الەمدىك كينويندۋستريادا انيماتسيالىق فيلمدەردىڭ الاتىن ورنى ەرەكشە, سوندىقتان دا ولار وسى سالاعا جۇزدەگەن ميلليون دوللار جۇمسايدى. بۇل شىعىن قىسقا مەرزىمدە الدەنەشە ەسە ارتىعىمەن تازا تابىس بولىپ قۇيىلادى.
مۋلتفيلمدەر – بالالاردى قىزىقتىرىپ ۋاقىتىن وتكىزەتىن ءھام تانىمدىق تۇرعىدا جەتىلدىرەتىن تاربيەلىك قۇرال عانا ەمەس, نارىققا شىعاتىن كوركەم تاۋار سىندى. ەلىمىزدە قازاق ادەبيەتىندەگى اۆتورلىق جانە فولكلورلىق تۋىندىلاردىڭ جەلىسى بويىنشا جاسالعان مۋلتفيلم-دەر قازىرگى كۇنى ەداۋىر مولشەردە بارشىلىق. دەگەنمەن بۇگىنگى بالدىرعاندار وتاندىق مۋلتفيلمدەرگە قىزىعا ما؟ كەيىنگى ۋاقىتتا وقتىن-وقتىن اۋدارىلىپ جاتقان شەتەلدىك انيماتسيالىق فيلمدەردىڭ تاقىرىبى قانداي؟ جالپى, قازىرگى مۋلتفيلمدەردىڭ ساپاسى سىن كوتەرە مە؟ بيىلعى بالالار جىلىنىڭ باسىندا وسىنداي تولعامدى ماسەلەنى قوزعاۋدى ءجون كوردىك.
انيماتسيالىق مۋلتفيلمدەر – ۇلتتىق قۇندىلىقتاردى, سالت-ءداستۇر مەن تاريحتى كورسەتەتىن, جاس بالانىڭ ساناسىنا سىڭىرەتىن بىردەن-ءبىر يدەولوگيالىق قۇرال. ياعني بۇل قۇرال ارقىلى كەز كەلگەن تاقىرىپتى, كەز كەلگەن وبرازدى ناسيحاتتاۋعا بولادى. ءومىردى ەندى تانىپ جاتقان بالالارعا انيماتسيالىق فيلم ۇسىنۋدىڭ قاۋىپتى جاعى دا وسى. القيسسا.
قازاق ءمۋلتفيلمىنىڭ كلاسسيكاسى – «قارلىعاشتىڭ قۇيرىعى نەگە ايىر؟» كۇنى بۇگىنگە دەيىن كورەرمەننىڭ جۇرەگىندە ساقتالعان جىپ-جىلى ەستەلىكتەي نوستالگيالىق اسەر بەرەدى. 1967 جىلى تۇسىرىلگەن امەن قايداروۆتىڭ بۇل تۋىندىسى قازاق انيماتسياسىنىڭ باستاۋى بولدى. قارلىعاشتىڭ سيمۆولدىق ءمانىن اسقاقتاتقان فيلم كەلەسى جىلى-اق لەنينگرادتا وتكەن بۇكىلوداقتىق فەستيۆالدا ەكىنشى جۇلدەگە يە بولىپ, الەم ەلدەرىنىڭ ەكراندارىندا كورسەتىلدى. اۆتوردىڭ ودان كەيىن تۇسىرگەن «اقساق قۇلان», «قۇيىرشىق», «قوجاناسىر – قۇرىلىسشى» اتتى انيماتسيالىق فيلمدەرى دە قازاق مۋلتيپليكاتسياسىنا ولجا بولىپ قوسىلدى. وسى كەزەڭدە وتاندىق مۋلتيپليكاتورلار تۇسىرگەن گرافيكالىق جانە قۋىرشاق فيلمدەردىڭ سانى جۇزدەن استى. رەجيسسەر-سۋرەتشىلەر ج.دانەنوۆ پەن ۇ.قىستاۋوۆتىڭ «الپامىس باتىر», «ايداھار ارالى», ە.ءابدىراحمانوۆتىڭ «تاپقىشتار», «بوزتورعاي», ب.وماروۆتىڭ ء«ۇش شەبەر», «قاڭباق شال», ت.مۇقانوۆانىڭ «جىبەك شاشاق», «قايشى», ق.سەيدەنوۆتىڭ «تىگىنشى مەن اي», «قادىردىڭ باقىتى» اتتى مۋلتفيلمدەرى التىن قورعا قوسىلدى.
