پرەمەر-مينيستر تاتارستان پرەزيدەنتىمەن كەلىسسوز جۇرگىزدى

ر. ميننيحانوۆ دەسترۋكتيۆتى كۇشتەردىڭ وزبىرلىعى سالدارىنان قازا تاپقانداردىڭ وتباسىلارىنا قايعىرىپ كوڭىل ايتتى, سونداي-اق ەلىمىز ءۇشىن وسىنداي قيىن ساتتە قازاقستان حالقىنا دەگەن قولداۋىن ءبىلدىردى.

«تاتارستان رەسپۋبليكاسى قازاقستان مەن رەسەيدىڭ ستراتەگيالىق سەرىكتەستىگىندە ەرەكشە ورىن الادى. قازاقستان مەن تاتارستان اراسىنداعى بۇرىننان جالعاسىپ كەلە جاتقان شىنايى باۋىرلاستىق قارىم-قاتىناس نىعايا تۇسۋدە», دەدى ءا. سمايىلوۆ.

ساۋدا-ەكونوميكالىق, اۋىل شارۋاشىلىعى, مۇناي-گاز حيمياسى, ونەركاسىپتىك كووپەراتسيا جانە باسقا دا سالالارداعى ەكىجاقتى ىنتىماقتاستىق ماسەلەلەرى تالقىلاندى.

ماشينا جاساۋدا بىرلەسكەن جوبالاردى ىسكە اسىرۋعا ەرەكشە نازار اۋدارىلدى: قاراعاندى وبلىسىنىڭ ساران قالاسىندا جىلدىق قۋاتى 3,5 ملن كوپسالالى اۆتوكولىك شيناسىنان 9 ملن شيناعا دەيىن شىعاراتىن زاۋىت سالۋ, (2022 جىلى ىسكە قوسۋ جوسپارلانعان), قوستاناي قالاسىندا شويىن قۇيۋ جانە جەتەكشى بەلدەم رەدۋكتورلارىن ءوندىرۋ زاۋىتتارىن سالۋ (2023-2024 جىلدارى پايدالانۋعا بەرۋ  جوسپارلانعان).

جەتەكشى بەلدەم بالكالارى ءوندىرىسىن ۇلعايتۋ بويىنشا بىرلەسكەن جوبالاردى ىسكە اسىرۋ, سونداي-اق قر-دا «كاماز» ينجينيرينگتىك زەرتتەۋ ورتالىعىن قۇرۋ پەرسپەكتيۆاسى قارالدى.

اتىراۋ وبلىسىندا بيتۋم موديفيكاتسياسىندا, ادگەزيۆتەر, جەلىمدەر, رەزەڭكەلەر جانە ەكولوگيالىق تازا شينالار دايىنداۋدا قولدانىلاتىن بۋتاديەن كاۋچۋكتەرىن ءوندىرۋ جوباسى بەلسەندى ىسكە اسىرۋ ساتىسىندا تۇر. جوبانىڭ قۇنى – شامامەن $1 ملرد, ىسكە اسىرۋ مەرزىمى – 2021-2025 جىلدار, ءوندىرىس قۋاتى – جىلىنا 186 مىڭ توننا بۋتاديەن كاۋچۋكتەرى.

قازاقستان – تاتارستاننىڭ جەتەكشى شەتەلدىك سەرىكتەستەرىنىڭ ءبىرى. 2021 جىلدىڭ 11 ايىندا ەكىجاقتى تاۋار اينالىمى $423,3 ملن قۇرادى. تاياۋ جىلدارى تاراپتار بۇل كورسەتكىشتى $1 ملرد دەيىن جەتكىزۋگە نيەتتى.