قر دەنساۋلىق ساقتاۋ ءمينيسترىنىڭ مىندەتىن اتقارۋشى جاندوس بۇركىتباەۆ الەمدەگى جانە قازاقستانداعى ەپيدەميولوگيالىق جاعدايدى باياندادى, دەپ حابارلايدى Egemen.kz.
«الەمدە 275 ميلليوننان استام كوروناۆيرۋس جۇقتىرۋ جاعدايى تىركەلگەن. تاۋلىگىنە 500 مىڭنان استام جاعداي تىركەلىپ, 5,3 ميلليوننان استام ادام قايتىس بولدى. دۇنيەجۇزىلىك دەنساۋلىق ساقتاۋ ۇيىمىنىڭ ەۋروپالىق بولىگىندە 54 ەلدىڭ 15-دە سوڭعى اپتادا سىرقاتتانۋشىلىقتىڭ ارتقانى بايقالدى. سوڭعى 14 كۇندە دانيادا سىرقاتتانۋ 70 پايىزدان اسقان, يتاليادا, شۆەتسيادا – 50 پايىزدان, فرانتسيا, ۇلىبريتانيادا – 40 پايىزدان استام وسكەن, نوۆەرگيا مەن پورتۋگاليادا – 30 پايىزدان استام ءوستى», دەدى جاندوس بۇركىتباەۆ ۇكىمەتتىڭ بۇگىنگى وتىرىسىندا.
ونىڭ ايتۋىنشا, قازاقستاندا سوڭعى اپتادا سىرقاتتانۋ 31 پايىزعا تومەندەدى. الەمدىك رەيتينگتە قازاقستان كۆي-گە قارسى ەكى دوزامەن ۆاكتسينالاۋ بويىنشا 208 ەلدىڭ ىشىندە 103-ورىندا. ونىڭ ىشىندە تمد ەلدەرى اراسىندا قازاقستان ەكىنشى ورىندا تۇر, حالىق سانىنىڭ 44,5 پايىزى ۆاكتسينامەن قامتىلعان.
«رەسپۋبليكادا پتر تەستتىڭ وڭ ناتيجەسىمەن 984 مىڭعا جۋىق جاعداي جانە تەرىس ناتيجەسىمەن 83 مىڭعا جۋىق جاعداي تىركەلگەن. ناۋقاستاردىڭ 96 پايىزدان استامى جازىلىپ شىقتى. 18 852 ناۋقاس ەمدەلۋدى جالعاستىرىپ جاتىر. جالپى قازاقستاندا سوڭعى 4 ايدا سىرقاتتانۋ 6 ەسە تومەندەدى, رەپرودۋكتيۆتى سانى – 0,9 جانە تامىز ايىمەن سالىستىرعاندا 1,2 ەسە تومەندەگەنى بايقالادى», دەدى ج. بۇركىتباەۆ.