كوروناۆيرۋستىڭ «وميكرون» شتامى ۆيرۋستىڭ ەڭ قاۋىپتى نۇسقاسى ەكەندىگى تۋرالى ناقتى زەرتتەۋلەر جاسالىپ ۇلگەرمەسە دە, عالىمدار ءبىر اۋىزدان ونىڭ تەز تارالاتىنىن ماقۇلدادى. «اۋرۋعا شالدىققانداردىڭ جاعدايى اۋىر بولماسا دا, سانى رەكوردتاردى جاڭارتاتىنىن قازىردەن ەسكەرتەمىز» دەيدى عالىمدار. گەرمانيا ۇكىمەتى بۇل تۇجىرىمدى راستاپ وتىر. ويتكەنى كارانتينگە جابىلىپ, دەنساۋلىعىنا بايلانىستى دەمالىس العان قىزمەتكەرلەر سانى كۇن سايىن ارتىپ جاتىر.
بۇل جۇمىس بەرۋشىلەردى قازىردەن قىنجىلتىپ وتىر. ويتكەنى دەمالىسقا كەتىپ, اۋرۋحاناعا تۇسكەن قىزمەتكەرلەر سانى ارتسا, جۇمىس كۇشى كەميدى. ءوندىرىس قارقىنى ءسوزسىز تەجەلەدى, ءتىپتى توقتاپ قالۋ قاۋپى جوعارى.
گفر-دىڭ جاڭا ۇكىمەتىنە قاراستى ساراپشىلار كەڭەسى «وميكرون» نۇسقاسىنىڭ جەدەل تارالۋىنان ءتونىپ تۇرعان پاندەميانىڭ بەسىنشى تولقىنىنا قاتىستى بولجامىمەن ءبولىستى. جەلتوقساننىڭ اياعىنا قاراي جاريالانعان قۇجاتتا ينفراقۇرىلىمعا دا قاۋىپ ءتونىپ تۇرعانى تۋرالى ايتىلعان. ياعني ساراپشىلار اۋرۋحانالار, پوليتسيا بولىمشەلەرى مەن قۇتقارۋ قىزمەتتەرى, قوعاممەن بايلانىس مەكەمەلەرى, ەلەكتر ەنەرگياسى, سۋمەن قامتاماسىز ەتۋ جەلىلەرى مەن لوگيستيكا جۇمىستارىن ۇلكەن تاۋەكەلدەر كۇتىپ تۇرعانىن حابارلايدى.
بۇل قۇجات حالىق نازارىنا ۇسىنىلعاننان كەيىن گەرمانياداعى بىرقاتار كاسىپورىن مەن بىرلەستىكتەر قىزمەتكەرلەرى جاپپاي اۋىرعان جاعدايدا قانداي شارالار قابىلدايتىنىن ورتاعا سالدى. ولار نەگىزگە ۇلىبريتانياداعى جاعدايدى مىسالعا العانىن دا جاسىرمادى. ويتكەنى ۇلىبريتانيادا «وميكرون» ۆيرۋستىڭ ەڭ كەڭ تارالعان تۇرىنە اينالىپ, جۇمىس كۇشى تاپشىلىعىنا الىپ كەلدى. ماسەلەن, جاقىندا پويىزدار جۇمىسى توقتاۋعا ءماجبۇر بولدى.
گەرمانياداعى كاسىپورىندار ەنگىزگەن العاشقى ەرەجە – قىزمەتكەرلەر اراسىنداعى بايلانىستى ازايتۋ. ياعني كەزەكشىلىكتەگى جۇمىسشىلار كەزەكتەرى اۋىسقاندا ءبىر-بىرىمەن مەيلىنشە ازىراق بايلانىسۋى قاجەت. وسىلايشا, جۇمىس توپتارى اراسىندا ينفەكتسيا تارالۋىن تەجەۋدى كوزدەپ وتىر. ودان بولەك كەزەكتى تاپسىرۋشى مەن قابىلداپ الۋشى قىزمەتكەر FFP2 سياقتى قورعانىسى مىقتىراق بەتپەردە تاعۋى ءتيىس. الەۋمەتتىك اراقاشىقتىقتى ساقتاۋعا مىندەتتى. كاسىپورىندار قىزمەتكەرلەرى ۆيرۋستى انىقتاۋ ءۇشىن كۇندەلىكتى تەست تاپسىرادى. وسىلاردىڭ بارلىعى كومپانيا قاراجاتىنان وتەلەدى.
گەرمانياداعى ەلەكتر ەنەرگەتيكاسى بويىنشا الپاۋىت E.on كومپانياسى «داعدارىسقا ارنالعان جوسپارىن» ازىرلەپ قويعانىن دا حابارلادى. جوسپاردا كومپانيا قىزمەتكەرلەرىن جۇمىس ورنىنا كوشىرۋ دە قاراستىرىلعان. كوشىرۋ ارقىلى ۇيدە, جولدا ينفەكتسيا جۇقتىرۋ قاۋپىن ازايتامىز دەگەن ويدى العا تارتادى. اتالعان كومپانيا قىزمەتكەرلەرىنىڭ 80-90 پايىزى ۆاكتسينا سالدىرعانىن ەسكەرگەن ءجون.
تاماق ونەركاسىبى دە ۇلكەن قاۋىپتىڭ الدىندا. گەرمانيا تاماق ونەركاسىبى بىرلەستىگى قاۋىپسىزدىك شارالارى تولىقتاي ساقتالاتىنىن حابارلادى. ولار دا «وميكرون» نۇسقاسىنىڭ تارالۋىن تەجەۋ ءۇشىن بىرقاتار شارا قابىلداعان. قارجى سەكتورى دا داعدارىسقا دايىن. بۇعان دەيىن دە ەلدەگى قارجى سەكتورى قىزمەتكەرلەرىن ءارتۇرلى قالالارعا جىبەرگەنى حابارلانعان ەدى. پاندەميا ءبىر نۇكتەدە ورشىسە, ەكىنشى, ءۇشىنشى قالالارداعى قىزمەتكەرلەر ولاردى اۋىستىرا الۋى ءۇشىن وسىنداي قادامعا بارعان. ەندى ەسكى جوسپار جاڭارتىلىپ, ساقتىق شارالارى ودان دا كۇشەيتىلەدى دەيدى.
مۇنداي جوسپارلار مەن شارالاردى سىناۋشىلار دا تابىلۋدا. ويتكەنى «وميكروننىڭ» جەدەل تارالۋىن اسا ۇلكەن قاۋىپ دەپ سانامايتىندار توبى دا بار. ماسەلەن, Der Spiegel باسىلىمى بەلگىلى ءبىر پروفەسسوردىڭ «وميكروننان» قاۋىپتەنۋدىڭ قاجەتى جوق دەگەن ماقالاسىن جاريالادى. عالىم ۆيرۋستىڭ بۇل شتامى نەبارى ءۇش ميلليونعا جۋىق ادامنان انىقتالادى, سوندىقتان ۇرەيلەنۋدىڭ قاجەتى جوق دەگەن وي ايتادى.