ەلىمىزدىڭ بىرنەشە وڭىرىندە جارىق ءوشتى. «KEGOC» كومپانياسىنىڭ وكىلدەرى ماسەلەنىڭ ءمانىسىن ءتۇسىندىردى, دەپ حابارلايدى Egemen.kz.
«25 قاڭتارىندا ساعات 11.59-دا (نۇر-سۇلتان ۋاقىتىمەن) ورتالىق ازيا (وزبەكستان, قىرعىزستان) ەنەرگيا جۇيەسىندە تۋىنداعان اپاتتىق جاعدايدان سوڭ «سولتۇستىك-شىعىس-قازاقستاننىڭ وڭتۇستىگى» 500 كۆ ەلەكتر ەنەرگياسى ترانزيتىنە ارنالعان قۋاتتىڭ تومەندەۋى بايقالدى. سالدارىنان «سولتۇستىك-شىعىس-قازاقستاننىڭ وڭتۇستىگى» ءترانزيتىنىڭ اپاتتى ءبولىنۋى ورىن الىپ, قازاقستاننىڭ وڭتۇستىك ايماعىنداعى تۇتىنۋشىلاردىڭ باسىم بولىگى جارىقسىز قالدى. شەكتەلۋ كولەمى شامامەن 1 500 مەگاۆاتتى قۇرايدى. قازىرگى ۋاقىتتا جۇيە وپەراتورى «KEGOC» اق اپاتتى جويۋ ءىس-شارالارىن قابىلداپ جاتىر», دەلىنگەن كومپانيا كەلتىرگەن اقپاراتتا.
ءبىرشاما ۋاقىت بۇرىن «سامۇرىق-ەنەرگو» اق الماتىدا ەلەكتر ەنەرگياسىنىڭ وشۋىنە بايلانىستى پىكىر بىلدىرگەن بولاتىن.
ء«وڭىردى ەنەرگوجۇيەنىڭ سولتۇستىك جانە وڭتۇستىك بولىكتەرىمەن بايلانىستىراتىن جوعارى ۆولتتى ەلەكتر جەلىلەرىنىڭ اپاتتى تۇردە توقتاۋىنا بايلانىستى الماتى قالاسى مەن الماتى ەنەرگەتيكا ورتالىعى وقشاۋلاندىرىلعان جۇمىسقا اۋىستىرىلدى», دەدى كومپانيا وكىلدەرى.
سونىمەن قاتار الەۋمەتتىك جەلىلەردە جامبىل جانە تۇركىستان وبلىستارىندا جارىق سونگەنى تۋرالى حابار تارادى.