Nur Otan پارتياسى توراعاسىنىڭ ءبىرىنشى ورىنباسارى باۋىرجان بايبەك بەينەكونفەرەنتسيا رەجىمىندە بارلىق وڭىرلىك فيليالدارمەن جەرگىلىكتى جەرلەردە ەل پرەزيدەنتى قاسىم-جومارت توقاەۆتىڭ تاياۋدا وتكەن پارلامەنت ماجىلىسىندە قويعان مىندەتتەرىن ورىنداۋعا قوعامدىق جانە پارتيالىق قولداۋدى قامتاماسىز ەتۋ جونىندە جينالىس وتكىزدى, دەپ حابارلادى Nur Otan-نىڭ ءباسپاسوز قىزمەتى.
وتىرىس قاسىرەتتى وقيعا كەزىندە قازا تاپقانداردى ءبىر مينۋت ءۇنسىز ەسكە الۋمەن باستالدى.
«پرەزيدەنتىمىز قاسىم-جومارت كەمەل ۇلى توقاەۆ ايتقانداي, «تاۋەلسىزدىك تاريحىندا ءبىز العاش رەت اسا كۇردەلى جانە قاتەرلى كەزەڭگە تاپ بولدىق». ەلىمىز وسى كۇندەرى اۋىر سىناقتى باستان وتكەردى. سىن ساعاتتا مەملەكەت باسشىسىنىڭ باتىل شەشىمدەر قابىلداۋىنىڭ جانە حالقىمىزدىڭ دانالىعى مەن سابىرلىعىنىڭ ارقاسىندا قاسىرەتتى قاڭتار وقيعالارىنان وتتىك. ەلىمىزدىڭ ەگەمەندىگى مەن تاۋەلسىزدىگىن ساقتاپ قالدىق. قيماس جاندارىنان ايىرىلعان بارشا وتانداستاردىڭ قايعىسىنا تاعى دا ورتاقتاسىپ, كوڭىل ايتامىن. جاراقات العان, سوققى كورگەن ازاماتتاردىڭ تەزىرەك ساۋىعىپ كەتۋىنە تىلەكتەسپىن. ەڭ باستىسى, ەلدىڭ تىنىشتىعى, ادامداردىڭ اماندىعى ەكەنىنە تاعى دا كوزىمىز جەتتى. قيراعان دۇنيە تۇزەلەر, ورتەنگەن عيماراتتار قالپىنا كەلەر, بىراق جۇرەگىمىزگە تۇسكەن سىزات ەشقاشان وشپەيدى», دەدى ب.بايبەك.
ونىڭ ايتۋىنشا, Nur Otan مەملەكەت باسشىسى قويعان الەۋمەتتىك-ەكونوميكالىق سالاداعى ناقتى مىندەتتەردى ورىنداۋعا ءوزىنىڭ بۇكىل رەسۋرستارىن ىسكە قوسقان. پارتيانىڭ ماجىلىستەگى فراكتسياسى پرەزيدەنت اتاپ وتكەن ماسەلەلەردى ورىنداۋدىڭ زاڭنامالىق نەگىزىن قامتاماسىز ەتۋ ىسىنە كىرىسىپ كەتكەن. ماسليحاتتارداعى دەپۋتاتتار جەر-جەردە حالىقپەن تىكەلەي كەزدەسىپ, ءتۇسىندىرۋ جۇمىستارىنا بەلسەنە اتسالىسىپ, سونداي-اق قيراتىلعان ينفراقۇرىلىمداردى قالپىنا كەلتىرۋگە ۇلەس قوسۋدا. بۇل رەتتە پارتيانىڭ قوعامدىق قابىلداۋلارى وسى كۇندەرى تۇراقتى جۇمىس ىستەدى. پارتيانىڭ بىرنەشە مىڭ بەلسەندىسى «حالىق ساقشىسى» قوعامدىق جاساق ساپىندا الماتى قالاسىندا قوعامدىق ءتارتىپ ورناتۋعا اتسالىسىپ, اسكەريلەرگە, پوليتسيا جانە كوممۋنالدىق سالا قىزمەتكەرلەرىنە كومەكتەستى. سونىمەن قاتار پارتيا ەرىكتىلەرى تەك الماتى قالاسىنىڭ وزىندە 155 ملن تەڭگەدەن استام سوماعا ءارتۇرلى كومەك كورسەتتى.
