ەلوردادا جەدەل جاردەم قىزمەتىنە دەگەن سۇرانىستىڭ ەداۋىر ارتقانى بايقالدى. جەدەل جاردەم قىزمەتىنە كۇنىنە 2500 شاقىرتۋ تۇسۋدە. بۇل تۋرالى نۇر-سۇلتان قالاسى قوعامدىق دەنساۋلىق ساقتاۋ باسقارماسى باسشىسىنىڭ ورىنباسارى ءاليا رۇستەموۆا ايتتى, دەپ جازادى Egemen.kz.
«ەلورداداعى ەپيدەمولوگيالىق جاعدايدىڭ ناشارلاۋىنا جاڭا جىلداعى قىدىرىس پەن كارانتين تالاپتارىنىڭ ساقتالماۋى سەبەپ بولىپ وتىر. وسىعان بايلانىستى قازىرگى ۋاقىتتا جەدەل جاردەم مەن ءموبيلدى بريگادالاردىڭ قىزمەتىنە جۇگىنۋ كورسەتكىشى 2 ەسەگە ارتتى. بۇل كۇنىنە 2500 شاقىرتۋ كەلىپ تۇسەتىنىن بىلدىرەدى. ءموبيلدى بريگادا بولسا تاۋلىگىنە 1000-1200 شاقىرتۋ الىپ وتىر. بۇگىندە ەلوردادا 5 مىڭنان استام پاتسيەنت امبۋلاتوريالىق ەم الىپ جاتىر», دەدى ءاليا رۇستەموۆا قالا اكىمدىگىندە ونلاين وتكەن ءباسپاسوز ءماسليحاتى اياسىندا.
دەنساۋلىق ساقتاۋ باسقارماسى باسشىسىنىڭ ورىنباسارى ەلوردا تۇرعىندارىن كارانتين تالاپتارىن ساقتاۋعا جانە ىندەتكە قارسى ۆاكتسينا الۋعا شاقىردى.
«كوروناۆيرۋسپەن كۇرەستە ۆاكتسينانىڭ ءتيىمدى ەكەنىن الەمدىك تاجىريبە كورسەتىپ وتىر. ىندەتتى ەڭسەرۋدىڭ جالعىز عانا جولى بار. ول - ساقتانۋ جانە ەكپە الۋ», دەپ قوستى ول.