الماتىدا قالالىق پوليتسيا دەپارتامەنتىنە قاراستى ەمحانانىڭ باس دارىگەرى سىبايلاس جەمقورلىققا قاتىسى بار دەگەن كۇدىكپەن ۇستالدى. اقپاراتتى سىبايلاس جەمقورلىققا قارسى قىزمەت راستادى, دەپ حابارلايدى Egemen.kz.
الەۋمەتتىك جەلىدە الماتى پوليتسياسى ەمحاناسىن باسقاراتىن ءاليا سارماساەۆانىڭ تۋىستارىنىڭ ۆيدەوۇندەۋى تارادى. تۋىستارى مەن ادۆوكاتتىڭ ايتۋىنشا, ايەل بەس مىڭ تەڭگە كولەمىندە پارا الدى دەگەن كۇدىكپەن ۇستالعان. ايتۋلارىنشا كەڭسەنى ءتىنتۋ كەزىندە بۇل اقشا تابىلماعان.
«وكىنىشكە وراي, ءاليانىڭ كۇيەۋى قايتىس بولدى. ونىڭ ەكى قىزى بار, ءبىرى جاقىندا جۇمىسقا ورنالاسىپ, سىناق مەرزىمىندە ءجۇر, ەكىنشىسى ستۋدەنت. ەكەۋى دە ءبىلىم گرانتىنىڭ يەگەرى. ءاليانىڭ وتباسى جالدامالى پاتەردە تۇرادى, وعان تۋىستارى كومەكتەسەدى», دەلىنگەن ۆيدەودا.
ۆيدەودا كۇدىكتىنىڭ ادۆوكاتى ساۋلە كوپجانوۆا دا بار. ول ءاليا سارماساەۆانىڭ قاراماعىنداعى قىزمەتكەردىڭ ءوتىنىشى بويىنشا ۇستالعانىن ايتادى.
«قازىر سىبايلاس جەمقورلىققا قارسى كۇرەس ءجۇرىپ جاتىر, بىراق كەيبىر ايماقتاردا ول فارسقا اينالىپ جاتىر. بىرنەشە ميلليارد ۇرلاعانى ءۇشىن ۇستالعاندار ەشقايدا كەتپەۋ تۋرالى قولحاتپەن ءۇي قاماۋىندا وتىر. وكىنىشكە وراي, 36 جىلدىق تاجىريبەسى بار دارىگەرگە بەس مىڭ تەڭگە پارا الدى دەگەن ايىپ تاعىلىپ جاتىر, بىراق ول ءومىر بويى پاتەر ساتىپ الماعان. جەمقورلار ولاي ءومىر سۇرمەيدى. ال قاراپايىم دارىگەردى دەنساۋلىعىنا بايلانىستى ۋاقىتشا ەڭبەككە جارامسىزدىق پاراعىنا اقشا الدى دەگەن كۇدىكپەن قاماۋعا الدى. بىراق دەنساۋلىق ساقتاۋ ءمينيسترىنىڭ بۇيرىعىنا سايكەس ەمحانا مەڭگەرۋشىسى بۇل پاراقتاردى بەرمەيدى ەمەس پە؟», دەدى ادۆوكات.
الماتى قالاسىنىڭ سىبايلاس جەمقورلىققا قارسى قىزمەت مالىمەتىنشە, سارماساەۆاعا قاتىستى قىلمىستىق ءىس ۋاقىتشا ەڭبەككە جارامسىزدىق پاراعىن اشقانى, ۇزارتقانى, جاپقانى ءۇشىن بىرنەشە رەت پارا الۋ دەرەگى بويىنشا تەرگەلىپ جاتىر.
«الماتى پروكۋراتۋراسى كۇدىكتى دەپ تانۋ جانە ارەكەتتى سارالاۋ تۋرالى قاۋلىنى ماقۇلداعان. تەرگەۋ بارىسىندا سارماساەۆا قىلمىستىق پروتسەستىڭ قاتىسۋشىسىنا قىسىم كورسەتىپ, ءوزىن اشكەرەلەيتىن ايعاقتاردى وزگەرتۋدى تالاپ ەتكەن. وسىعان وراي سوت سارماساەۆاعا قاتىستى ەكى اي مەرزىمگە كۇزەتپەن ۇستاۋ تۇرىندە بۇلتارتپاۋ شاراسىن قولدانۋعا سانكتسيا بەردى», دەپ حابارلادى ۆەدومستۆو قىزمەتكەرى.
سونىمەن قاتار, ادۆوكات كوپجانوۆاعا قاتىستى «سوتقا دەيىنگى ءىس جۇرگىزۋ دەرەكتەرىن جاريا ەتكەنى ءۇشىن ءىس جۇرگىزۋ شەشىمى», قابىلداناتىنى ايتىلدى.