ازەربايجان پرەزيدەنتى يلحام اليەۆ قازاقستان پرەزيدەنتى قاسىم-جومارت توقاەۆقا تاۋەلسىزدىكتىڭ 30 جىلدىق مەرەيتويىنا وراي قۇتتىقتاۋ حات جولدادى.
«قازاقستان رەسپۋبليكاسى تاۋەلسىزدىگىنىڭ 30 جىلدىعىنا وراي ءوز اتىمنان جانە ازەربايجان حالقىنىڭ اتىنان ءسىزدى جانە حالقىڭىزدى شىن جۇرەكتەن قۇتتىقتايمىن, ىزگى تىلەگىمدى جولدايمىن.
تاۋەلسىزدىك جىلدارىنداعى تاريحي سىناقتاردى ابىرويمەن ەڭسەرە وتىرىپ, قازاقستان بارلىق سالادا قارقىندى دامۋ جولىنان ءوتىپ, ۇلكەن جەتىستىكتەرگە جەتىپ, حالىقارالىق ارەنادا جوعارى بەدەلگە يە بولدى. ازەربايجان رەسپۋبليكاسى باۋىرلاس ەلدىڭ تابىستارىنا شىن جۇرەكتەن قۋانادى», دەلىنگەن قۇتتىقتاۋ حاتتا.
ي.اليەۆ حالىقتارىمىزدى تاريحي تامىرى تەرەڭ دوستىق بايلانىستىراتىنىنا توقتالعان. قازىرگى تاڭدا وسى يگى داستۇرلەرگە نەگىزدەلگەن مەملەكەتارالىق قارىم-قاتىناسىمىز تابىستى دامىپ كەلەدى.
«ازەربايجان مەن قازاقستان اراسىنداعى دوستىق, جەمىستى ىنتىماقتاستىق جانە ستراتەگيالىق سەرىكتەستىك قارىم-قاتىناستارى حالىقتارىمىزدىڭ مۇددەسى ءۇشىن ودان ءارى دامىپ, كەڭەيە بەرەتىنىنە سەنىمدىمىن. وسى اتاۋلى كۇنى سىزگە زور دەنساۋلىق پەن باقىت, ال باۋىرلاس قازاقستان حالقىنا اماندىق پەن گۇلدەنۋ تىلەيمىن», دەلىنگەن قۇتتىقتاۋ حاتتا.