تاۋبەشىل حالقىمىز ادىلەت, ابىروي جانە مەملەكەت ءۇشىن تاۋەكەلشىل دە بولا الاتىنىن كورسەتتى. سىن ساعاتتا جاۋاپكەرشىلىك العان مەملەكەت باسشىسىنا سەنىپ, ۇلت بولىپ ۇيىسقان حالىق ءوزىنىڭ ادال نيەتىن لاڭكەستەر, سودىرلار, ولاردى جۇمساعان ارامزا دا اشقاراق ىشكى جانە سىرتقى جاۋلار پايدالانعانىنا وزەگى ورتەنگەنىمەن, تاۋەلسىز قازاقستاندى, ەل مۇددەسىن بارىنەن جوعارى قاستەرلەيتىنىن دالەلدەدى.
تالاي بوزداقتىڭ ءومىرى قۇربان بولعان قانتوگىس كەزىندە دە, پرەزيدەنت باسشىلىعىمەن ءتارتىپ ورناتىلا باستاعاندا دا ميلليونداعان ازاماتتىڭ بيىك جاۋاپكەرشىلىگىن, ىنتىماعىن جانە وتانسۇيگىشتىگىن كوردىك. حالىقتىڭ بىرلىگى مەن سەنىمى پرەزيدەنت قاسىم-جومارت توقاەۆقا باتىل شەشىمدەردى ۋاقتىلى قابىلداپ, ولاردى ورىنداتۋعا جاعداي تۋعىزدى.
پرەزيدەنتتىڭ كەشەگى بايانداماسى ەڭ جوعارى مىنبەردەن ايتىلعان ەڭ وتكىر باعاسىمەن, ەل مەن جەر بايلىعىن حالىق يگىلىگىنە پايدالانۋعا, تاۋەلسىزدىكتى قورعاۋعا باعىتتالعان وزەكتى شەشىمدەرىمەن كوڭىلگە سەنىم ۇيالاتتى.
ول شەشىمدەردى جۇزەگە اسىرۋ جاڭادان جاساقتالعان ۇكىمەتكە سىن. از كۇندە تەز ەسەيىپ, ءوزىنىڭ قۋاتىمەن قاتار جاۋاپكەرشىلىگىن سەزگەن قوعام دا, تاۋەلسىزدىگىمىز بەن مەملەكەتىمىزدى قورعاۋدا بار جاۋاپكەرشىلىكتى الىپ, كوش باستاعان پرەزيدەنت تە ۇكىمەت پەن اكىمدەر جۇمىسىن ءجىتى باقىلاپ, قاجەت كەزدە ءتۇيىن تۇيەرى ءسوزسىز.
قازىرگى قىسىلتاياڭ كەزدە شۇعىل شارالاردى قاجەت ەتەتىن ىرعاقتى جۇمىستى تەز باستاۋ ءۇشىن قولدا بار ادامداردى پايدالانعانى دا تۇسىنىكتى. ولاردىڭ ارقايسىسى دا بولعان وقيعالاردان ساباق الىپ, قوعاممەن بىرگە وزگەردى دەپ ۇمىتتەنەمىن. سىن ساتتەردەگى ۇستانىمدارى دا تاعايىنداۋ تۋرالى شەشىم قابىلداردا ەسكەرىلگەن بولار.
ۇكىمەتتىڭ العاشقى وتىرىسىن كوردىك. بىلۋىمشە, باسىنان اياعىنا دەيىن مەملەكەتتىك تىلدە وتكەن العاش ۇكىمەت وتىرىسى. ەندى ەكونوميكانى كوتەرىپ, حالىقتىڭ تۇرمىسىن جاقسارتۋدا ەڭبەكتەرى جەمىستى بولۋىنا تىلەكتەسپىن.
قولىمىزدان كەلگەن كومەگىمىزدى كورسەتىپ, جاعدايدى قالپىنا كەلتىرىپ, قازاقستانىمىزدى تۇراقتى دامىتۋعا اتسالىسۋدى ازاماتتىق پارىزىمىز دەپ سانايمىن.
قوردالانعان ماسەلەلەردى شەشۋگە سەپتەسەتىن ناقتى ۇسىنىستارىمىز بولسا, پرەزيدەنت پەن ۇكىمەتكە جولدايىق.
حالىق الەۋەتىن ەل يگىلىگىنە پايدالانۋعا جاعداي تۋعىزاتىن ساياسي رەفورمالار دا دايىندالىپ جاتقانىن, ولاردىڭ قوعاممەن, ساراپشىلارمەن تالقىلانعان سوڭ جاريالاناتىنىن پرەزيدەنت حابارلادى. ولار بيلىك تارماقتارى تەپە-تەڭدىگى, سوت تاۋەلسىزدىگى مەن ادىلدىگى, پارلامەنت پەن ماسليحاتتاعىلاردىڭ حالىق وكىلدەرى بولۋىن قامتاماسىز ەتۋ, ءسوز بەن جينالىس بوستاندىعى سەكىلدى باعىتتاردى قامتيدى دەپ سەنەمىن.
سونىمەن قاتار پرەزيدەنت قاسىم-جومارت توقاەۆتىڭ «حالىق ۇنىنە قۇلاق اساتىن مەملەكەت» تۇجىرىمداماسى جۇزەگە اسۋى ءۇشىن دە ساياسي رەفورمالار قاجەت. سەبەبى حالىقتى ەستۋ قابىلەتى مەملەكەتتىك اپپارات پەن بيلىكتىڭ كاسىبيلىگىنە بايلانىستى بولسا, حالىقتى ەستىپ, تۇسىنۋگە دەگەن ىنتا مەن ق ۇلىق لاۋازىم يەلەرىنىڭ تاعدىرىن حالىق پىكىرىمەن بايلانىستىراتىن ساياسي جۇيەگە تاۋەلدى. وسى رەفورمالار تۋرالى ۇسىنىستاردى ەنگىزىپ, ولاردى تالقىلاۋدا ازاماتتار مەن قوعامدىق ۇيىمداردىڭ ساياسي پىكىرتالاستى جاسامپازدىق سايىسىنا اينالدىرىپ, وڭ وزگەرىستەرگە مۇرىندىق بولۋلارىنا تىلەكتەسپىن.
بۇل – ءبىزدىڭ كەشەگى قانتوگىستە شەيىت بولعان بوزداقتار مەن تاۋەلسىزدىكتى اڭساعان اتا-بابا ارۋاعى جانە بولاشاق ۇرپاق الدىنداعى پارىزىمىز.
ءاليحان بايمەنوۆ