2022 جىلى ەرەكشە ءبىلىم بەرىلۋىنە قاجەتتىلىگى بار تالاپكەرلەردىڭ ۇبت تاپسىرۋى جەڭىلدەتىلەدى, سونداي-اق ولارعا تەستىلەۋدەن ءوتۋ ءۇشىن قوسىمشا ۋاقىت بەرىلەدى. بۇل تۋرالى قر ءبىلىم جانە عىلىم مينيسترلىگىندە حابارلادى, دەپ جازادى Egemen.kz.
ءبىلىم جانە عىلىم ءمينيسترى اسحات ايماعامبەتوۆتىڭ تاپسىرماسى بويىنشا ۇلتتىق تەستىلەۋ ورتالىعى ەرەكشە قاجەتتىلىكتەرى بار تالاپكەرلەر ۇبت-نى نەعۇرلىم قولايلى جاعدايلاردا ءوتۋى ءۇشىن بىرقاتار شارالار قابىلدايتىن بولادى.
وسىلايشا, كەلەسى جىلى كورۋ, ەستۋ, تىرەك-قيمىل اپپاراتىنىڭ فۋنكتسيالارى بۇزىلعان وقۋعا تۇسۋشىلەر نەگىزگى 240 مينۋتتان باسقا, تەستىلەۋ تاپسىرمالارىن ورىنداۋ ءۇشىن تاعى 40 مينۋت الادى. ياعني, ولار ۇبت-نى باسقالارعا قاراعاندا ۇزاعىراق: 4 ساعات 40 مينۋت ىشىندە تاپسىرا الادى.
ء«بىز ءۇشىن جۇمىستاعى ەڭ باستى باعدار - تالاپكەرلەردىڭ مۇددەلەرى. ءبىز قازىردىڭ وزىندە ۇبت-نى جىلىنا بىرنەشە رەت وتكىزىپ جاتىرمىز جانە تالاپكەرلەردىڭ, ونىڭ ىشىندە ەرەكشە ءبىلىم بەرۋ قاجەتتىلىكتەرى بار تالاپكەرلەردىڭ تەستىلەۋدى ىڭعايلى تاپسىرۋى ءۇشىن جاعداي جاساۋدى جالعاستىرۋدامىز. ولار ءۇشىن ۇبت تاپسىرۋ ۋاقىتى تاعى 40 مينۋتقا ۇزارتىلادى», دەدى قر بعم ۇلتتىق تەستىلەۋ ورتالىعىنىڭ ديرەكتورى رۋسلان ەمەلباەۆ.
ونىڭ ايتۋىنشا, ەرەكشە قاجەتتىلىكتەرى بار تالاپكەرلەرگە ارنالعان تاپسىرمالاردىڭ مازمۇنىنا دا وزگەرىستەر ەنگىزىلەدى.
«ولار ءۇشىن سىزبالارسىز, دياگراممالارسىز تەست نۇسقالارى جاسالدى. بۇعان دەيىن بىزگە ءبىلىم جانە عىلىم ءمينيسترى اسحات ايماعامبەتوۆ وسىنداي تاپسىرما بەرگەن بولاتىن. بۇل وزگەرىستەر ولار ءۇشىن ۇبت-دان ءوتۋدى ايتارلىقتاي جەڭىلدەتەدى», دەپ قوستى رۋسلان ەمەلباەۆ.
ءبىلىم مينيسترلىگىنىڭ حابارلاۋىنشا, 2022 جىلى ۇبت «1 كومپيۋتەر – 2 كامەرا – 1 تەستىلەنۋشى» قاعيداتى بويىنشا وتكىزىلەدى.
«جۇمىس ورنىندا نەگىزگى كامەرادان باسقا, تەستىلەنۋشىنىڭ دىبىسىن جانە قيمىلدارىن جازۋ ءۇشىن قوسىمشا الدىڭعى ۆەب-كامەرا ورناتىلادى. فرونتالدى ۆەب-كامەرا وقۋعا ءتۇسۋشىنىڭ جەكە باسىن سايكەستەندىرۋگە جانە ۇبت كەزىندە ادامداردىڭ اۋىستىرىلۋىن بولدىرماۋعا مۇمكىندىك بەرەدى. سونداي-اق بۇل ەمتيحان تاپسىرۋ بارىسىنا باقىلاۋ جۇرگىزۋ جانە تەستىلەۋدىڭ اشىقتىعىن قامتاماسىز ەتۋ ءۇشىن قاجەت», دەيدى قر بعم ءباسپاسوز قىزمەتى.
ۆەدومستۆودا ۇبت-2022 اياقتالعاننان كەيىن كۇنتىزبەلىك جىلدىڭ سوڭىنا دەيىن بەينەجازبالارعا تالداۋ جۇرگىزىلەتىنىن ءتۇسىندىردى.
«تىيىم سالىنعان زاتتاردى پايدالانۋ نەمەسە باسقا دا بۇزۋشىلىقتار فاكتىلەرى انىقتالعان جاعدايدا, وقۋعا ءتۇسۋشىنىڭ ۇبت ناتيجەلەرى جويىلادى», دەپ قوستى ۆەدومستۆونىڭ ءاسپاسوز قىزمەتى.