...ءبىر مينۋتى –
250 مىڭ تەڭگە
سوڭعى ون جىلدا بۇل سالا جانرلىق ەرەكشەلىك پەن جاس كورسەتكىشىنە قاراي كونتەنت ءوندىرۋ, ءتۇرلى تاقىرىپتىق باعىت پەن ستيلدەردى يگەرۋدە ايتارلىقتاي العا باستى. ال كەيىنگى جىلدارى وتاندىق انيماتورلار كوپشىلىككە «قوشقار مەن تەكە», «ەر توستىك جانە ايداھار», «مۇزبالاق», «قازاق ەلى» سياقتى ت.ب. كوپتەگەن تۋىندى ۇسىندى.
بۇگىندە بۇل مۋلتفيلمدەردىڭ دەنى «Balapan» تەلەارناسىنان كورسەتىلىپ ءجۇر. دەسەك تە بالالارعا ۇسىنىلىپ جاتقان بۇل جوبالار بەلگىلى ءبىر دەڭگەيدە ناتيجە كورسەتكەنىمەن, ەلىمىزدە تولىققاندى قازاقتىلدى كونتەنت قالىپتاستىرا الماي كەلەدى. ارينە, بۇعان اسەر ەتۋشى فاكتورلار كوپ.
«قازاقستان» رترك باسقارما توراعاسىنىڭ ورىنباسارى ماقپال جۇماباي قازاقستاننىڭ وزىندە ءبىر عانا بالالار ارناسى بولسا دا, ول الەمنىڭ الپاۋىت بالالار كانالدارىمەن باسەكەگە ءتۇسىپ وتىرعانىن ايتادى.
«الەمدىك ارنالاردى وزگە تىلدەردە سپۋتنيكتىك كانالداردان نەمەسە ينتەرنەتتەن تىكەلەي كورۋگە مۇمكىندىك بار. شەتەلدىك ارنالار ءار ۇيدە قولجەتىمدى. ياعني ءبىز قازىر جان-جاقتى باسەكەنىڭ ىشىندەمىز. ەل ىشىندە «بالالار شەتەل مۋلتفيلمدەرىن عانا كورەدى» دەگەن جاڭساق پىكىر بار. بىزدەگى زەرتتەۋلەر بۇنىڭ تەرىستىگىن كورسەتەدى. «Balapan» تەلەارناسىنداعى تانىمال شەتەلدىك ونىمنەن گورى بالالارىمىز كوپ جاعدايدا وتاندىق مۋلتفيلمدەردى تاڭدايدى. نەگە؟ سەبەبى بۇل كونتەنتتىڭ مازمۇنى دا, يدەياسى دا, كەيىپكەرلەرى دە – ۇلتتىق. بۇل مۋلتفيلمدەگى قالا دا, دالا دا – تانىس. انيماتسيا تۇيسىك ارقىلى قابىلداناتىن ونەر ءتۇرى بولعاندىقتان, بالالارىمىز بەيسانالى تۇردە ۇلتتىق كونتەنتتى تاڭدايدى. بۇل – قالىپتى قۇبىلىس. وسى سەبەپتەن دە ەلىمىزدەگى انيماتسيانىڭ اۋقىمىن ارتتىرىپ, ءوندىرىس كولەمى مەن قارجىسىن باسەكەگە لايىقتاۋ ماسەلەسى كۇن تارتىبىندە تۇرۋى كەرەك دەپ ەسەپتەيمىن. ءبىز بالالارىمىزدىڭ رۋحاني قاجەتىن تولىق وتەيتىن دارەجەگە جەتۋىمىز قاجەت», دەيدى م.جۇماباي.
سونداي-اق ول بۇگىنگى كۇنى ەلىمىزدەگى انيماتسيا ءوندىرىسىنىڭ نەگىزگى بولىگى – «Balapan» تەلەارناسىندا جۇزەگە اسىرىلعانىمەن, ارنانىڭ انيماتسيا ءتاريفى نارىقتاعى ەڭ تومەنگى باعا ەكەنىن ايتتى.
