الەمنىڭ دامىعان ەلدەرىندە ادامي كاپيتالدى مەملەكەتتىڭ, قوعامنىڭ جانە ەكونوميكانىڭ نەگىزگى تۇعىرى دەپ قابىلدايدى. ال ونى دامىتۋدىڭ جەكە تۇلعانىڭ دا, جالپى حالىقتىڭ دا بىلىمىنە, دەنساۋلىعىنا, ءال-اۋقاتىنا قاتىستى ماسەلەلەردى شەشۋدەگى ماڭىزى زور.
«دامىعان ەلدەردىڭ تاجىريبەسى كورسەتىپ وتىرعانداي, ءبىلىم مەن عىلىمدى دامىتۋ, حالىقتى جۇمىسپەن قامتۋعا باعىتتالعان رەفورمالار مەن ينۆەستيتسيالاردىڭ ناتيجەسىنە قاراساق, حالىقتىڭ ءومىرىن جاقسى جاققا, ياعني ساپالى وزگەرتۋگە, ۋاقىت تالاپتارىنا ساي كەلەتىن زياتكەرلىك قوعام قۇرۋعا, تابىستى جاستاردى تاربيەلەۋگە بولادى. مەملەكەت شىن مانىندە وركەندەۋى ءۇشىن ەلىمىزدەگى ءاربىر ازاماتتىڭ ءبىلىم الۋعا دا مۇمكىندىكتەرى مولىراق بولۋى ءتيىس. ەڭ وزىق ءبىلىم بەرۋ جۇيەلەرى وقۋداعى جەتىستىكتەرىنىڭ جوعارى دەڭگەيىمەن ەرەكشەلەنەدى. ماسەلەن, فينليانديانىڭ ورتا ءبىلىم بەرۋ مەكەمەلەرىنىڭ (مەكتەپتەرىنىڭ) جەلىسى ەلدىڭ قاي اۋدانىندا ورنالاسقانىنا جانە ونىڭ اۋىلدىق نەمەسە قالالىق وڭىرگە جاتاتىندىعىنا قاراماستان ايتارلىقتاي بىرتەكتى. وڭتۇستىك كورەيادا, تايۆاندا جانە سينگاپۋردا ارتتا قالعان جانە اكادەميالىق تۇرعىدان دايىندالعان ستۋدەنتتەر اراسىنداعى ستاتيستيكالىق ايىرماشىلىق از», دەيدى «اباي اتىنداعى قازۇپۋ» كەاق باسقارما توراعاسى – رەكتور ءدارحان بىلالوۆ. وقۋ ورنى باسشىسىنىڭ ايتۋىنشا, ءبىرىنشى ورىنعا ەڭ ۇزدىك وقۋشىنى ەمەس, جەتىستىگى جوعارى وقۋشىنى تاڭداعان دۇرىس. سوندا تەك ۇلگەرىمى جاقسى ءبىلىم الۋشىنىڭ عانا ەمەس, ءاربىر ءبىلىم الۋشىنىڭ جەتىستىگىنە باسىمدىق بەرىلەتىنىن بايقايمىز. بۇل ايتىپ وتىرعان ەلدەردىڭ مىسالىنان بىزدەر, ءبىلىم الۋشىلاردىڭ باسىم كوپشىلىگىنىڭ ەسەبىنەن ۇلتتىق ءبىلىم بەرۋ جۇيەسىنىڭ جەتىستىگى ايقىن ەكەندىگىن بايقايمىز.
اۋىل مەن قالا: ءبىلىم ساپاسىن تەڭەستىرۋ تۇرعىسىنداعى پىكىرىمەن بولىسكەن رەكتور دارحان ءبىلالوۆ «قازاقستاندا اۋىل تۇرعىندارىنىڭ سانى ايتارلىقتاي جوعارى. سوندىقتان قالا مەن اۋىل مەكتەپتەرى اراسىنداعى تەڭسىزدىكتى شەشۋگە باسىمدىق بەرىلەدى جانە ناقتى قادامداردى تالاپ ەتەدى. اۋىلدىق جەردە ورتا ءبىلىم بەرۋدى زاماناۋي ۇلگىگە ساي دامىتۋ ءۇشىن الدىمەن مىناداي ناقتى قادامدار جاسالۋ كەرەك. ماسەلەن: مەكتەپتەردى (سونىڭ ىشىندە شاعىن مەكتەپتەردى) بىلىكتى پەداگوگيكالىق كادرلارمەن قامتاماسىز ەتۋ; ەڭبەكاقى جۇيەسىن وزگەرتۋ; كابينەتتى ۇزدىك وقۋ-ادىستەمەلىك ماتەريالدارمەن تولىق قامتاماسىز ەتۋ; ءبىلىم بەرۋ پروتسەسىنە اقپاراتتىق تەحنولوگيالاردى ينتەگراتسيالاۋ ارقىلى وقۋشىلاردى جاڭا تەحنولوگياعا بەيىمدەۋ; سەنىمدى ينتەرنەت-بايلانىسپەن, كومپيۋتەرلىك سىنىپتارمەن جانە جاڭا تسيفرلىق تەحنولوگيالارمەن (3D-پرينتەر, روبوتوتەحنيكا, جاساندى ينتەللەكت, تولىقتىرىلعان نۇسقاۋلىق قۇرالدارى جانە تاعى دا باسقا) تۇتاستاي جابدىقتاندىرۋ; وڭىرلىك مەكتەپتەردىڭ رەسۋرستىق ورتالىقتارىن قۇرا وتىرىپ, وقىتۋ ادىستەمەلەرىن جاڭعىرتۋ جانە ءبىلىم بەرۋدىڭ ونلاين-جۇيەلەرىن دامىتۋ. مەملەكەت تاراپىنان بۇل ءتىزىپ كورسەتىلگەن مىندەتتەر دەر كەزىندە شەشىمىن تاۋىپ جانە بۇل مىندەتتەردىڭ جۇزەگە اسۋىنا رەسپۋبليكالىق بيۋدجەتتەن ارنايى قاراجات قاراستىرىلعان. ال پەداگوگيكالىق جوعارى وقۋ ورىندارى اۋىل جانە قالا وقۋشىلارى اراسىنداعى ءبىلىم الشاقتىعىن جويۋ ۇدەرىسىنە قالاي كومەكتەسە الادى؟ وتە ورىندى ساۋال. وعان تومەندەگىشە جاۋاپ بەرىپ كورەلىك. ەڭ الدىمەن, اۋىلدىق ءوڭىر ءۇشىن مۇعالىمدەر دايارلاۋ كەرەك. ماسەلەن, اباي اتىنداعى قازۇپۋ-دا شاعىن جيناقتى مەكتەپتەرگە پەداگوگ كادرلاردى دايارلاۋ بويىنشا ارنايى جۇمىستار جۇرگىزىلۋدە», دەپ اتاپ ءوتتى.