ەلوردانىڭ باس سانيتارلىق دارىگەرى سارحات بەيسەنوۆا اكىمدىكتە وتكەن بريفينگتە سوڭعى 30 كۇندە كوروناۆيرۋستىڭ «وميكرون-شتاممى» تىركەلگەن ەلدەردەن قالاعا 2247 جولاۋشى كەلگەنىن ايتتى, دەپ حابارلايدى Egemen.kz.
سارحات بەيسەنوۆا قالا بيلىگى شەتەلدەن كەلگەن ادامدار اراسىندا پروفيلاكتيكالىق جۇمىستار جۇرگىزىلىپ جاتقانىن ايتتى. ونىڭ ايتۋىنشا, 2021 جىلدىڭ 12 جەلتوقسانى مەن وسى جىلدىڭ 12 قاڭتارى ارالىعىندا قالاعا «وميكرون» تىركەلگەن ەلدەردەن 2247 جولاۋشى كەلگەن.
«شەتەلدەن ورالعان بارلىق ازاماتتار ءبىر اپتالىق ءوزىن-ءوزى وقشاۋلاۋ مەن مەديتسينالىق باقىلاۋعا جىبەرىلدى. دەسە دە, ولاردىڭ اراسىندا كۆي-مەن اۋىراتىن ناۋقاستار انىقتالعان جوق. بىراق كەيىنىرەك ولاردىڭ بىرىنەن وميكرون كوروناۆيرۋسىنىڭ جاڭا شتاممى انىقتالدى – ول ەلورداعا 16 جەلتوقساندا پتر تەستىنىڭ تەرىس ناتيجەسىمەن كەلگەن. بىراق ول 22 جەلتوقساندا مەديتسينالىق كومەككە جۇگىنىپ, پتر تەستى وڭ ناتيجە كورسەتتى. جۇرگىزىلگەن مولەكۋلالىق-گەنەتيكالىق زەرتتەۋلەردىڭ ناتيجەلەرى بويىنشا ءبىر سىنامادا «وميكرون» شتاممى انىقتالدى. ايتا كەتسەك, ناۋقاس بۇرىن قايتا ۆاكتسيناتسيالانعان, ناتيجەسىندە اۋرۋ جەڭىل تۇردە ءوتىپ, قازىرگى ۋاقىتتا ول تولىق ەمدەلدى», دەدى سارحات بەيسەنوۆا.
ەلوردانىڭ باس سانيتارلىق دارىگەرى كوروناۆيرۋستىڭ جاڭا «وميكرون-شتاممى» تەز تارالاتىنىن جانە ول الەمنىڭ 126 ەلىندە, ءتىپتى ۇجىمدىق يممۋنيتەتتىڭ جوعارى دەڭگەيى تىركەلگەن ەلدەردە دە انىقتالعانىن اتاپ ءوتتى.