«قازىرگى تاڭدا پارتيانىڭ بارلىق مۇمكىندىگى مەن كۇش-جىگەرىن پرەزيدەنت قاسىم-جومارت كەمەل ۇلى توقاەۆ العا قويعان ماقسات-مىندەتتەردىڭ ساپالى ورىندالۋىنا جۇمىلدىرۋىمىز كەرەك. پارتيانىڭ قولىندا قاجەتتى تەتىكتىڭ ءبارى بار. ءبىز بىلتىر ەل اۋماعىندا بارلىق دەڭگەيلەردە قۇرىلعان 1 700-دەن اسا قوعامدىق كەڭەس جۇمىسىن جولعا قويدىق. ونىڭ قۇرامىندا 12 مىڭنان اسا ادام بار, ۇشتەن ءبىرى – قوعام بەلسەندىلەرى, ۇكىمەتتىك ەمەس ۇيىم مۇشەلەرى, كاسىپكەرلەر, اقپارات قۇرالدارىنىڭ وكىلدەرى مەن بلوگەرلەر. بىلتىر ولار ناتيجەلى قىزمەت ەتىپ, كوپتەگەن كەلەلى ۇسىنىس بەردى, بىرقاتار كوكەيكەستى پروبلەمانىڭ شەشىلۋىنە مۇرىندىق بولدى. قاجەتتى تاجىريبە مەن مۇمكىندىكتەر بار. سوندىقتان Nur Otan-نىڭ قوعامدىق كەڭەستەرى پرەزيدەنت باستامالارىن قولداپ, بەرىلگەن تاپسىرمالاردىڭ جەرگىلىكتى جەرلەردە تولىققاندى ورىندالۋىنا كومەكتەسۋى كەرەك», دەپ اتاپ ءوتتى ول.
پارتيا توراعاسىنىڭ ءبىرىنشى ورىنباسارى اتاپ وتكەندەي, اقپان ايىندا Nur Otan دەپۋتاتتارىنىڭ قوعامدىق رەيتينگىن قالىپتاستىرۋعا ارنالعان پلاتفورما جاريا فورماتتا ىسكە قوسىلادى.
«قوعامدىق رەيتينگ ءماسليحات دەپۋتاتتارىن حالىقپەن ەتەنە ارالاسىپ, سايلاۋشىلارمەن تۇراقتى تۇردە بايلانىس ورناتۋعا ىنتالاندىرۋ ءۇشىن جاسالعان بولاتىن. وسى وقيعالار بۇل باستامانىڭ قانشالىقتى وزەكتى ءارى ماڭىزدى ەكەنىن كورسەتتى. حالىق قالاۋلىلارى – ەڭ الدىمەن, حالىقپەن قويان-قولتىق جۇمىس ىستەۋگە ءتيىس. اشىق تۇردە, ەلمەن ەتەنە جۇمىس ىستەيتىن, قوعامدىق جاۋاپكەرشىلىكتى موينىمەن كوتەرە الاتىن بىلىكتى دەپۋتتارىمىز بەن رەزەرۆتەگى بەلسەندى پارتيالاستارىمىز حالىق تالابىنا ساي لايىقتى باعاسىن الۋعا ءتيىس. بىلتىر قىركۇيەك ايىنان باستاپ بۇل مەحانيزم بارلىق وڭىردە سىناقتان ءوتتى. اقپان ايىنان باستاپ ءبىز قوعامدىق رەيتينگ ناتيجەسىن تۇراقتى تۇردە جاريالاپ وتىرامىز», دەپ مالىمدەدى ب.بايبەك.
