ناۋرىز مەرەكەسى قارساڭىندا بۇلاندى اۋدانى تۇرعىندارىنىڭ داستارقان ءمازىرى تۇرلەنە ءتۇستى. وڭىرگە تانىمال كاسىپكەر نوريك ۆاردانيان باسقاراتىن «نانار» اگروفيرما» جشس تاعامدىق جارما تسەحىن پايدالانۋعا قوستى. ون ءبىر ءتۇرلى ءونىم تۇتىنۋشىعا قولايلى قاپتامالارمەن ۇسىنىلۋدا.
اگروفيرمانىڭ جەكە قاراجاتىنا سالىنعان قايتا وڭدەۋ كاسىپورنىنىڭ تاۋلىكتىك قۋاتى 2000 توننانى قۇرايدى. ەگىستىك القابىن ءارتاراپتاندىرۋ ءناتيجەسىندە شيكىزات قورى دا مولايا ءتۇستى. كاسىپورىننىڭ 60 توننالىق سىيىمدىلىقتاعى قويماسى جارما ونىمدەرىن جىل بويى ۇزدىكسىز دايىنداۋعا مۇمكىندىك بەرەدى.
ەكى تەحنولوگيالىق جەلىمەن جۇمىس ىستەيتىن تسەحتا 10 ادام تۇراقتى جۇمىسپەن قامتىلدى. رەسەي جانە ۋكراينانىڭ وزىق جابدىقتارى ورناتىلعان كاسىپورىننىڭ ونىمدەرى بۇل كۇندەرى «ناناردىڭ» فيرمالىق دۇكەندەرىندە جوعارى سۇرانىسپەن ساتىلۋدا. سونداي-اق, كاسىپورىن باسشىسى بۇلاندىلىق ونىمگە ەلىمىزدىڭ وزگە ايماقتارىنان, ءتىپتى, الىس شەتەلدەردەن دە قىزىعۋشىلىق بارلىعىن ايتادى. ماسەلەن, جۋىردا اۋعانستاننان تاپسىرىس كەلىپ ءتۇسىپتى.
باقبەرگەن امالبەك,
«ەگەمەن قازاقستان».
اقمولا وبلىسى,
بۇلاندى اۋدانى.