قازاقستان رەسپۋبليكاسى پرەمەر-ءمينيسترىنىڭ ءبىرىنشى ورىنباسارى ءاليحان سمايىلوۆ جولاۋشىلار اۆتوموبيل تاسىمالى سالاسىن سۋبسيديالاۋ ماسەلەلەرى جونىندە كەڭەس وتكىزدى, دەپ جازادى Egemen.kz ۇكىمەتتىڭ ءباسپاسوز قىزمەتىنە سىلتەمە جاساپ.
جيىن بارىسىندا «اتامەكەن» ۇكپ وكىلدەرى كاسىپكەرلەر كوتەرگەن بىرقاتار ماسەلەلەردى ورتاعا سالدى.
اتاپ ايتقاندا, كولىك تاسىمالى سالاسىن سۋبسيديالاۋ جانە توزىعى جەتكەن اۆتوبۋستاردىڭ ماسەلەلەرى ءسوز بولدى. بيىلعى جىلى اكىمدىكتەر قالالىق مارشرۋتتاردى سۋبسيديالاۋعا 2020 جىلمەن سالىستىرعاندا 75 پايىزعا ارتىق قاراجات ءبولدى.
پرەمەر-ءمينيستردىڭ ورىنباسارى ءتيىستى مينيسترلىككە توقسان سايىن اكىمدىكتەردىڭ قالالىق جولاۋشىلار كولىگىن دامىتۋ جونىندەگى ءىس-شارالار كەشەنىن جانە سۋبسيديالاۋدى قامتاماسىز ەتۋ بويىنشا قولدانىستاعى زاڭنامانى ىسكە اسىرۋدى تەكسەرۋ جۇمىسىن جالعاستىرۋدى تاپسىردى. بيىلعى جىلدىڭ قىركۇيەگىندە قازاقستان رەسپۋبليكاسىندا اۆتوموبيل كولىگىمەن حالىقارالىق جۇك تاسىمالداۋدى دامىتۋدىڭ جول كارتاسى قابىلدانعان بولاتىن. وسى قۇجات اياسىندا جۇك تاسىمالداۋشىلارىن قولداۋ شارالارى قالاي جۇزەگە اسىپ جاتقانى ايتىلدى. سونىڭ ناتيجەسىندە, ۋاكىلەتتى ورگانعا جول كارتاسىنا ەنگىزۋ ءۇشىن قوسىمشا بيزنەس-ۇسىنىستار ازىرلەۋ جۇكتەلدى.
سونىمەن بىرگە, حالىقارالىق اۆتوموبيل كولىگى وپەراتورلارىن 2025 جىلعا دەيىن جۇك كولىگى تارتقىشى ءۇشىن تولەنەتىن باستاپقى تىركەۋ جارناسىنان بوساتۋ ماسەلەسى كوتەرىلدى. 2020 جىلدىڭ 2 شىلدەسىنەن باستاپ 2021 جىلدىڭ 1 قاڭتارىنا دەيىن حالىقارالىق جۇك تاسىمالى ءۇشىن ساتىپ الىنعان جۇك كولىگى تارتقىشى باستاپقى تىركەۋ جارناسىنانان بوساتىلدى. بۇل شارانى 2025 جىلعا دەيىن جاڭارتۋ جوسپارلانۋدا. زاڭ جوباسىنا بۇل تۇزەتۋ كەلەسى جىلدىڭ باسىندا ەنگىزىلەدى.
ەسكە سالايىق, پايدالانۋ مەرزىمى 3 جىلدان 5 جىلعا دەيىنگى جۇك كولىگى تارتقىشتارى ءۇشىن باستاپقى تىركەۋ جارناسى 350 اەك قۇرايدى. 2020 جىلدىڭ قازان ايىنان باستاپ بيىلعى جىلدىڭ جەلتوقسان ايىنا دەيىنگى كەزەڭدە ءا.سمايىلوۆتىڭ توراعالىعىمەن بيزنەستىڭ پروبلەمالىق ماسەلەلەرىن قاراۋ بويىنشا 33 وتىرىس وتكىزىلدى.
«اتامەكەن» ۇكپ جانە بيزنەس وكىلدەرىمەن بىرگە ۇكىمەت 160-تان استام پروبلەمالىق ماسەلەنى قارادى.