كەزدەسۋ بارىسىندا پارتيا توراعاسىنىڭ ءبىرىنشى ورىنباسارى تۇڭعىش پرەزيدەنتتىڭ ەل تاريحىنداعى رولىنە ارنايى توقتالىپ, الەۋمەتتىك جەلىلەردە پارتيا اتىنا ايتىلىپ جاتقان سىندارعا دا جاۋاپ بەردى.
«پرەزيدەنت قاسىم-جومارت كەمەل ۇلى «كۇشىمىز – بىرلىكتە!» دەپ بارلىعىمىزدى ورتاق ماقسات جولىندا توپتاسۋعا شاقىرىپ وتىر. قازاق «جۇمىلا كوتەرگەن جۇك جەڭىل» دەيدى. Nur Otan پارتياسى ەلدىڭ بىرلىگى مەن ىشكى تۇراقتىلىقتى ساقتاۋدىڭ ماڭىزىن ۇنەمى ايتىپ كەلەدى. پارتيا تۋ ەتكەن وسى ماسەلەلەردىڭ قانشالىقتى ماڭىزدى ەكەنىن ءومىردىڭ ءوزى كورسەتىپ وتىر. وسىنداي قيىن-قىستاۋ كەزدە پارتيا جۇمىسىنان ءمىن ىزدەپ, «پارلامەنت تاراتىلسىن, پارتيا تاراتىلسىن» دەگەن ماعىنادا اڭگىمە تاراتىپ جۇرگەندەر بار. مۇنى ايتۋشىلار – Nur Otan پارتياسى مەملەكەتتىلىكتىڭ, ەلدىكتىڭ نەگىزگى قوعامدىق-ساياسي تىرەگىنىڭ ءبىرى ەكەنىن مۇلدەم تۇسىنبەيتىندەر. Nur Otan پارتياسى قۇرىلعالى بەرى قازاقستان مەملەكەتتىلىگىن ساقتاۋ ءۇشىن, قوعام بىرلىگىن بەكەم ەتۋ ءۇشىن جۇمىس ىستەپ كەلەدى. « ۇلى ىستەر ۇندەمەي بىتەدى» دەمەكشى, بۇل – داڭعويلىققا سالۋعا بولمايتىن, كوزگە كورىنبەيتىن ىستەر. سوندىقتان ءبىز ايتىلعان قيسىندى سىندى كوتەرە ءبىلىپ, ال جۇيەسىز سوزگە ءمان بەرمەي, بەل شەشىپ جۇمىس ىستەگەنىمىز ءجون», دەپ اتاپ ءوتتى ول.
ونىڭ ايتۋىنشا, قازىر تۇڭعىش پرەزيدەنتىمىز تۋرالى دا نەبىر پىكىر ايتۋشىلار كوبەيگەن. تاريح بەزبەنىنە سالساق, كەز كەلگەن وقيعانىڭ, نە تۇلعانىڭ وتكەندەگى رولىنە بىرىڭعاي وڭ نە بولماسا تەك قانا تەرىس دەپ باعا بەرۋگە بولمايدى. مىسالى, تۇركيانىڭ تۇڭعىش پرەزيدەنتى مۇستافا كەمال اتاتۇرىك تۋرالى دا قاراما-قايشى پىكىرلەر كوپ. بىراق ول زاماناۋي تۇرىك مەملەكەتىنىڭ نەگىزىن قالاۋشى تاريحي تۇلعا بولىپ قالا بەرمەك.
