ەۋروپالىق وداققا مۇشە 27 ەل كوروناۆيرۋسقا قارسى 1 ملرد-تان استام تسيفرلىق قاۋىپسىزدىك سەرتيفيكاتىن شىعاردى. بۇل ساندى ەۋروپالىق كوميسسيانىڭ باسشىسى ۋرسۋلا فون دەر ليايەن ايتىپ ءوتتى, دەپ حابارلايدى Egemen.kz.
«ەۋروپالىق وداق سەرتيفيكاتى – 60 ەل مەن ايماقتى قامتيتىن الەمدىك ستاندارت. بۇل ەو جانە ونىڭ سىرتىندا قاۋىپسىز ساياحاتتاۋعا مۇمكىندىك بەرەدى», دەدى ۋ.ليايەن Twitter جەلىسى ارقىلى.
سەيسەنبى كۇنى ەۋروكوميسسيا Covid-19 ۆيرۋسىنا قارسى ۆاكتسينانىڭ تسيفرلىق سەرتيفيكاتى 270 كۇنگە (9 اي) جارامدى بولاتىنىن قاراستىراتىن ەرەجەلەردى بەكىتتى. قاتىسۋشى ەلدەر كوۆيد-سەرتيفيكاتتارى يەلەرىنىڭ بۇكىل وداق اۋماعىندا ەركىن ساياحاتتاۋى ءۇشىن بۇعان ىڭعايلانۋى ءتيىس.
سەرتيفكات جارامدىلىعىنىڭ مەرزىمى ەۋروپا اۋرۋلاردىڭ الدىن الۋ جانە قاداعالاۋ ورتالىعى ۇسىنعان كەڭەستەر نەگىزىندە ورناتىلعان. ادام COVID-19 ۆيرۋسىنا قارسى ۆاكتسينالاۋدىڭ باستاپقى كۋرسى اياقتالعاننان كەيىن التى اي وتكەن سوڭ ۆاكتسينانىڭ بۋستەرلىك دوزاسىن الۋى ءتيىس. بۇل مەرزىمگە تاعى ءۇش اي قوسىلعان. جاڭا ءتارتىپ 2022 جىلدىڭ 1 اقپانىنان باستاپ كۇشىنە ەنەدى. 9 ايلىق مەرزىم سوڭعى دوزانى العاننان باستاپ ەسەپتەلەدى.
تسيفرلىق كوۆيد-سەرتيفيكاتىنىڭ توعىز ايلىق مەرزىمى قاتارداعى ەۋروپالىقتارعا سەنىمدى ساياحاتتاۋعا ارنالعان. قازىرگى كەزدە ەو-عا مۇشە ەلدەردىڭ مىندەتى – ادامدارعا ۆاكتسينانىڭ «بۋستەرلىك» دوزاسىن الۋ مۇمكىندىگىن جەدەل قامتاماسىز ەتۋ.
تسيفرلىق قاۋىپسىزدىك سەرتيفيكاتى – ادام كوروناۆيرۋسقا قارسى ەكپە العانىن, اۋرۋدان جازىلعانىن نەمەسە پتر تەرىس ناتيجەسىن كورسەتەتىن قۇجات.