«Balapan»-داعى 2D انيماتسيانىڭ 1 مينۋتى 2021 جىلى 220 000-230 000تەڭگە بولسا, 3D فورماتتاعى انيماتسيانىڭ 1 مينۋتىنىڭ قۇنى 250 000-280 000 تەڭگە ارالىعىن قۇرادى. بۇل حالىقارالىق انيماتسيا نارىعىنداعى باعالارعا ساي كەلمەيدى. ماسەلەن, حرونومەتراجى 5 مينۋتتان تۇراتىن 3D فورماتتاعى وتاندىق مۋلتسەريالدىڭ ءبىر سەرياسى 1,4 ملن تەڭگە بولسا, تۋرا سول كولەمدەگى رەسەيلىك «ماشا ي مەدۆەد» 3D انيماتسيالىق سەريالىنىڭ 1 مينۋت وندىرىسىنە شامامەن 21 ملن تەڭگە, ال 1 سەرياسىنا 105 ملن تەڭگەگە جۋىق قارجى جۇمسالادى. وسى ورايدا بالالار ارناسىن ساپالىق ءارى مازمۇندىق تۇرعىدا دامىتۋ ءۇشىن قارجىلاندىرۋ كولەمىن ارتتىرۋ كەرەگى انىق», دەدى ول.
ايتا كەتەيىك, وسىعان دەيىن «Balapan» تەلەارناسى 2248 بولىمنەن تۇراتىن جالپى سانى 103 انيماتسيالىق جوبا دايىندادى. بۇل كورسەتكىش ونىڭ ەلىمىزدەگى انيماتسيالىق جوبالارعا تۇراقتى تاپسىرىس بەرەتىن بىردەن-ءبىر ارناعا اينالىپ, وسى سالاداعى مامانداردىڭ ءوسىپ, دامۋىنا ىقپال ەتىپ وتىرعانىن بايقاتادى. ماسەلەن, 2018 جىلى – 11, 2019 جىلى – 14, 2020 جىلى – 23, 2021 جىلى 26 انيماتسيالىق جوبا جاسالىپ, ەفيرگە بەرىلدى. ال جىل سايىن شەتەلدەن 30-35 انيماتسيالىق سەريال, 10 تولىقمەترلى مۋلتفيلم ساتىپ الىنادى. شەتەلدىك انيماتسيالىق جوبالار جالپى ەفير كورسەتىلىمىنىڭ 40 پايىزىن قۇراپ وتىر. سونداي-اق بالالار ارناسىنىڭ 5 انيماتسيالىق جوباسى اقش-تا كابەلدىك ارنالار, ال لاتىن امەريكاسى ەلدەرىندە VOD جانە ونلاين-كانالدار ارقىلى كورسەتىلەدى. ەندى «تىنىمسىز شوجەلەر», ء«سابي», «ەركەلەر», «شاحمات پاتشالىعى» (بۇل مۋلتحيكايا تاتارستان تەلەارناسىنا ساتىلعان), «پىراقتار» جوبالارىن اتالعان ەلدەردە اعىلشىن, يسپان جانە پورتۋگال تىلدەرىندە كورۋ مۇمكىندىگى بار.
ء بارى باتىر, ءبارى الدار...
وتاندىق مۋلتفيلمدەرگە كەلگەندە قوعامدا ءتۇرلى سىني پىكىرلەر كوپ. ءبىر تاراپ انيماتسيالىق فيلمدەر تەك باتىرلىق ۇستانىمعا, ياعني ءبارى ءبىر ۇلكەن يدەياعا جەتەلەيدى دەپ ساناسا, ەندى ءبىر تاراپ قىز بالالاردىڭ ەلزانى («حولودنوە سەردتسە», Disney) ەرەكشە جاقسى كورەتىنى ەستەتيكالىق ساپالى ءارى جەڭىل دۇنيەلەردىڭ ازدىعىنان دەيدى. بالكي, شىنىندا دا قازاق انيماتسياسىندا بالدىرعان قىزداردى قىزىقتىراتىن كەيىپكەر-حانشايىمدار جاسالماي جۇرگەن بولار. بۇعان قوسا ۇلتتىق تاقىرىپتاردان بولەك تانىمدىق مۋلتفيلمدەردىڭ جەتىسپەيتىنى دە راس. القيسسا.
