قر اقپارات جانە قوعامدىق دامۋ مينيسترلىگىنىڭ باستاماسىمەن 2021 جىلدىڭ قىركۇيەگىنەن باستاپ ل.ن.گۋميلەۆ اتىنداعى ەۇۋ-دە ەتنوساياساتتانۋشى-ماگيسترلەردى دايىنداۋ بويىنشا ەكى جىلدىق ءبىلىم بەرۋ باعدارلاماسى جۇزەگە اسىرىلا باستادى, دەپ حابارلايدى Egemen.kz.
بۇل - ەتنوسارالىق قاتىناستار دامۋىنىڭ ساياسي شارتتىلىعىن زەرتتەيتىن كاسىبي مامانداردى دايارلاۋعا باعىتتالعان قازاقستان مەن ورتالىق ازياداعى العاشقى ءبىلىم بەرۋ باعدارلاماسى.
جاڭا باعدارلاما بويىنشا ءبىلىم العان ماماندار ەتنوسارالىق احۋالدى زەردەلەپ, مەملەكەتتىك ورگاندار مەن زەرتتەۋ ورتالىقتارىنا ساراپتاما دايىنداي الادى دەپ جوسپارلانۋدا.
باعدارلاما كاسىبي ستاندارتتارعا سايكەس ازىرلەنگەن. سونداي-اق, باعدارلاما وقىتۋدىڭ بەس نەگىزگى ناتيجەسىنە - ءبىلىم مەن ءتۇسىنۋ, ءبىلىمدى پراكتيكادا پايدالانۋ, تۇجىرىمداۋ, قارىم-قاتىناس پەن وقۋ سالاسىنداعى شەبەرلىككە نەگىزدەلگەن دۋبليندىك دەسكريپتورلاردى ەسكەرەدى.
بۇدان باسقا, باعدارلاما ەۋروپالىق بىلىكتىلىك جۇيەسىن (ەجك) ەسكەرەدى. ەجك - ۇلتتىق ءبىلىم بەرۋدىڭ بىلىكتىلىك جۇيەلەرىمەن سالىستىرمالى, بارلىق دەڭگەيدەگى ءبىلىم بەرۋ بىلىكتىلىگىنىڭ جالپىلانعان قۇرىلىمىن سيپاتتايتىن نەگىزدەمەلىك قۇرىلىمى بار جۇيە.
ايتا كەسەك, ورتالىق ازيادا العاشقى ەتنوساياساتتانۋشى-ماگيسترلەردى دايىنداۋ بويىنشا ءبىلىم بەرۋ باعدارلاماسىنىڭ تۇساۋكەسەرى قازاقستان حالقى اسسامبلەياسىنىڭ XXIX سەسسياسى قارساڭىندا 2021 جىلدىڭ 28 ساۋىرىندە ءوتتى.
قازىرگى ۋاقىتتا «ەتنوساياساتتانۋ» ءبىلىم بەرۋ باعدارلاماسى اياسىندا «قازىرگى الەمدەگى ەتنوساياسي ۇدەرىستەر», «قازاقتانