قالا اكىمى مۇرات ايتەنوۆتىڭ توراعالىعىمەن اپپاراتتىق ءماجىلىس ءوتتى. وندا سالالىق باسقارما باسشىلارى وسى جىلعا جوسپارلانعان الەۋمەتتىك جانە تۇرعىن ءۇي قۇرىلىستارى مەن جول, ينجەنەرلىك-ينفراقۇرىلىم سالۋ جۇمىستارى كەستەگە ساي جۇرگىزىلىپ جاتقانىن اتاپ ءوتتى, دەپ جازادى Egemen.kz.
قالا باسشىسى توتەنشە جاعداي رەجيمىن ساقتاي وتىرىپ, جوسپارلانعان قۇرىلىس جۇمىستارىنىڭ توقتاپ قالماۋى ءۇشىن سالا ماماندارىنا قۇرىلىسشىلارعا قاجەتتى كومەك كورسەتۋدى تاپسىردى. سونىمەن بىرگە, بارلىق كوممۋنالدىق جانە قىزمەت كورسەتۋ كاسىپورىندارىنىڭ قالىپتى رەجيمدە جۇمىس ىستەۋىن قاداعالاۋدى ايتتى.
بۇگىندە مەگاپوليستەگى بارلىق نىساندار شتاتتىق رەجيمدە جۇمىس ىستەۋدە.
شىمكەنت قالاسىندا جاعداي تۇراقتى. توتەنشە جاعداي رەجيمى قاتاڭ باقىلاۋدا.
قالا بيلىگى شىمكەنت تۇرعىندارى مەن قوناقتارىن توتەنشە جاعداي كەزىندە زاڭ بۇزۋشىلىقتارعا جول بەرمەۋگە جانە كوممەندانتتىق ءتارتىپتى ساقتاۋعا شاقىرادى.