قازاقستاننىڭ تاۋەلسىزدىك العانىنا 30 جىل تولىپ وتىر. وسىعان وراي ۇيىمداستىرىلعان مەرەكەلىك شارادا ساياساتكەرلەر مەن حالىقارالىق ساراپشىلار ەل استاناسىنا جينالدى.
«كوشباسشىلىق. تۇراقتىلىق. پروگرەسس» اتتى كونفەرەنتسيادا تاۋەلسىز قازاقستانداعى مەملەكەتتىك قۇرىلىس تاجىريبەسى مەن رەسپۋبليكانىڭ وسى ۋاقىت ارالىعىنداعى جەتىستىكتەرى تالقىلاندى. تاۋەلسىزدىكتىڭ وتىز جىلى تۇراقتى ەكونوميكالىق پروگرەسس داۋىرىنە اينالدى.
بىرىككەن ۇلتتار ۇيىمىنىڭ «ەلەكتروندى ۇكىمەت» بويىنشا سوڭعى ساۋالداماسىندا قازاقستان ەلەكتروندى ۇكىمەتتى دامىتۋ بويىنشا 29-شى, ال ونلاين قىزمەتتەردىڭ ساپاسى بويىنشا 11-ورىنعا تۇراقتادى. زەرتتەۋ ەكى جىل سايىن جۇرگىزىلەدى. وندا بۇۇ-عا مۇشە 193 مەملەكەتكە ساراپتاما جۇرگىزىلەدى. بۇل اقپاراتتىق تەحنولوگيا دامۋىنىڭ نەگىزگى كورسەتكىشى.
بۇگىندە قازاقستان تسيفرلاندىرۋ باعدارلاماسىنىڭ جاڭا كەزەڭىن باستان وتكەرىپ جاتىر. تسيفرلىق دامۋ, يننوۆاتسيالار جانە اەروعارىش ونەركاسىبى مينيسترلىگى مەملەكەتتىك قىزمەت كورسەتۋدىڭ كوپ پلاتفورمالى مودەلىن قۇرۋدى ماقسات ەتكەن. وندا ادامدار ءارتۇرلى تسيفرلى پلاتفورمالار مەن قوسىمشالار ارقىلى مەملەكەتپەن بايلانىسا الادى.
قازىر قازاقستاندا مەملەكەتتىك قىزمەتتەردىڭ 90 پايىزدان استامى تسيفرلى تۇردە قولجەتىمدى, ونى 11 ميلليونعا جۋىق ادام پايدالانادى. دەگەنمەن بۇدان ارعى تابىس جوعارى ساپالى IT كادرلارىنىڭ جەتكىلىكتى بولۋىنا بايلانىستى.
نازارباەۆ ۋنيۆەرسيتەتتە جاساندى ينتەللەكت پەن روبوتتەحنيكا بويىنشا جۇمىستار قارقىندى ءجۇرىپ جاتىر. جاس عالىمدار قوسىمشالار مەن الگوريتمدەر جازادى, روبوتتاردى وقىتادى جانە ۆيرتۋالدى شىندىقتى زەرتتەيدى.
تاۋەلسىزدىك جىلدارىندا قازاقستانعا 325 ميلليارد ەۋرو تىكەلەي شەتەلدىك ينۆەستيتسيا تارتىلدى. بۇل قازاقستان ەكونوميكاسىنا ورتالىق ازياداعى جانە پوستكەڭەستىك كەڭىستىكتەگى ەڭ سەرپىندى ەكونوميكالاردىڭ ءبىرى بولىپ قالۋعا مۇمكىندىك بەردى.