ەكىنشى ورتا سالماق دارەجەسىندەگى الەمنىڭ ءابسوليۋتتى چەمپيونى ساۋل «كانەلو» الۆارەس قازاقستاندىق گەننادي گولوۆكينمەن ءۇشىنشى رەت شارشى الاڭدا كەزدەسۋدى جوسپارلاپ ءجۇر, دەپ حابارلايدى Egemen.kz sports.kz-كە سىلتەمە جاساپ.
Fight Hub-قا بەرگەن سۇحباتىندا ساۋل الۆارەستىڭ باپكەرى ەددي رەينوسو بۇل شايقاستىڭ ەندىگارى ورتا سالماق دارەجەسىندە وتپەيتىنىن, تەك قانا ەكىنشى ورتا سالماقتا ۇيىمداستىرىلۋى ءتيىس ەكەنىن جەتكىزدى. ول مەكسيكالىق بوكسشىنىڭ ورتا سالماققا مۇلدە ورالمايتىنىن دا تىلىنە تيەك ەتتى.
«مامىر جانە قىركۇيەك ايلارىندا قانداي جاعداي ورىن الاتىنىن ۋاقىت كورسەتەدى. ءبىر انىعى, جاقىندا گولوۆكيننىڭ ءوزى «كانەلوعا» قارسى ءۇشىنشى رەت رينگكە كوتەرىلگىسى كەلەتىنىن جەتكىزدى. سوندىقتان تريلوگيانى وتكىزۋگە ءبىز دە قارسى ەمەسپىز. الايدا شايقاس تەك ەكىنشى ورتا سالماقتا ۇيىمداستىرىلادى. ساۋل ەندى ورتا سالماققا ورالمايدى. ءبىز وزىمىزگە كەرەكتى شايقاستاردى ۇيىمداستىرا الاتىن پروموۋتەرلەرمەن عانا جۇمىس ىستەيمىز», دەيدى ول.