م.اۋەزوۆ اتىنداعى قازاق ۇلتتىق دراما تەاترى قازاقستان تاۋەلسىزدىگىنىڭ 30 جىلدىعىنا ارنالعان ءداستۇرلى «قاراشاڭىراق» اتتى جاڭا قويىلىمدار فەستيۆالىن وتكىزدى, دەپ حابارلايدى Egemen.kz.
فەستيۆالدىڭ ماقساتى – جاڭا قويىلىمداردىڭ شىعارماشىلىق ساپاسى, ونىڭ ىشىندە اكتەرلەردىڭ تابىستى جۇمىسىن انىقتاۋ. اكتەرلەرگە سەرپىن بەرىپ, كورەرمەن مەن تەاتر اراسىنداعى بايلانىستى نىعايتۋ.
«بۇرىن بۇل فەستيۆال «تەاتر كوكتەمى» دەپ اتالدى. بىراق فەستيۆالدىڭ اتى وزگەرسە دە, ءبىر جىلدا جاسالعان جۇمىستاردىڭ ناتيجەسىن شىعارۋ بولىپ تابىلاتىن ماقسات-ءمانى وزگەرمەك ەمەس. رەجيسسۋرا, اكتەرلىك ونەر, ستسەنوگرافياعا كوڭىل اۋدارىپ, بيىلعى فەستيۆالدى تاۋەلسىزدىكتىڭ 30 جىلدىعىنا ارناپ, ارنايى شارا رەتىندە وتكىزدىك. فەستيۆال اياسىندا كورەرمەن نازارىنا بەس سپەكتاكل ۇسىنىلدى, ولار: «ەكەۋمىز», «بارىمەن بازار», «وڭ قول», «تۋعان كۇن», «پەرى قاتىن» سپەكتاكلدەرى. شەدەۆر جاساپ تاستادىق دەگەننەن اۋلاقپىز, وسى سپەكتاكلدەردى ساحناعا دايىنداۋ بارىسىندا قانداي قاتەلىك ورىن الدى, جەتىستىگى نەدە دەگەن سۇراقتاردى سارالادىق. سول ءۇشىن ساراپشىلار القاسى شاقىرىلىپ, مامانداردىڭ پىكىرىنە قۇلاق تۇردىك» دەدى تەاتر ديرەكتورى ەركىن جۋاسبەك.
بۇقارالىق اقپارات قۇرالدارى وكىلدەرى قاتىسقان ءباسپاسوز ءماسليحاتىندا تەاتردىڭ كوركەمدىك جەتەكشىسى, كسرو حالىق ءارتىسى ءاسانالى ءاشىموۆ ماۋسىم ارالىعىندا ساحنالانعان سپەكتاكلدەردىڭ يدەيالىق مازمۇنى مەن كوركەمدىك قۇندىلىعىنا توقتالىپ, بۇگىنگى كورەرمەن تالعامىنان شىعاتىن, قوعام شىندىعىن قوزعاعان تاقىرىپتارعا باسا نازار اۋداراتىنىن اتاپ ءوتتى.
تەاتردىڭ شىعارماشىلىق باعىت-باعدارىن بەلگىلەۋدە ماڭىزى زور «قاراشاڭىراق» فەستيۆالىنىڭ بيىلعى ۇيىمداستىرىلۋىندا جاڭالىق مول. جەڭىمپازدار ءتۇرلى اتالىمدار بويىنشا جۇلدەگە يە بولدى. اتاپ ايتقاندا, بيىل العاش رەت «جەلتوقسان وقيعاسىنا – 35 جىل» اتالىمى ەنگىزىلىپ, دەموكراتيالىق جاڭارۋدىڭ باسى بولعان سول قاھارلى كۇندەردە الاڭداعى جاستار ىشىنەن تابىلىپ, جازالانىپ, كەيىن اقتالعان ەرلى-زايىپتى تەاتر ارتىستەرى ءۇسىپالى مەن گۇلنار سەيتىمبەتتەر 75 000 سىياقىعا يە بولدى.
ء«ۇمىت» جۇلدەسىمەن ادىلەت بازارباي مەن ينديرا قۇلماعانبەتوۆا, «كاسىبي جەتىستىگى ءۇشىن» عالىمبەك وسپانوۆ, مادينا كەلگەنباي, اسان ءماجيت, ءلايلا تىلەۋوۆانىڭ رولدەرى اتاپ ءوتىلدى.
«سەركە قوجامقۇلوۆ»» اتىنداعى جۇلدە تولەۋبەك ارالباي, ء«اشىرالى كەنجەەۆ» اتىنداعى جۇلدە جۇماعالي ماحانوۆ, «فاريدا ءشارىپوۆا» اتىنداعى جۇلدە نازگۇل قارابالينا, «راحيا قويشىباەۆا» اتىنداعى جۇلدە گۇلشات تۇتوۆا, «زامزاگۇل ءشارىپوۆا» اتىنداعى جۇلدە شىنار جانىسبەكوۆا, «مارفۋعا بايزاقوۆا» اتىنداعى جۇلدە نۇرجان بەكسۇلتان, «قايرات سۇگىربەكوۆ» اتىنداعى جۇلدە ەلىك نۇرسۇلتانعا تابىستالدى. ال بيىلعى فەستيۆالدەگى «ۇزدىك ەر ادام بەينەسىن» باۋىرجان قاپتاعاي مەن «ۇزدىك ايەل ادام بەينەسىن» داناگۇل تەمىرسۇلتانوۆا يەلەندى. جەڭىمپازداردىڭ بارلىعى ارنايى ديپلوم مەن قارجىلاي سىيلىققا يە بولدى.
بۇدان وزگە تەاتر ونەرى مەن شىعارماشىلىق ەڭبەكتى كەڭىنەن ناسيحاتتاپ, اقپاراتتىق قولداۋ كورسەتكەن باق وكىلدەرىنە دە سەرتيفيكاتتار تابىستالدى.
الماتى