قازاقستان رەسپۋبليكاسىنىڭ پرەزيدەنتى قاسىم-جومارت توقاەۆ ءوزىنىڭ «حابار 24» تەلەارناسىنا بەرگەن سۇحباتىندا كوپ ماسەلەنىڭ باسىن اشىپ ايتتى. سونىڭ ءبىرى ەلىمىزدەگى ءىرى كاسىپورىندارعا شەتەلدەن ماماندار تارتۋدى قىسقارتىپ, قازاقستان ازاماتتارىن جۇمىسقا الۋ تۋرالى بولدى.
ارينە, پرەزيدەنت «رەسەي ءبىلىم جۇيەسى, اسىرەسە تەحنيكالىق ءبىلىم سالاسى جاقسى» ەكەندىگىن ايتا كەلە, قازاق ەلى رەسەيدىڭ «ستراتەگيالىق سەرىكتەسى, بىزدە ءىرى بيزنەس سالاسىندا بىرلەسكەن كاسىپورىندار بار, سوندىقتان بىزگە رەسەيدە ءبىلىم العان تەحنيكالىق ماماندار قاجەت» ەكەندىگىن اتاپ ءوتتى.
بۇل پرەزيدەنتتىڭ ءوزى اتاپ كورسەتكەندەي, رەسەيدە عانا ءبىلىم الۋ قاجەت دەگەندى بىلدىرمەيدى جانە باتىس ەلدەرىندە ءبىلىم العىسى كەلگەن ادامعا ەشكىم كەدەرگى كەلتىرمەيدى.
الايدا باتىستىڭ ءبىلىم سالاسىن يدەالعا اينالدىرۋدىڭ قاجەتى جوقتىعىن مەڭزەدى. دانا حالقىمىز «جاقسىدان ۇيرەن, جاماننان جيرەن» دەگەندەي, ءبىز باتىستىڭ دا, رەسەيدىڭ دە, تاعى دا باسقا ەلدەردىڭ قاي سالادا بولسىن, جاقسى, وزىق تۇستارىن عانا ەكشەلەپ الا ءبىلۋىمىز قاجەت. سونداي-اق ونى ءوز ۇلتىمىزدىڭ ەرەكشەلىگىن ەسكەرە وتىرىپ, قولدانىسقا دۇرىس ەنگىزە بىلسەك يگى. وسى تۇستا ءبىز بولون ۇدەرىسى بويىنشا ءبىلىم سالاسىنا ەنگىزىلگەن وزگەرىستەرگە دە قايتادان تالداۋ جاساعانىمىز دۇرىس دەپ ويلايمىن. باتىس ءبىلىم جۇيەسىن ەنگىزۋدە بىزدە كەتكەن قاتەلىكتەردى تۇزەتۋ قاجەت. وسى ۋاقىتقا دەيىن جىبەرىلگەن ولقىلىقتاردى ەسكەرىپ, ءبىلىم جۇيەسىنە تۇزەتۋلەر ەنگىزەتىن ۋاقىت جەتتى دەپ ەسەپتەيمىن.
ايتقالي باقىتوۆ,
قازۇۋ پروفەسسورى