وتكەن 2018-2019 جىلدارى بۇل سالادا ەداۋىر قوزعالىستار بولدى. ماسەلەن, «مۇزبالاق», «كۇلتەگىن» سىندى تولىقمەترلى انيماتسيالىق فيلمدەر جاسالدى. ولار كينوتەاترلاردا كورسەتىلىپ, قوعامدا دا جاقسى پىكىرلەر ايتىلىپ جاتتى. ءتۇرلى حالىقارالىق فەستيۆالداردا جۇلدەگەر بولدى. ەسكە سالساق, قازاق انيماتسياسىنىڭ تۇڭعىش ءفيلمى – «قارلىعاشتىڭ قۇيرىعى نەگە ايىر؟» الەمنىڭ 48 ەلىندە قويىلىپ, ۇلكەن بايقاۋلاردا جەڭىمپاز اتاندى. العاشقى انيماتسيالىق ءفيلمنىڭ وسى جەتىستىگىن 52 جىلدان كەيىن «مۇزبالاق» قايتالاپ وتىر. الايدا ودان بەرى وسىنداي تولىقمەترلى جانە قوعامدا كوپ تالقىلانعان فيلم تۇسىرىلمەي كەلەدى. «مۇزبالاق» رەجيسسەرىنىڭ ءبىرى تۇردىبەك مايدان ونىڭ ءبىر سەبەبى, قازاق انيماتسياسى ءالى كۇنگە دەيىن ءبىر جۇيەگە قويىلماۋىندا دەيدى.
«ەلىمىزدە جاقسى انيماتسيالىق فيلمدەرمەن كوزگە تۇسكەن ازاماتتاردى ودان ءارى قولداپ, سول باعىتتا جاڭا جوبالارعا تارتىپ, مەملەكەتتىك تاپسىرىسپەن تاقىرىپتار بەرىپ, توقتاۋسىز جۇمىس جاسالمايدى. ال بىزدەگى قولىنان ءىس كەلەتىن ماماندار مينيسترلىكتەن جاۋاپ كۇتۋمەن ۋاقىتىن وتكىزەدى. ال نەگىزىنەن بالالاردى قىزىقتىراتىن قازاقتىلدى كونتەنتتەر بار. بىراق قۇمعا سىڭگەن سۋداي تىم از. مىسالى, الدار كوسە تۋرالى جۇزدەن اسا سەريال ءتۇسىرىلدى. ول قوعامدا تانىمال بولدى, ويتكەنى وتە اۋقىمدى جوبا ەدى. ال ونداعى يدەولوگيا مەن ءمۋلتفيلمنىڭ ساپاسى, كەيىپكەرلەرى ادامدى قىزىقتىراتىن دەڭگەيدە ەمەس. جالپى, انيماتسيادا جاقسى كەيىپكەردى الىپ, كاسىبي مامانداردى توپتاستىرىپ, جۇمىس جاساسا, بۇل ءونىمىن بەرەدى. ارينە, مۇندا ەڭ باستىسى ۇلتتىق يدەولوگيانى, ۇلتتىق مىنەزدى ءبىرىنشى ورىنعا قويۋ كەرەك. وندا ءومىردى ەندى تانىپ جاتقان بالانىڭ تىلىنە, تانىمىنا, ويىنا ساي سويلەم, ءىس-ارەكەت, وقيعا بولۋ كەرەك. وكىنىشتىسى, قازىر انيماتسيا سالاسىندا اۋەسقويلار كوبەيىپ بارادى. تەحنيكانىڭ قۇلاعىن ەكى بۇراۋدى بىلەتىن ازاماتتاردى وتىرعىزىپ, پەرسوناجى, كەيىپكەرى, كومپوزيتسياسى جوق شالا-جانسار دۇنيەنى الىپ شىعادى. بالالارعا ۇسىنىلىپ جاتقان وسىنداي ساپاسىز جوبالارعا ساراپتاما جاسايتىن, قوعامعا كورسەتىلۋىنە تىيىم سالىپ جاتقان تاعى ەشكىم جوق. ال انيماتسياداعى اۋدارمالاردىڭ ءجيى جاسالىپ, حالىققا قولجەتىمدى بولىپ جاتقانى قۋانتادى», دەيدى رەجيسسەر.
