نۇر-سۇلتان قالاسىنىڭ پوليتسيا دەپارتامەنتى قاردىڭ تولاسسىز جاۋىنا بايلانىستى كولىك يەلەرىنە ۇندەۋ جولدادى, دەپ حابارلايدى Egemen.kz.
دەپارتامەنتتىڭ ءباسپاسوز قىزمەتى تاراتقان مالىمەت بويىنشا, وتكەن تاۋلىكتە ەلوردا اۋماعىندا 53 جول-كولىك وقيعاسى تىركەلىپ, ەكى ادام زارداپ شەككەن.
«جۇرگىزۋشىلەردەن جول بويىندا كولىك قويماۋ كەرەكتىگىن, سول ارقىلى قوعامدىق كولىكتىڭ قوزعالىسى مەن قار كۇرەيتىن تەحنيكاسىنىڭ جۇمىسىنا كەدەرگى كەلتىرمەۋ قاجەتتىگىن ەسكەرتەمىز. قار كۇرەۋ جۇمىستارى تاۋلىك بويى ۇيىمداستىرىلىپ جاتىر. جول قوزعالىسى ەرەجەلەرىن, جىلدامدىق رەجيمىن جانە قاۋىپسىز ارا قاشىقتى قاتاڭ ساقتاڭىزدار», دەپ جازىلعان پوليتسيانىڭ ۇندەۋىندە.
ساقشىلار, جۇرگىزۋشىلەرگە باراتىن باعىتىن الدىن الا جوسپارلاپ, كەنەت باقسا جولاققا اۋىسپاۋدى جانە تەجەگىشتى كەنەت باسپاۋدى, قالا سىرتىنا ساپاردان باس تارتۋعا كەڭەس بەرەدى.
«جاياۋ جۇرگىنشىلەرگە وتە مۇقيات بولۋ كەرەك. جولدان وتكەن كەزدە گادجەتكە ۇڭىلمەي, قۇلاققاپتى شەشىپ, جاقىنداپ كەلە جاتقان كولىكتىڭ جوقتىعىنا كوز جەتكىزۋ كەرەك. قولايسىز اۋا رايىندا ساقتىق شارالارى جول-كولىك وقيعالارىنىڭ سانىن ەداۋىر ازايتۋعا كومەكتەسەدى.
سونداي-اق, تۇرعىن ءۇي كەشەندەرىنە قىزمەت كورسەتەتىن كومپانيالاردىڭ وكىلدەرى اۋلاداعى قاردى ۋاقىتىلى تازالاۋدى ۇيىمداستىرۋى قاجەت. ءتارتىپ ساقشىلارى جول-كولىك وقيعالارىنا جول بەرمەۋ ءۇشىن بارلىق قاجەتتى شارالاردى قابىلدايدى, قيىن جاعدايعا تاپ بولعان جۇرگىزۋشىلەرگە بارىنشا كومەكتەسەدى, سونداي-اق قوعامدىق ءتارتىپ پەن قالا تۇرعىندارىنىڭ قاۋىپسىزدىگىن قامتاماسىز ەتەدى», دەلىنگەن ۇندەۋدە.