IBF تۇجىرىمى بويىنشا ءبىرىنشى اۋىر سالماق دارەجەسىندەگى الەم چەمپيونى, لاتۆيالىق كاسىپقوي بوكسشى مايريس بريەديس بلوگەر دجەيك پولمەن شارشى الاڭدا كەزدەسكىسى كەلەتىنىن تۇسپالداپ جەتكىزدى, دەپ حابارلايدى Egemen.kz.
امەريكالىق بلوگەر بىرنەشە كۇن بۇرىن UFC-ءدىڭ بۇرىنعى چەمپيونى تايرون ءۆۋدليدى نوكاۋتپەن جەڭگەن بولاتىن. بۇعان دەيىن دە بىرنەشە مارتە شارشى الاڭعا كوتەرىلگەن دجەيكتىڭ يۋتۋبتا تانىمال ەكەنى بەلگىلى. ونىڭ ءاربىر جەكپە-جەگى – ۇلكەن تابىستىڭ كەپىلى.
سپورت شوۋعا اينالعان ۋاقىتتا كاسىپقوي بوكسشىلار دا اقشا تابۋ جولىندا ايانىپ قالمايتىن سەكىلدى. سونىڭ ءبىر دالەلى – تالاي مىقتى بوكسشىنىڭ مىسىن باسقان مايريس بريەديستىڭ دجەيك پولمەن كەزدەسكىسى كەلەتىندىگى. ول بلوگەردىڭ نوكاۋتى جاريالانعان بەينەجازبانىڭ استىنا: «مەنىمەن وتەتىن جەكپە-جەك الدىنداعى تاماشا باستاما» دەگەن پىكىر قالدىردى.
جالپى مايريس بريەديس شارشى الاڭدا ۋكراينالىق الەكساندر ۋسيككە ەڭ تەگەۋرىندى قارسىلىق كورسەتكەن بوكسشى ەكەنى ءمالىم. تەك سول ۋسيككە از عانا ۇپاي ايىرماسىمەن ەسە جىبەردى دەمەسەڭىز, مايريس قالعان 28 قارسىلاسىن ايقىن باسىمدىلىقپەن جەڭگەن. ناعىز كاسىپقوي سپورتشىنىڭ قوماقتى تابىستى جەڭىل جولمەن تابۋعا تىرىسۋى ەشقانداي جاڭالىق ەمەس. فلويد مەيۆەزەر باستاپ بەرگەن جول باسقالارعا «جۇعىستى» بولعان سياقتى.