بۇگىنگى تاڭدا وتانىمىز قيىن ساتتەردى باسىنان وتكەرىپ جاتىر. بىراق ءبىز كەز كەلگەن قيىندىققا قارسى تۇرىپ, بۇگىنگى تاڭداعى قىسىلتاياڭ شاقتا ونى بىرلەسە شەشە الامىز.
ءبىز, قۇقىقتىق ءتارتىپ اسكەرىنىڭ ارداگەرلەرى, وسىنداي ساتتە پرەزيدەنتتى قولدايمىز جانە بۇكىل قازاق حالقىن بىرىگىپ ءتارتىپتى ساقتاۋعا جانە قالىپتى ومىرگە ورالۋعا شاقىرامىز. ءبىز بۇرىنعى كەڭەس كەزىندە ءارتۇرلى ايماقتاردا ۇزاق جىلدار قىزمەت ەتۋ بارىسىندا كوپتەگەن جاعدايلاردى باستان كەشىردىك, كەڭەس وداعىنىڭ قۇلاۋى مەن جاڭا ىشكى اسكەردىڭ قۇرىلۋىنا دا كۋا بولدىق.
وكىنىشكە قاراي, اسكەرىمىز – ۇلتتىق ۇلاننىڭ 30 جىلدىق مەرەيتويى مەملەكەتتىك توڭكەرىس جاساماق بولعان لاڭكەستەردىڭ قولىنان قازا بولعانداردى ەسكە الۋعا وراي جاريالانعان جالپىۇلتتىق ازا تۇتۋ كۇنىنە سايكەس كەلدى. قاسىم-جومارت كەمەل ۇلى «قوعام بولىپ بىرىگۋىمىزدىڭ ارقاسىندا شابۋىلشىلارعا, سونىڭ ىشىندە كاسىبي ستسەناري بويىنشا ماشىقتانعان قىلمىستىق توپقا, مەملەكەت تۇتاستىعىن بۇزۋعا نيەتتىلەرگە قارسى تۇرا بىلدىك» دەپ وتە ورىندى ايتتى. ويتكەنى جوعارى لاۋازىمدا وتىرعان ساياسي قايراتكەرلەردىڭ ءوزى قوعامنىڭ ءبىر بولىگىن جاپپاي تارتىپسىزدىككە دايىنداپ, سوڭىن قايعىلى جاعدايعا ۇلاستىرعانى انىقتالىپ جاتىر.
ءبىز پرەزيدەنتىمىزدىڭ ۇجىمدىق قاۋىپسىزدىك تۋرالى شارت ۇيىمىنا مۇشە مەملەكەتتەرىنىڭ بىتىمگەرشىلىك كۇشتەرىن ەنگىزۋ تۋرالى شەشىمىن قولدايمىز. شىن مانىندە بىتىمگەرشىلىك كۇشتەرىنىڭ شوعىرلانۋىنىڭ ارقاسىندا اسەم قالامىز – الماتى امان قالىپ, دەر كەزىندە قۇتقارىلدى.
بۇگىندە لاڭكەستىككە قارسى وپەراتسيا ءوزىنىڭ سوڭعى كەزەڭىنە اياق باسىپ وتىر. ءبىز, ارداگەرلەر, كوپ ۇزاماي سانى ون مىڭنان اسقان زاڭسىز ارەكەتتەرگە ايداپ سالۋشىلار مەن قاتىسۋشىلاردىڭ بارلىعى ۇستالىپ, جاۋاپقا تارتىلادى دەپ سەنەمىز. قاندى قاڭتار كۇندەرىنىڭ كىنالىلەرى مىندەتتى تۇردە جازاسىن الۋى كەرەك. ز ۇلىمدىق لايىقتى جانە ءادىل جاۋاپ الۋى ءتيىس. پرەزيدەنت ايتقانداي, «بەيبىت تۇرعىندارعا قارسى قىلمىسقا قاتىسى بار بارلىق سودىرلار مەن ولاردىڭ سىبايلاستارى تابىلىپ, جازالانعانى ءجون».