سونداي-اق ول قازىر كورەرمەننىڭ تالعامى بيىك, شەتەلدىك ءتۇرلى مۋلتفيلمدەردى كورەتىن حالىقتى ءوز وتاندىق تۋىندىمىزبەن تاڭعالدىرۋ دا وڭاي ەمەس ەكەنىنە توقتالدى.
«رۋحاني قازىنامىزدى انيماتسيالىق فيلمگە تاقىرىپ ەتەردە ونىڭ ساپالىق, جاڭا تەحنولوگيالىق جاعىن دا مىندەتتى تۇردە ەسكەرگەن ءجون. بالدىرعانداردىڭ نازارىنا دايىندالعان دۇنيەگە جالپى بالانىڭ پسيحولوگياسىنا قاتىستى بارلىق تاراپ قاتىسۋ كەرەك. پەداگوگتەر مەن پسيحولوگتەر, ءتىپتى بالالاردىڭ وزىنە كورسەتىپ, تالقىلاۋ ماڭىزدى. ءار مۋلتفيلم جاسالۋ بارىسىندا وسىنداي بىرنەشە دەڭگەيدەن ءوتىپ, تالدانىپ بارىپ جارىققا شىقسا, ونىڭ كورەرمەنگە ۇنايتىنى انىق. قاي سالادا بولسىن ەڭبەكتىڭ تەرى توگىلگەن جۇمىس كورىنىپ تۇرادى ەمەس پە... ال انيماتسيا رەجيسسەرلەرىنىڭ بۇگىنگى مەجەسى بيۋدجەتتى يگەرۋ ۋاقىتىمەن شەكتەلىپ تۇر», دەيدى ت.مايدان.
ءيا, بالا مۋلتفيلمنەن ەڭ الدىمەن كەيىپكەر ىزدەيدى. بۇگىنگى بالالاردىڭ قازاق انيماتسيالارىنا قىزىقپايتىنى دا كەيىپكەرى جوق بولعاندىقتان بولار. ءبارى باتىر, ءبارى الدار...
قىسقا ۋاقىت
ءھام شاعىن بيۋدجەت
ەلىمىزدە ەندى دامىپ كەلە جاتقان قازاق انيماتسياسىندا بىلىكتى ماماندار قانشالىقتى جەتكىلىكتى؟ كادر تاپشىلىعى ءار سالانىڭ العا باسۋىنا اسەر ەتەدى ەمەس پە... بۇل تۋرالى Anyzfilm كينوستۋدياسىنىڭ رەجيسسەرى تىلەك تولەۋعازى بىلاي دەپ پىكىر ءبىلدىردى.
«قازاق انيماتسياسى قازىرگى تاڭدا دامۋ دەڭگەيىندە. وعان جاڭا تەحنولوگيانى يگەرۋ, ونى وندىرىستىك جوبالارعا قولدانۋ, انيماتسيالىق شەبەرلىك, زاماناۋي ەففەكتىلەر سىندى كاسىبي فاكتورلار جەتىسپەيدى. بۇنىڭ ءبىر سەبەبى – كادر دايارلاۋ ماسەلەسى. نۇر-سۇلتان, الماتى, شىمكەنت قالالارىنداعى وقۋ ورىندارىندا وسى سالا بويىنشا قازىرگى جاڭا تەحنولوگيانى ۇيرەتپەيدى. بىلىكتى وقىتۋشىلار دا جوقتىڭ قاسى. مىسالى, ءبىز انيماتسيالىق ستۋديالارعا وقۋ ءبىتىرىپ كەلگەن ستۋدەنتتەردىڭ وندىرىستىك جۇمىستارعا دايىن ەمەس ەكەنىن بايقايمىز. سوندىقتان دا قازىرگى انيماتسيادا سۋرەتشى, ستسەناريست, انيماتور, رەجيسسەر تاپشى».
