ەلىمىزدىڭ ءار وڭىرىندەگى ەپيدەميالىق احۋالعا بايلانىستى ءۇشىنشى توقساندا وقىتۋ ءارتۇرلى فورماتتا باستالادى. نۇر-سۇلتان, الماتى, شىمكەنت قالالارىندا بالالار قاشىقتان وقيدى. ولارعا قاجەتتى تەحنيكالىق قۇرالدار تاراتىلىپ جاتىر. ال ستۋدەنتتەر ارالاس فورماتتا ءبىلىم الادى. بۇل تۋرالى ورتالىق كوممۋنيكاتسيالار قىزمەتىندە وتكەن بريفينگتە ءبىلىم جانە عىلىم مينيسترلىگىنىڭ وكىلدەرى حابارلادى.
ءباسپاسوز كونفەرەنتسياسىندا ءبىرىنشى بولىپ ءسوز العان مەكتەپكە دەيىنگى جانە ورتا ءبىلىم كوميتەتى ءتورايىمى گۇلميرا كاريموۆا: «600-دەن اسا وقۋشىسى بار قالالىق مەكتەپتەر قاشىقتان وقىتادى. بۇل رەتتە 1-2-سىنىپتار ءۇشىن وقىتۋدىڭ شتاتتىق فورماتى, ال 3-5-سىنىپتاردا كەزەكشى سىنىپتار بولادى. سىيىمدىلىعى 600 وقۋشىعا دەيىنگى قالا مەكتەپتەرى جانە بارلىق اۋىل مەكتەپتەرى شتاتتىق فورماتتا جۇمىس ىستەيدى. سانيتارلىق دارىگەرلەردىڭ شەشىمىنە بايلانىستى بالاباقشالاردا وقىتۋ جانە تاربيەلەۋ جۇمىستارى شتاتتىق فورماتتا جۇرگىزىلەدى. ەل بويىنشا شتاتتىق فورماتتا وقيتىن وقۋشىلار سانى 2 ملن-نان اسادى, ال قاشىقتان وقيتىن وقۋشىلار سانى – 1,5 ملن-عا جۋىق. ياعني وقۋشىلاردىڭ 60%-ى شتاتتىق فورماتتا, 40%-ى قاشىقتان وقيدى. سونىمەن قاتار بۇل وڭىرلەردە مەكتەپتەن تىس ۇيىمداردا وقىتۋ جەكە نەمەسە توپتىق ساباقتار كەزىندە شتاتتىق رەجىمدە – 10 ادامعا دەيىن ۇيىمداستىرىلادى. ارنايى ۇيىمداردا تۇزەتۋ كابينەتتەرى, رەسۋرستىق ورتالىقتاردا مۇمكىندىگى شەكتەۋلى بالالار ءۇشىن شتاتتىق رەجىمدە جۇمىس ىستەي بەرەدى. مۇنداي ۇيىمداردا جۇمىس جەكە جانە 8 ادامنان اسپايتىن توپتاردا ۇيىمداستىرىلادى. رەسپۋبليكا بويىنشا وسىنداي 160 مىڭنان اسا وقۋشى بار», دەدى.
كوميتەت ءتورايىمىنىڭ ايتۋىنا قاراعاندا, ەلوردا مەن الماتى, شىمكەنت قالالارىندا بالالار قاشىقتان وقيدى, ەپيدەميالىق احۋال جاقسارسا, وقىتۋدىڭ ءداستۇرلى فورماتىنا اۋىسادى. شتاتتىق فورماتتا جۇمىس ىستەيتىن ءبىلىم بەرۋ ۇيىمدارىندا بالالارعا تاماق بەرىلەدى. شەكتەۋ ءىس-شارالارى اياقتالعانعا دەيىن بالالار مەكتەپكە ىسكەرلىك, كلاسسيكالىق ستيلدە ىڭعايلى كيىممەن بارا الادى. ءۇشىنشى توقسان 18 ناۋرىزعا دەيىن جالعاسادى. ال دەنساۋلىق ساقتاۋ مينيسترلىگى جانىنداعى باسقارمانىڭ باسشىسى مارال راحيمجانوۆانىڭ مالىمدەۋىنشە, COVID-19 تارالۋىنا جول بەرمەۋ جونىندەگى ۆەدومستۆوارالىق كوميسسيانىڭ شەشىمى بويىنشا ۆاكتسينانى تولىق العان بالالار ساباقتى وفلاين وقي الادى.
جوعارى وقۋ ورىندارىندا كوكتەمگى سەمەستر 24 قاڭتاردا باستالادى. جوعارى جانە جوعارى وقۋ ورنىنان كەيىنگى ءبىلىم دەپارتامەنتى ديرەكتورى ادىلەت تويباەۆ ۋنيۆەرسيتەتتەردە وقىتۋ ارالاس فورماتتا جۇرگىزىلەتىنىن جەتكىزدى.
«جوعارى وقۋ ورىندارى كاسكادتىق ءادىستى قولدانا الادى, ياعني ستۋدەنتتەردىڭ جيناقتالۋىن بارىنشا ازايتۋ ءۇشىن وقۋدى باستاۋ وقۋ كۋرسىنا, وقۋ باعىتتارىنا بايلانىستى 24 قاڭتار مەن 6 اقپان ارالىعىندا كەزەڭ-كەزەڭىمەن ۇيىمداستىرىلۋى مۇمكىن. مىسالى, 1-كۋرس ستۋدەنتتەرى ءۇشىن وقۋ 24 قاڭتاردا باستالسا, 2-كۋرس ستۋدەنتتەرى 31 قاڭتاردان, 3-4-كۋرس ستۋدەنتتەرى ءۇشىن 7 اقپاننان باستاۋعا بولادى. كوكتەمگى سەمەستردە وقىتۋ ءداستۇرلى جانە ارالاس فورماتتا بولادى. اتاپ ايتقاندا, جوعارى وقۋ ورنىنىڭ شەشىمى بويىنشا وقۋ پروتسەسى تولىعىمەن ءداستۇرلى فورماتتا نەمەسە ارالاس فورماتتا ۇيىمداستىرىلۋى مۇمكىن. سوندا دارىستەر ونلاين, ال پراكتيكالىق جانە سەمينار/زەرتحانالىق ساباقتار وفلاين رەجىمدە وتەدى. ستۋدەنتتەردىڭ پراكتيكاسى دا وفلاين رەجىمىندە پراكتيكا بازالارىندا جۇزەگە اسىرىلادى», دەدى ءا.تويباەۆ.
دەپارتامەنت ديرەكتورىنىڭ ايتۋىنشا, ستۋدەنتتەردەن پتر تەستىن تاپسىرۋ تالاپ ەتىلمەيدى. بىراق Ashyq قوسىمشاسىمەن وتەدى, «جاسىل» جانە «كوك» مارتەبەسى بار ستۋدەنتتەر ۋنيۆەرسيتەتكە ەمىن-ەركىن كىرىپ-شىعا الادى.