سەنبىدە كانادانىڭ استاناسى وتتاۆادا مىڭداعان ادام پرەمەر-مينيستر دجاستين تريۋدونىڭ كوروناۆيرۋسقا قارسى ۆاكتسينانى مىندەتتەۋىنە قارسىلىق تانىتىپ كوشەگە شىقتى, پارلامەنت الدىندا بەيبىت نارازىلىق اكتسياسىن وتكىزدى.
شەرۋگە باستاپقىدا «بوستاندىق كولونناسى» دەپ اتالاتىن جۇك كولىكتەرىنىڭ جۇرگىزۋشىلەرى شىققان ەدى. ولار ۆاكتسينا ەگۋ تالابىنا نارازىلىق ءبىلدىردى. بىراق ميتينگتىڭ جالعاسى پاندەميا كەزىندە ۇكىمەتتىڭ شەكتەۋ شارالارىن كوبەيتۋىنە قارسىلىق رەتىندە ءوربىدى.
ميتينگ سەنبى كۇنى تاڭ اتپاي ەرتە باستالىپ, تۇسكە دەيىن جالعاستى. تۇرعىندار وتتاۆانىڭ شىعىس پەن باتىس جاعالاۋلارىن جانە ولاردىڭ اراسىنداعى جەرلەرگە كولىكتەرىن قاڭتارعان جۇرگىزۋشىلەرگە تۇسكى اس بەردى.
ميتينگ كەزىندە بەتپەردە كيگەندەر از بولدى. بىراق كوبى قالىڭ كيىندى, ويتكەنى اۋا تەمپەراتۋراسى - 21 گرادۋستى كورسەتىپ تۇرعان. جەرگىلىكتى مەديانىڭ حابارلاۋىنشا, قالا ورتالىعىنداعى ساۋدا ورىندارى شەرۋشىلەر بەتپەردە كيۋدەن باس تارتقاندىقتان ەسىكتەرىن جاۋىپ العان.
جەكە باسىنا قاۋىپ تونگەندىكتەن د.تريۋدو جانە ونىڭ وتباسى وتتاۆا قالاسىنىڭ ورتالىعىنداعى ۇيىنەن كەتكەن. ونىڭ كەڭسەسى بۇعان قاتىستى تۇسىنىكتەمە بەرمەيتىنىن ايتتى. تريۋدونىڭ الاڭداۋىنا سەبەپ بار.
وسى اپتانىڭ باسىندا ول جۇك كولىكتەرى جۇرگىزۋشىلەرىنىڭ وي-پىكىرلەرى جالپى كانادالىقتاردىڭ كوزقاراسىن بىلدىرمەيتىنىن العا تارتىپ, ولاردى ازشىلىققا تەڭەدى. كانادانىڭ ترانسشەكارالىق جۇك كولىگىن جۇرگىزەتىندەردىڭ 90 پايىزعا جۋىعى جانە حالىقتىڭ 77 پايىزى ەكى رەت كوروناۆيرۋس ۆاكتسيناسىن سالدىرعان.
تريۋدو قازان ايىنداعى سايلاۋ قارساڭىندا قىزمەتكەرلەرگە ۆاكتسينا مىندەتتەلەتىنىن جاريالادى. سودان كەيىن وتكەن ايدا كانادا مەن امەريكا قۇراما شتاتتارى ترانسشەكارالىق جۇك تاسىمالداۋشىلارعا ۆاكتسينا سالۋدى تاپسىردى.