مەملەكەت باسشىسى قاسىم-جومارت كەمەل ۇلى توقاەۆتىڭ بيىلعى 11 قاڭتاردا قر پارلامەنتى ءماجىلىسىنىڭ وتىرىسىندا بەرگەن تاپسىرماسىن ورىنداۋ اياسىندا قازاقستاننىڭ بىرنەشە قوعامدىق ۇيىمى «قازاقستان حالقىنا» قوعامدىق الەۋمەتتىك قورىن (قاق) قۇردى, دەپ جازادى Egemen.kz.
«قازاقستان حالقىنا» قاق دەنساۋلىق ساقتاۋ, ءبىلىم بەرۋ, حالىقتىڭ الەۋمەتتىك جاعىنان از قامتىلعان توپتارىن الەۋمەتتىك قولداۋ سالاسىنداعى ناقتى پروبلەمالاردى شەشۋمەن اينالىساتىن بولادى.
قوردىڭ قىزمەتى قوعامدى بىرىكتىرۋگە جانە الەۋمەتتىك ادىلەتتىلىكتى نىعايتۋعا ىقپال ەتەدى. قور جەكە جانە مەملەكەتتىك كوزدەردەن قارجىلاندىرىلادى, سونىمەن قاتار حالىقارالىق قايىرىمدىلىق ۇيىمدارىنىڭ كومەگىن تارتۋ جوسپاردا بار.
قر ۇكىمەتىنىڭ باسشىسى ءا. سمايىلوۆ پەن قر پرەمەر-ءمينيسترى كەڭسەسىنىڭ قىزمەتكەرلەرى ءبىر كۇندىك ەڭبەكاقىلارىن «قازاقستان حالقىنا» قورىنا اۋداردى.
ۇكىمەت بيزنەس وكىلدەرىنە, ەڭ الدىمەن, ءىرى بيزنەس وكىلدەرىنە الەۋمەتتىك جاۋاپكەرشىلىك تانىتىپ, قوردى قارجىلاندىرۋعا كومەك كورسەتۋگە شاقىرادى.