«وتكەنگە باعا بەرۋ اركىمنىڭ قولىنان كەلەدى, بىراق اقيقات پەن جالعاندى اجىراتۋ اركىمنىڭ ءوز ار-ۇياتىنا بايلانىستى. ەڭ قيىن كەزەڭدە, ياعني ءبىز مەملەكەت بولامىز با, بولمايمىز با دەگەن سوناۋ الماعايىپ 90-شى جىلدارى نۇرسۇلتان ءابىش ۇلى نازارباەۆتىڭ باسشىلىعىمەن قازاقستان تاۋەلسىز مەملەكەت بولىپ قالىپتاستى, ەتەك-جەڭىن جيدى. توڭىرەگىمەن تەرەزەسى تەڭەستى. جالپى الەمدىك قاۋىمداستىق مويىندادى. ەلباسى مەن سول كەزدەگى اعا ۇرپاقتىڭ 30 جىل بويى مەملەكەتتىلىكتىڭ ىرگەسىن بەكىتىپ, شەكاراسىن شەگەندەپ, تەرريتورياسىنىڭ تۇتاستىعىن ساقتاۋعا سىڭىرگەن ەرەن ەڭبەگى ۇلت تاريحىندا ءوزىنىڭ وڭ باعاسىن الارى ءسوزسىز. ال وسى جىلدارى كەتەۋى كەتكەن دۇنيەنى تەزىرەك تۇزەۋىمىز كەرەك. بۇل – ءسوزسىز. پرەزيدەنت جاريالاعان رەفورمالاردىڭ دا ءمانى وسى. بىراق مەملەكەت باسشىلىعىنان كەتكەن نۇرسۇلتان نازارباەۆتى جاتا جامانداۋ – ەلدىگىمىزگە, ازاماتتىعىمىزعا سىن», دەدى ول.
ب.بايبەك اتاپ وتكەندەي, 30 جىلعا ەندى تولعان تاۋەلسىزدىگىمىزدى باياندى ەتۋ ءۇشىن قازاقستاندىق قوعامدا مەملەكەتتىلىكتىڭ ءداستۇرىن, ونىڭ ىشىندە بيلىك ساباقتاستىعىنىڭ ءداستۇرىن قالىپتاستىرا ءبىلۋىمىز شارت.
ء«بىز ءۇشىن قازىر ەلدىگىمىزدى ساقتاۋ, باردى ۇقساتۋ اسا ماڭىزدى. سوندىقتان ەلباسى قۇرعان Nur Otan پارتياسى ەلدىڭ بىرلىگى مەن قوعامنىڭ تۇراقتىلىعىنا باعىتتالعان جۇمىسىن ودان ءارى جالعاستىرۋى كەرەك. قازىرگى تاڭدا ءبىز الدا بولاتىن كەزەكتەن تىس سەزد جۇمىسىنا دايىندىقتى باستاپ كەتتىك. قاڭتاردىڭ قاسىرەتتى كۇندەرىندە ەلباسى بارشامىزدى پرەزيدەنتتىڭ ماڭايىنا توپتاسىپ, ەلدىڭ اماندىعى مەن بىرلىگىن ساقتاپ قالۋ ءۇشىن بىرگە ارەكەت ەتۋگە ۇندەگەنىن بارشاڭىز بىلەسىزدەر. كىم نە دەسە دە, Nur Otan پارتياسى – پرەزيدەنت جاريالاعان رەفورمالاردى تولىق جانە ساپالى جۇزەگە اسىرۋعا الەۋەتى تولىق جەتەتىن بىردەن-ءبىر قوعامدىق-ساياسي كۇش. پارتيامىز مەملەكەت باسشىسى العا قويعان مىندەتتەردى ورىنداۋ ءۇشىن بار كۇش-جىگەرىن – قوعامدىق ۇيىمداردى, دەپۋتاتتىق فراكتسيالاردى, ءتۇرلى قىزمەتتە جۇرگەن 800 مىڭعا تارتا بارلىق مۇشەسىن ورتاق ماقساتقا جۇمىلدىرۋعا دايىن», دەپ تۇيىندەدى ول.
وتىرىس بارىسىندا الماتى قالاسى, ماڭعىستاۋ, جامبىل وبلىستىق فيليالدارى توراعالارىنىڭ ءبىرىنشى ورىنباسارلارى, سونىمەن قاتار Jas Otan جاستار قاناتىنىڭ توراعاسى قازىرگى تاڭدا پارتيا تاراپىنان جەرگىلىكتى اكىمدىكتەرگە ينفراقۇرىلىمداردى قالپىنا كەلتىرۋ, قوعامدىق ءتارتىپتى نىعايتۋ, ۆولونتەرلەر قىزمەتىن ۇيلەستىرۋ جانە باسقا دا اتقارىلىپ جاتقان جۇمىستار بويىنشا اقپارات بەردى.