ءار وتباسىنى كول-كوسىر قۋانىشقا بولەپ, اتا-انا باقىتىن سەزىندىرەتىن تۇڭعىش پەرزەنتتىڭ ءجونى بولەك. الايدا اتىراۋلىق 52 جاستاعى ايەلگە مۇنداي قايتالانباس ءساتتى كوپ كۇتۋگە تۋرا كەلدى.
ءبىر بالاعا زار بولعان انا «اڭساعان ءسابي» جوباسىمەن بولىنەتىن ەكۇ كۆوتاسىنا ءۇمىت ارتقان ەكەن. ءۇمىتى اقتالىپ, جاقىندا وبلىستىق پەريناتالدىق ورتالىقتا تۇڭعىش ءسابيىن بوساندى.
– بۇل جاستا ومىرگە ءسابي اكەلۋ وڭاي ەمەس. ءبىزدىڭ پاتسيەنت بۇعان دەيىن كوپ جىل ەمدەلسە دە بالا كوتەرە الماعان. سودان سوڭ «اڭساعان ءسابي» جوباسىمەن بولىنگەن كۆوتاعا سايكەس ەكۇ ارقىلى بالا كوتەرگەن. وبلىستىق پەريناتالدىق ورتالىقتىڭ بىلىكتى دارىگەرلەرى وعان 19 قاڭتاردا وتا جاسادى. تۇڭعىش ءسابيدىڭ سالماعى – 3 كيلو 70 گرامم, بويى – 51 سم. قازىر انا مەن بالانىڭ جاعدايى جاقسى, – دەپ حابارلادى ورتالىقتىڭ ءباسپاسوز قىزمەتى.
اتىراۋ وبلىسى