سونىمەن قاتار وتاندىق انيماتسياسىنىڭ بۇگىنگى دەرتى ۋاقىت ەكەن. «ياعني رەجيسسەرلەر از ۋاقىتتا سول جوبانى ايتەۋىر اياقتاپ شىعۋعا تىرىسادى. وعان اسەر ەتەتىن بيۋدجەتتى يگەرۋ سىندى فاكتورلار دا بار, ارينە. ماسەلەن, انيماتسيانىڭ شەتەلدەگى پراكتيكاسىندا ءبىر جوباعا كەم دەگەندە 3-4 جىل ۋاقىت بەرىلەدى. سونداي-اق ءبىر فيلمگە 500-دەن اسا مامان اتسالىسادى, قارجىلارى دا قوماقتى. ال قىسقا ۋاقىتتا شاعىن بيۋدجەتپەن جانە از مامان قانداي دەڭگەيدەگى مۋلتفيلم جاسايدى دەپ ويلايسىز؟.. دەگەنمەن وسىنداي جەتىسپەۋشىلىكتەرگە قاراماستان كەيىنگى 3-4 جىلدا قازاق انيماتسياسىندا ىلگەرىلەۋ بار. «Balapan» تەلەارناسىنان بەرىلىپ جاتقان مۋلتفيلمدەردىڭ سانى كوبەيۋدە. ودان بولەك باسقا ارنالاردا دا اۋدارما فيلمدەر بار. بۇل مۋلتفيلمدەردىڭ ۋاقىت وتە كەلە ساپاسى دا سانىنا ساي كەلەدى دەپ ويلايمىن», دەيدى ول.
ەسكە سالساق, «ۇلتتىق رۋحاني جاڭعىرۋ» ۇلتتىق جوباسىنىڭ «ەل رۋحى» دەپ اتالاتىن ەكىنشى باعىتىندا وتاندىق انيماتسيانى دامىتۋ مىندەتتەرى قاراستىرىلعان ەدى. وسىعان وراي بىلتىر مادەنيەت جانە سپورت مينيسترلىگى «قازاقفيلم» جانىنان قازاق انيماتسيا بىرلەستىگى قۇرىلىپ, 40-تان استام مۋلتفيلم مەن قازاقشا كومپيۋتەرلىك ويىندار جاساۋ جوسپارلانىپ وتىرعانىن, انيماتسيالىق مەكتەپتەردىڭ اشىلاتىنىن ايتقان بولاتىن. ياعني وسى جىلدان باستاپ, قازاق انيماتسياسى بولەك شىعارماشىلىق وداق بولىپ, ءوز الدىنا جوبالار جۇرگىزبەكشى.
«ەگەر بۇل شىنىندا ىسكە اساتىن بولسا, مۋلتفيلم جاساۋ جۇمىستارى توقتامايدى. ءوزىنىڭ بيۋدجەتى بولادى, ءوزىنىڭ بەس, ون جىلدىق جوسپارى بولادى. انيماتسيالىق فيلم جاساۋ توقتاماسا, وسى سالاداعى مامانداردىڭ دا قولى بوسامايدى, ىزدەنىستە جۇرەدى, بىلىكتىلىگى ارتادى. وسىلايشا, قازاق انيماتسياسىنىڭ جاڭا بەلەسى باستالادى دەپ ويلايمىن», دەيدى رەجيسسەر ت.تولەۋعازى.
بۇرىن جىلىنا 4-5 قىسقامەترلى انيماتسيالىق فيلم, ال 2-3 جىلدا ءبىر تولىقمەترلى فيلم جاسالاتىن. ياعني جۇمىستىڭ جيىلىگى تومەن ەدى. سول سەبەپتەن دە كوپتەگەن مامان باسقا سالاعا اۋىسىپ كەتىپ جاتتى. بۇل كادرلىق جۇيەنىڭ دە انيماتسيانىڭ دامۋىنا بەلگىلى ءبىر دەڭگەيدە اسەر ەتكەنىن كورسەتەدى. ال 2019 جىلدان بەرى قازاق انيماتسياسىنا كوپتە-گەن جاس مامان كەلىپ, جەكە ستۋديالار اشىپ, كۋرستار جۇرگىزگەنىن بايقاپ ءجۇرمىز. ولار قازىر ءتۇرلى دەڭگەيدەگى مۋلتفيلمدەر جاساپ جاتىر. بۇل دا – بۇگىنگى انيماتسيانىڭ جەتىستىگى. رەجيسسەر تىلەك تولەۋعازىنىڭ ايتۋىنشا, بىلتىر ۇلتتىق كينونى قولداۋ ورتالىعىنىڭ ىسكە قوسىلۋىمەن جاڭا جوبالار قولعا الىنعان.
