قر يندۋستريا جانە ينفراقۇرىلىمدىق دامۋ ءمينيسترى بەيبىت اتامقۇلوۆ سەناتور كريستيان-اۋگۋستين نيكۋلەسكۋ-تسىگىرلاش باستاعان رۋمىنيا پارلامەنتى دەپۋتاتتارىن قابىلدادى, دەپ جازادى Egemen.kz.
مينيستر رۋمىنيا پارلامەنتشىلەرىن ەكسپورتتىق جانە يمپورتتىق وپەراتسيالار كەزىندەگى كولىك جانە لوگيستيكا, ونەركاسىپ جانە ماشينا جاساۋ سالالارىنداعى ىنتىماقتاستىق پەرسپەكتيۆالارىمەن, سونداي-اق ينۆەستورلارعا ۇسىنىلاتىن مۇمكىندىكتەرمەن تانىستىردى. كەزدەسۋگە قاتىسۋشىلار سونداي-اق تىكەلەي جۇك جانە جولاۋشىلار اۋە باعىتتارىن اشۋ جايىن تالقىلادى.
كەلىسسوزدەر قورىتىندىسىندا تاراپتار سىندارلى ديالوگ ءۇشىن ريزاشىلىقتارىن ءبىلدىرىپ, قازاقستان مەن رۋمىنيا اراسىنداعى قارىم-قاتىناستى دامىتۋدىڭ ماڭىزدىلىعىن اتاپ ءوتتى.
ايتا كەتەيىك, 2021 جىلدىڭ 10 ايىندا قازاقستان مەن رۋمىنيا اراسىنداعى تاۋار اينالىمى 39% ارتىپ, 1,4 ملرد اقش دوللارىن قۇرادى.
قازاقستاندا رۋمىن كاپيتالىنىڭ قاتىسۋمەن 24 كومپانيا تىركەلگەن. رۋمىنيادا قازاقستاندىق كاپيتالدىڭ قاتىسۋىمەن 17 زاڭدى تۇلعا جۇمىس ىستەيدى. رۋمىنيادان قازاقستان ەكونوميكاسىنا سالىنعان ينۆەستيتسيالار - 1,57 ملرد اقش دوللارىن (2005 جىلدان 2020 جىلعا دەيىن) قۇرادى.