پاۆلودار وبلىسىندا سىرتقى جەلىلەردى تارتۋ جانە تۇرعىن ءۇي كەشەنىن اباتتاندىرۋ جۇمىستارى كەزىندە قارجى جىمقىرىلعانى انىقتالدى, دەپ حابارلايدى Egemen.kz.
بۇل تۋرالى قارجىلىق مونيتورينگ اگەنتتىگىنىڭ ءباسپاسوز قىزمەتى ءمالىم ەتتى.
قارجىلىق مونيتورينگ اگەنتتىگىنىڭ مالىمەتىنشە, پاۆلودار وبلىسى بويىنشا اۋماقتىق دەپارتامەنت قىزمەتكەرلەرى پاۆلودار قالاسىنداعى «سارىارقا» تۇرعىن ءۇي كەشەنىنە سىرتقى جەلىلەردى تارتۋ جانە اباتتاندىرۋ كەزىندە, سونداي-اق لەنينسك قالاسىنداعى دەنە شىنىقتىرۋ-ساۋىقتىرۋ كەشەنىن سالۋ كەزىندە قاراجى جىمقىرىلعانىن انىقتاعان.
«ا. احمەتوۆ بيۋدجەت قاراجاتىن جىمقىرۋ ماقساتىندا 2016-2017 جىلدارى «ازياسپەتسستروي» جشس, «مان-قوجا» جشس جانە «رەپەر-سك» جشس-نى الىپ, ولاردى باسقا تۇلعالار اتىنا تىركەپ, كەيىن وسى كاسىپورىندار اتىنان مەملەكەتتىك ساتىپ الۋعا قاتىسقان. احمەتوۆ الدىن الا ءسوز بايلاسۋ ارقىلى بەكەەۆپەن, كۇلتۇمانوۆپەن, ساعىناەۆپەن جانە عابباسوۆپەن مەملەكەتتىك ساتىپ الۋ تۋرالى شارتتار بويىنشا ورىندالعان جۇمىستاردىڭ ءىس جۇزىندە ورىندالماعان اكتىسىنە قول قويىپ, وسىلايشا مەملەكەتكە جالپى سوماسى 59 ميلليون تەڭگەدەن اسا زالال كەلتىرىلدى», دەلىنگەن حابارلامادا.
ءباسپاسوز قىزمەتى مالىمەتىنشە, احمەتوۆ سەگىز جىلعا, بەكەەۆ ءۇش جىلعا, كۇلتۇمانوۆ, ساعىناەۆ جانە عابباسوۆ ەكى جىلدان ءۇش جىلعا دەيىن باس بوستاندىعىن شەكتەۋگە سوتتالعان.