«ونىڭ ءبىرازى وندىرىسكە قوسىلسا, ءبىرازى ءبىر توقتاپ, ءبىر جالعاسىپ, اياقتالماي كەلەدى. ءبىز وتكەن جىلى ۇلتتىق كينونى قولداۋ ورتالىعىنان ساق ءداۋىرىنىڭ وركەنيەتىن, قۇندىلىقتارىن كورسەتەتىن «التىن ادام» اتتى تولىقمەترلى ءمۋلتفيلمدى باستاعانبىز. وتكەن جىلدىڭ اياعىنا دەيىن دايىندىق كەزەڭىن بىتىردىك. وسى جىلدا ءۇش اي توقتايدى دەپ ايتىلدى. ساۋىردەن باستاپ ءوندىرىس كەزەڭىنە وتەمىز. جىل اياعىندا ءفيلمدى بىتىرەمىز دەپ جوسپارلاپ جاتىرمىز. بىراق بەرىلگەن ۋاقىت بىزگە ازدىق ەتەدى», دەيدى ول.
ايتا كەتەيىك, اتالعان كينوستۋديا ۇلتتىق كينونى قولداۋ ورتالىعىنان «التىن ادام», «ەركەتاي» تولىقمەترلى مۋلتفيلمدەرى مەن «كەنجە قىز» سەريالىن جانە «بەسىك جىرى» قىسقامەترلى ءمۋلتفيلمىن العان ەدى. بۇل جوبالاردىڭ ىشىندە «بەسىك جىرى» مەن «كەنجە قىز» وتكەن جىلى اياقتالسا, قالعان ەكى جوبا بيىل ۇسىنىلۋى كەرەك.
P.S. تاۋەلسىزدىك جىلدارى ەلىمىزدە كوركەم ءوندىرىس سالاسى (ادەبيەت, تەاتر, كينو, انيماتسيا) بەلگىلى ءبىر دەڭگەيدە ناتيجەسىزدىك كۇيىندە بولدى. ارينە, وتىز جىلداعى مادەنيەت پەن ونەردەگى جەتىستىكتەردى جوققا شىعارا المايمىز. دەسەك تە قازىر ەل رۋحانياتىنداعى ءار سالادا جۇيەسىزدىكتەن تۋىنداعان ۇلكەن ماسەلەلەردىڭ بارى انىق. بارلىعىنا كاسىبيلىك ءھام قارجىلىق قولداۋ جەتىسپەيدى. جوعارىدا قوزعاعان انيماتسيالىق فيلم تاقىرىبىندا دا ءتۇرلى نازار اۋدارارلىق, قولعا الارلىق ماسەلەلەر كورىندى. قازىرگىدەي وندىرىستىك-تەحنولوگيالىق سالا قارىشتاپ دامىعان ۋاقىتتا بالالارعا ساپالى دۇنيە كورسەتە الۋعا مۇمكىندىك كوپ. تەك قازاقتىلدى كونتەنتتىڭ قالىپتاسىپ, كەڭ تاراۋىنا قۇزىرلى ورگاندار كۇش سالسا بولعانى. ايتپەسە, الەم عارىشقا ادام ۇشىرىپ جاتقاندا مۋلتفيلم جاساۋ دەگەنىڭىز نە, ءتايىرى... ال بارىنەن بۇرىن انيماتسيا دەگەنىڭىز – بالا. بالا دەگەنىڭىز – بولاشاق. ءجيى ايتىلاتىن «ماڭگىلىك ەل» يدەياسى وسىدان باستالماي ما...