وسى تۇرعىدا ۇقشۇ مەملەكەتتەرى كوشباسشىلارىنىڭ قازاقستانداعى تارتىپسىزدىك كەزىندە كورسەتكەن كومەكتەرىن اتاپ وتكىم كەلەدى. بۇل جونىندە قاسىم-جومارت توقاەۆ ونلاين كەزدەسۋ بارىسىندا ەرەكشە ايتىپ ءوتىپ, ۇقشۇ-عا مۇشە ەلدەردىڭ باسشىلارىنا ءوزىنىڭ شىنايى العىسىن ءبىلدىردى. ءوز كەزەگىندە وسى ءبىر سۇراپىل كۇندەرى ماعان قازان, ساراتوۆ, سانكت-پەتەربۋرگ, ماسكەۋ قالالارىنان بۇرىن بىرگە وقىپ, قىزمەتتەس بولعان ارىپتەستەر حابارلاسىپ, ەلدەگى جاعدايدىڭ تەز وڭالۋىنا قولداۋلارىن ءبىلدىردى. ولاردىڭ دا ءبىزدىڭ ماسەلەگە بەيجاي قاراي المايتىنىن جۇرەككە جىلۋ ۇيالاتتى.
بۇل رەتتە ءبىز مەملەكەت باسشىسىنىڭ قۇقىق قورعاۋ جۇيەسىن رەفورمالاۋدان باستاپ, بارلىق ماڭىزدى سالادا اۋقىمدى رەفورمالار جۇرگىزۋ تۋرالى شەشىمىن قۋانا قابىلدادىق. ويتكەنى ۇلتتىق ۇلان مەن پوليتسيانىڭ مەملەكەت تاراپىنان جوعارى دەڭگەيدە قولداۋ تابۋى اسا ماڭىزدى. پرەزيدەنتىمىزدىڭ بارلىق مالىمدەمەلەرىندە ەكسترەميستەردىڭ قيان-كەسكى شابۋىلدارىنا تويتارىس بەرىپ, باسقا دا كۇش قۇرىلىمدارىمەن يىق تىرەستىرە وتىرىپ, ساقشىلاردىڭ باتىلدىعى مەن قىراعىلىعى تۋرالى وڭ سويلەيتىنى قۋانتادى.
اسىرەسە, ءتارتىپ ساقشىلارى ءۇشىن مەملەكەت باسشىسىنىڭ سويلەگەن سوزىنە نازار اۋدارىپ قانا قويماي, ماڭىزدى ەكپىن ايتقانىن ەستۋ وتە ماڭىزدى. ويتكەنى مەملەكەت باسشىسى: «ۇلتتىق ۇلاندى ساندىق جانە ساپالىق جاعىنان كۇشەيتۋ قاجەت. بولىنىستەرىن نىعايتىپ, وڭىرلەردە جاڭا بولىمشەلەرىن جاساقتاۋدى قولعا الۋ كەرەك. ۇلتتىق ۇلاننىڭ كولىكتىك جانە ماتەريالدىق-تەحنيكالىق تۇرعىدا تولىق قامتاماسىز ەتىلۋىن شەشۋ قاجەت. ىشكى ىستەر مينيسترلىگى مەن ۇلتتىق ۇلاننىڭ ارنايى ماقساتتاعى بولىمشەلەرىنىڭ سانى ارتتىرىلسىن. جاۋىنگەرلىك ازىرلىك دەڭگەيى كوتەرىلسىن. قاجەتتى ارنايى كولىكتەرمەن قايتا جابدىقتالسىن. بارلىق قۇقىق قورعاۋ ورگاندارىنىڭ ارنايى جاساقتارى قىزمەتكەرلەرىنىڭ جالاقىسى كوتەرىلسىن», دەدى.
وسى قىسقا دا, ماڭىزدى سوزدەردەن مەملەكەت تاراپىنان بىزگە جاسالىپ جاتقان قامقورلىقتى, جاڭا وزەكتى ماقساتتاردى كورۋگە بولادى. ەندى جەكە قۇرامنىڭ الدىندا وسىنىڭ بارلىعىن ءتيىمدى, ءارى قىسقا مەرزىمدە اتقارۋ مىندەتى تۇر. ال ءبىز, ارداگەرلەر, ومىرلىك جانە قىزمەتتىك تاجىريبەمىزدى بەرە وتىرىپ, ايتىلعان وڭتايلى باستامالاردى تولىعىمەن قولدايمىز.
مەملەكەت باسشىسى اتاپ وتكەندەي, بىرگە – ءبىز مىقتىمىز. ءوز تاراپىمىزدان ايتپاعىمىز: مىقتىلىعىمىز – زاڭ مەن تارتىپتە.
قالياقپار توقىشەۆ,
وتستاۆكاداعى گەنەرال-مايور,
قر ۇلتتىق ۇلانى ارداگەرلەر كەڭەسىنىڭ توراعاسى