بۇل تۋرالى ۇكىمەت وتىرىسىندا ۇلتتىق ەكونوميكا ءمينيسترى الىبەك قۋانتىروۆ ايتتى, دەپ حابارلايدى Egemen.kz.
ونىڭ اتاپ وتۋىنشە, حالىقتىڭ تابىسىن ارتتىرۋ باعدارلاماسىن قالىپتاستىرۋ ءۇشىن مەملەكەتتىك ورگاندارمەن ينفلياتسيانى تەجەۋ, جۇمىسپەن قامتۋدى قامتاماسىز ەتۋ, ازاماتتاردىڭ جەكەلەگەن ساناتارىنا جالاقىنى ارتتىرۋ جانە باسقا دا ءىس-شارالاردى قامتيتىن ماسەلەلەردى پىسىقتاۋ ۇسىنىلادى.
«بيزنەسكە جۇكتەمەنى تۇبەگەيلى تومەندەتۋ ماسەلەسىندە كاسىپكەرلىك قىزمەت سالاسىندا جاڭا رەتتەۋشىلىك ساياساتتى ەنگىزۋ ماسەلەلەرى بويىنشا زاڭدى ىسكە اسىرۋ اياسىندا مەملەكەتتىك رەتتەۋدىڭ بۇكىل ءماسسيۆىن تولىق قايتا قاراۋ جۇرگىزىلەتىن بولادى», دەدى مينيستر.
الىبەك قۋانتىروۆ بيۋدجەتتىڭ كىرىس بولىگىن نىعايتۋ ءۇشىن بىرىنشىدەن, تاۋ-كەن سەكتورىنان قوسىمشا تۇسىمدەر الۋ كوزدەلەتىندىگىن ايتادى.
«باعا كونيۋنكتۋراسىنا بايلانىستىرا وتىرىپ, بارلىق قاتتى پايدالى قازبالار بويىنشا پايدالى قازبالاردى وندىرۋگە سالىناتىن سالىقتىڭ قوسىمشا مولشەرىن ەسەپتەۋ تەتىگىن بەلگىلەۋ ۇسىنىلادى. ەكىنشىدەن, مۇناي ونىمدەرىن وندىرۋشىلەر مەن جەتكىزۋشىلەر تىزبەگىنەن مارجانىڭ ءبىر بولىگىن الۋ», دەدى ول.
مينيستر ينۆەستيتسيالىق تارتىمدىلىقتى قالپىنا كەلتىرۋ ءۇشىن وسى جىلدىڭ اقپان ايىندا 2025 جىلعا دەيىنگى ينۆەستيتسيالىق ساياسات تۇجىرىمداماسىن قابىلداۋ جوسپارلانىپ وتىرعاندىعىن اتاپ ءوتتى.
«ونىڭ اياسىندا ينۆەستيتسيالار تارتۋ ساياساتى ESG, جاھاندىق ەنەرگەتيكالىق جانە تەحنولوگيالىق كوشۋ تالاپتارىن ەسكەرە وتىرىپ, قايتا قارالاتىن بولادى», دەدى الىبەك قۋانتىروۆ.