ورتالىق كوممۋنيكاتسيالار قىزمەتى الاڭىندا وتكەن بريفينگتە ءىىم قىلمىستىق-اتقارۋ جۇيەسى كوميتەتىنىڭ توراعاسى جانات ەشماعامبەتوۆ ەلىمىزدە 4 تۇرمە سالۋ جوسپارلانىپ وتىرعانىن ايتتى, دەپ جازادى Egemen.kz.
«قاماۋدا ۇستاۋ جاعدايلارىن جاقسارتۋ ءۇشىن ىشكى ىستەر مينيسترلىگىنىڭ قىلمىستىق-اتقارۋ جۇيەسىنىڭ ينفراقۇرىلىمىن جاڭعىرتۋدىڭ جول كارتاسى ازىرلەنىپ, بەكىتىلدى. وندا مەملەكەتتىك-جەكەمەنشىك ارىپتەستىك اياسىندا بارلىق حالىقارالىق ستاندارتقا سايكەس كەلەتىن 20 جاڭا مەكەمەنىڭ قۇرىلىسى قاراستىرىلعان», دەدى كوميتەت باسشىسى.
ونىڭ سوزىنشە, 2022-2024 جىلدار ارالىعىندا الماتى, اقتوبە, ماڭعىستاۋ جانە تۇركىستان وبلىستارىندا 4 عيمارات سالۋ جوسپارلانىپ وتىر.
«قولدانىستاعى عيماراتتار مەن قۇرىلىستار وتكەن عاسىردىڭ 30-70 جىلدارىندا سالىنعان. ولاردىڭ كوپشىلىگى توزىعى جەتكەن جانە اپاتتى جاعدايدا, قىلمىستىق زاڭنامانىڭ قاتاڭداتىلۋىنا بايلانىستى 2020 جىلدان باستاپ تۇرمەدەگىلەر سانىنىڭ ءوسۋى بايقالادى», دەدى جانات ەشماعامبەتوۆ.