورسەتۋدى ارتتىرۋدىڭ ماڭىزدىلىعىنا نازار اۋداردى.
ءوز ساۋالىندا نۇرلان بەكنازاروۆ تۇرعىن ءۇيدى جالعا الۋ ءۇشىن وتەماقى الا الاتىن ىشكى ىستەر ورگاندارى قىزمەتكەرلەرىنىڭ تىزبەسىن كەڭەيتۋ ماسەلەسىن كوتەردى.
نۇرلان بەكەنوۆ ەلەكتر جانە جىلۋ ەنەرگياسىنىڭ تاپشىلىعىنا بايلانىستى كوكشەتاۋدا جەو قۇرىلىسىن جەدەلدەتۋگە شاقىردى.