شىمكەنت قالاسىنا جاسالعان لاڭكەستىك جانە جاپپاي بۇزاقىلىق ارەكەتتەرگە بايلانىستى قالا اكىمى مۇرات ايتەنوۆتىڭ باسشىلىعىمەن ارنايى شتاب قۇرىلدى, دەپ حابارلايدى Egemen.kz شىمكەنت قالاسى اكىمدىگىنىڭ ءباسپاسوز قىزمەتىنە سىلتەمە جاساپ.
قالا اكىمىنىڭ باسقارۋىندا بارلىق قۇقىق قورعاۋ ورگاندارىنىڭ باسشىلارىن قامتىعان شتابتىڭ دەر كەزىندە شىعارعان شەشىمدەرى مەن ءىس-ارەكەتتەرىنىڭ ناتيجەسىندە مەگاپوليستەگى ەشقانداي ستراتەگيالىق ماڭىزى بار نىسان لاڭكەستەردىڭ يەلىگىنە وتپەگەن.
سوڭعى ەكى كۇندە سودىرلاردىڭ نەگىزگى ماقساتى قالا اكىمدىگىن باسىپ الۋ بولعان-دى. دەگەنمەن «تۇركىستان» سارايى, «كورمە» ورتالىعى (تولىعىمەن), ج. شانين اتىنداعى دراما تەاترىنا ءار ءتۇرلى دەڭگەيدە زيان كەلتىردى.
ودان بولەك, «مەترو» ساۋدا ورتالىعىنا باسىپ كىرىپ, بارلىق سپيرتتىك ىشىمدىكتەر مەن ەنەرگەتيكالىق سۋسىنداردى الىپ كەتكەن. ساۋدا ورتالىعىنىڭ ءىشىن قيراتىپ, ەكى جەردە ءورت شىعارۋ ارەكەتىنە بارعان جانە بانكوماتتار تونالعان.
سول كۇندەرى لاڭكەستەر كوپتەگەن پوليتسيا اۆتوكولىگى مەن قوعامدىق اۆتوبۋستاردى جاعىپ جىبەردى.
قازىرگى تاڭدا قالادا جاعداي تۇراقتى جانە باقىلاۋدا. تۇرعىنداردىڭ تىنىس-تىرشىلىگى ءۇشىن كەرەكتى بارلىق قۇرىلىمدار ءوز جۇمىسىن تولىققاندى اتقارۋدا.
قالا اكىمى زارداپ شەككەن نىسانداردىڭ بارلىعىن ارالاپ, ماتەريالدىق شىعىنداردى انىقتاۋ ءۇشىن قۇرىلعان ارنايى كوميسسياعا ناقتى تاپسىرمالار بەردى. الداعى 10 كۇن ىشىندە جالپى شىعىن مولشەرى انىقتالاتىنىن اتاپ ءوتتى.
«قالامىزداعى قاۋىپسىزدىك پەن تىنىس-تىرشىلىك ءۇشىن كەرەكتى بارلىق جۇمىستار باقىلاۋىمدا. قالاداعى قوعامدىق كولىكتەر مەن بيزنەس نىساندارى شتاتتىق رەجيمدە جۇمىس جاساۋدا. انتيتەررور ءىس-شاراسى جۇرگىزىلىپ جاتقاندىقتان, قالا تۇرعىندارىن بارىنشا ۇيدەن شىقپاۋعا جانە بالالاردى قاراۋسىز قالدىرماۋعا شاقىرامىن. جاستارىمىز ءتۇرلى ارانداتۋشىلىققا جول بەرمەي, سابىرلىق تانىتۋى كەرەك. قالا تۇرعىندارى مەن قوناقتارىن كوممەندانتتىق ءتارتىپتى ساقتاۋعا شاقىرامىن», دەدى مۇرات ايتەنوۆ.