الداعى جىلى تەڭىز كەنىشىندەگى جوبادان 39 مىڭ جۇمىس ورنى قىسقارادى, دەپ جازادى Egemen.kz.
وبلىستىق جۇمىسپەن قامتۋدى ۇيلەستىرۋ جانە الەۋمەتتىك باعدارلامالار باسقارماسى باسشىسىنىڭ ورىنباسارى ەركەبۇلان ابىلقاسىموۆتىڭ مالىمەتىنشە, تەڭىز كەن ورنىنداعى «كەلەشەك كەڭەيۋ» جوباسىنىڭ اياقتالۋىنا بايلانىستى 39 مىڭ جۇمىس ورنىن قىسقارتۋ جوسپارلانىپ وتىر.
«بۇل جوبادا جۇمىس ىستەيتىندەردىڭ جارتىسىنا جۋىعى – جەرگىلىكتى تۇرعىندار. 2022 جىلدىڭ ءبىرىنشى توقسانىندا 7 مىڭ ادام قىسقارادى. جۇمىستان قىسقارعان ادامداردى مەملەكەتتىك باعدارلامالارعا تارتۋ جوسپارى بار. مەملەكەتتىك باعدارلامالار ارقىلى 12 مىڭعا جۋىق ادامدى جۇمىسپەن قامتۋ جوسپارلانىپ وتىر. مۇناي-حيميا كەشەنى سالاسىندا اتقارىلاتىن ينۆەستيتسيالىق جوبالاردىڭ قۇرىلىس جۇمىستارىنا 20 مىڭعا جۋىق حالىقتى جۇمىسپەن قامتىلادى», دەدى ەركەبۇلان ابىلقاسىموۆ
وسىعان وراي «تەڭىزشەۆرويل» جشس-ءنىڭ ءباسپاسوز قىزمەتى تۇسىنىك بەردى.
«قازىر تەڭىز كەنىشىندەگى كەلەشەك كەڭەيۋ جانە ۇڭعى ەرنەۋىندەگى قىسىمدى باسقارۋ جوباسىن (ككج-ۇەقبج) جۇزەگە اسىرۋ جالعاسىپ جاتىر. وسى كەزگە دەيىن جوبا جۇمىستارىنىڭ 87%-ى اياقتالدى. بەكىتىلگەن جوسپارعا سايكەس جوبادان بوساتىلعان جۇمىس كۇشىن كەزەڭ-كەزەڭىمەن شىعارۋ كۇتىلىپ وتىر. وسىعان بايلانىستى «تەڭىزشەۆرويل» جشس اتىراۋ وبلىسىنىڭ اكىمدىگىمەن, ەنەرگەتيكا جانە ەڭبەك جانە حالىقتى الەۋمەتتىك قورعاۋ مينيسترلىكتەرىمەن بىرلەسىپ ككج-ۇەقب جوباسىنا تارتىلعان قىزمەتكەرلەردىڭ جوسپارلى بوساتىلۋىنا مونيتورينگ جۇرگىزىپ جاتىر. كومپانيا اتالعان جوبانى ىسكە اسىرۋ كەزىندە سۇرانىسقا يە جۇمىسشى ماماندىعىن يگەرۋ ءۇشىن 19 مىڭنان استام ادامدى وقىتۋعا جانە قايتا وقىتۋعا ينۆەستيتسيا سالدى. ەندى ولار قازاقستاندا جانە شەتەلدەردەگى باسقا ونەركاسىپتىك جوبالاردا تاجىريبەسى مەن ءبىلىمىن قولدانا الادى», دەپ ءمالىم ەتتى كومپانيانىڭ ءباسپاسوز قىزمەتىنەن.