پارلامەنت ءماجىلىسىنىڭ وتىرىسىندا پرەزيدەنت قاسىم-جومارت توقاەۆ الەۋمەتتىك-ەكونوميكالىق سالالارداعى وزەكتى ماسەلەلەردى شەشۋ جونىندە ناقتى مىندەتتەر قويا وتىرىپ, تەحنيكالىق ءبىلىم بەرۋگە دە باسا نازار اۋدارۋ كەرەكتىگىن ايتقان.
وسى ورايدا وسكەمەندەگى د.سەرىكباەۆ اتىنداعى شىعىس قازاقستان تەحنيكالىق ۋنيۆەرسيتەتىنىڭ رەكتورى جاسۇلان شايماردانوۆ مەملەكەت باسشىسىنىڭ جاساعان مالىمدەمەسىنە قاتىستى ءوز پىكىرىن ءبىلدىردى.
– ەلىمىز ءۇشىن بۇل دا ءبىر سىن ساعات بولدى. كوپشىلىك مەملەكەت باسشىسىن ۇقشۇ اسكەرلەرىن ەلگە ەنگىزۋ تۋرالى شەشىم قابىلداعانىنا وڭ قاباق تانىتا قويمادى. بىراق, وسى قادام جاعدايدى باقىلاۋعا الىپ, وڭىرلەر مەن ءىرى قالالارداعى جاعدايدى تۇراقتاندىرۋعا مۇمكىندىك بەردى, – دەپ پرەزيدەنتتى قولدايتىنىن جەتكىزدى ج.شايماردانوۆ. – ءبىلىم بەرۋ سالاسىنا قاتىستى ايتقان ويلارى دا وتە ورىندى. اسىرەسە تەحنيكالىق ءبىلىم بەرۋدى نىعايتا ءتۇسۋ كەرەك دەگەنىنە ەلەڭ ەتە قالدىق. حالىق تىعىز ورنالاسقان وڭىرلەر ءۇشىن گرانت مولشەرىن ۇلعايتۋ كەرەك دەدى. ول دەگەنىمىز, ازاماتتاردىڭ بىلىمگە دەگەن ۇمتىلىسىن ارتتىرادى. مۇعالىمدەر تاپشى وڭىرلەرگە ۇزدىك پەداگوگتاردى تارتۋ كەرەكتىگىن دە باسا ايتتى. شىنىندا دا, قازىر ءبىز مەكتەپ وقۋشىلارىنىڭ فيزيكا-ماتەماتيكالىق دايىندىعى ناشار ەكەنىن سەزەمىز. تەحنيكالىق ءبىلىم بەرۋدىڭ باسىمدىعى سول, پرەزيدەنت ايتقانداي, ونەركاسىپ ينجەنەرلەرىنىڭ جاڭا بۋىنىن ءوسىرۋ, – دەيدى رەكتور.
قالاي دەسەك تە, ەلدىڭ ەكونوميكاسى, الەۋەتى, ءوندىرىسى دامۋى ءۇشىن تەحنوكرات ماماندار اۋاداي قاجەت. ونسىز ەلىمىزدىڭ ىلگەرىلەۋى ەكىتالاي. ال تەحنيكالىق ۋنيۆەرسيتەت سول باعىتتا جۇمىس ىستەپ كەلە جاتقان وبلىستاعى ىرگەلى وقۋ ورىن. پرەزيدەنت ق.توقاەۆتىڭ ايتۋىنشا, جاقىن ارادا رەسەيدىڭ وزىق تەحنيكالىق جوعارى وقۋ ورىندارىنىڭ فيليالدارىن ەلىمىزدە اشۋ جوسپارلانۋدا. 2025 جىلعا قاراي قازاقستاندا بەدەلدى شەتەلدىك ۋنيۆەرسيتەتتەردىڭ كەمىندە 5 فيليالىن اشۋدى كوزدەپ وتىر. ونىڭ ەكى فيليالى تەحنيكالىق باعىتتا.
– بۇعان دەيىن رەسپۋبليكادا جاساقتالعان دەلەگاتسيامىز رەسەي فەدەراتسياسىنىڭ ۇزدىك تەحنيكالىق ۋنيۆەرسيتەتتەرىندە بولىپ قايتقانى تۋرالى جازعان ەدىك. وندا قازاقستان مەن رەسەي فەدەراتسياسى اراسىنداعى ستراتەگيالىق ارىپتەستىكتىڭ ءتۇرلى اسپەكتىلەرىن تالقىلاپ, ءوزارا ءىس-قيمىل جولدارىن بەلگىلەدىك, بەلگىلەنگەن جوسپارلار بويىنشا جۇمىستى ۇيىمداستىرۋ ءۇشىن جۇمىس توبىن قۇرۋ تۋرالى شەشىم قابىلدادىق. رەسەي ۋنيۆەرسيتەتتەرى ينجەنەرلىك كادرلاردى دايارلاۋعا كومەكتەسۋگە دايىن. ايتار بولسام, ءبىزدىڭ جوعارى وقۋ ورنىمىز ماسكەۋ ينجەنەرلىك-فيزيكالىق ينستيتۋتى, ۇلتتىق يادرولىق زەرتتەۋ ۋنيۆەرسيتەتىمەن بىرنەشە جىلدان بەرى ىنتىماقتاستىقتا جۇمىس ىستەپ كەلەدى. 2017 جىلدان باستاپ ءبىزدىڭ ستۋدەنتتەر جوو بازاسىندا پراكتيكادان وتەدى, – دەپ بۇرىن دا اتقارىلعان جۇمىستارعا توقتالىپ ءوتتى.
ەندى پرەزيدەنتتىڭ ۇسىنىسىنان كەيىن تەحنيكالىق ۋنيۆەرسيتەت جۇمىسى قايتا سەرپىلىپ, تىڭ جوبالاردى قولعا الادى, جاڭا باعىتتا جۇمىس ىستەي باستايدى. كاسىبي كادرلاردى دايىنداپ, ەل الەۋەتىنىڭ ارتۋىنا ەداۋىر سەپتىگىن تيگىزەرى دە انىق.