شىمكەنت قالاسىندا سوڭعى اپتادا كوروناۆيرۋس ينفەكتسياسى اۋرۋىنا شالدىققاندار سانى كۇرت كوبەيگەن. ماسەلەن, وتكەن تاۋلىكتە ىندەت جۇقتىرۋدىڭ 141 جاعدايى تىركەلگەن. ەپيدەميولوگيالىق احۋال كورسەتكىشى بويىنشا بۇگىن قالا «قىزىل» ايماققا ءوتتى, دەپ حابارلايدى Egemen.kz شىمكەنت قالاسى اكىمىنىڭ ءباسپاسوز قىزمەتىنە سىلتەمە جاساپ.
Covid-19 ينفەكتسياسىنىڭ الدىن الۋ بويىنشا بۇگىن قالا اكىمى مۇرات ايتەنوۆتىڭ توراعالىمەن شتاب وتىرىسى ءوتتى. جيىندا دەنساۋلىق ساقتاۋ باسقارماسىنىڭ باسشىسى ب.پازيلوۆ ەپيدەميولوگيالىق جاعداي ورشىگەن كەزدە ينفەكتسيالىق توسەك ورىندار سانى بەس مىڭعا دەيىن كوبەيتىلەتىنىن ايتتى. سونىمەن بىرگە ەكى ايلىق دارىلىك قور مەن مەديتسينالىق ۇيىمدار ءۇش ايلىق قاجەتتى جابدىقتارمەن قامتىلعانىن باياندادى.
«بۇگىنگى كۇنى قالادا ينفەكتسيالىق 253 توسەك ورىن بار. توسەك ورىن تولىمدىعى 66%-دى قۇرايدى, 86 توسەك ورىن بوس. بۇگىندە ينفەكتسيالىق ستاتسيوناردا 167 ناۋقاس ەمدەلۋدە, جان ساقتاۋ بولىمىندە 59 توسەك ورنى بار, وندا 13 ناۋقاس ەم قابىلداۋدا», دەدى باسقارما باسشىسى.
شىمكەنت قالاسىنىڭ باسشىسى ەپيدەميولوگيالىق جاعدايدىڭ كۇردەلەنە تۇسۋىنە بايلانىستى بارلىق سانيتارلىق تالاپتاردى قاتاڭ ساقتاۋعا جانە مونيتورينگتىك توپتاردىڭ جۇمىسىن كۇشەيتۋدى تاپسىردى.
جيىن سوڭىندا قالا اكىمى تۇرعىنداردى كوروناۆيرۋستىق ينفەكتسيانىڭ تارالۋىنا جول بەرمەۋ ماقساتىندا بارلىق ۇسىنىلعان شارالاردى ساقتاۋعا جانە ۆاكتسينا الماعان ازاماتتاردى ەكپە الۋعا شاقىردى.