پارلامەنت ءماجىلىسىنىڭ جالپى وتىرىسىندا «قازاقستان رەسپۋبليكاسى مەن رەسەي فەدەراتسياسى اراسىنداعى اسكەري ىنتىماقتاستىق تۋرالى شارتتى راتيفيكاتسيالاۋ تۋرالى» زاڭ جوباسى ماقۇلداندى, دەپ حابارلايدى Egemen.kz.
اتالعان شارت 2020 جىلعى 16 قازاندا نۇر-سۇلتان قالاسىندا جاسالدى. بۇل قۇجات راتيفيكاتسيالانعاننان كەيىن 1994 جىلعى 28 ناۋرىزداعى قازاقستان رەسپۋبليكاسى مەن رەسەي فەدەراتسياسى اراسىنداعى اسكەري ىنتىماقتاستىق تۋرالى قولدانىستاعى شارت ءوز كۇشىن جويادى.
«شارتقا ەكى مەملەكەت اراسىنداعى اسكەري ىنتىماقتاستىقتى جانداندىرىپ, ونى ودان ءارى دامىتۋ ماقساتىندا قول قويىلعانىن اتاپ وتكەن ءجون. بۇل رەتتە 1994 جىلعى جاسالعان شارتتىڭ ەرەجەلەرى ۋاقىت بولمىسىنا قاراي ەسكىرگەن, سونداي-اق ولار ىسكە اسىرىلعان. قۇجاتتى راتيفيكاتسيالاۋ قاۋىپسىزدىكتى قامتاماسىز ەتۋ مۇددەسىندە اسكەرلەردى (كۇشتەردى) قولدانۋدى بىرلەسىپ جوسپارلاۋ جانە وڭىرلىك قاۋىپسىزدىككە تونەتىن سىن-قاتەرگە بىرلەسىپ قارسى ارەكەت ەتۋ, سونداي-اق حالىقارالىق ۇيىم, مادەنيەت, سپورت اياسىندا ءوزارا ارەكەتتەسۋ جانە باسقا باعىتتاردا اسكەري ىنتىماقتاستىق جاساۋعا مۇمكىندىك بەرەدى. رەسەي قازاقستاننىڭ ستراتەگيالىق ارىپتەسى», دەدى قورعانىس ءمينيسترىنىڭ ورىنباسارى دارىن تۇياقوۆ.
ونىڭ ايتۋىنشا, شارتتى راتيفيكاتسيالاۋ مەملەكەتتەردىڭ قورعانىس قابىلەتىن نىعايتۋ, قازىرگى زامانعى سىن-قاتەرلەرگە قارسى ءىس-قيمىل جاساۋ بويىنشا ۇيلەسىمدى ارەكەت ەتۋدى ۇيىمداستىرۋ باعىتىندا بىرلەسىپ جۇمىس ىستەۋگە قوسىمشا سەرپىن بەرەدى.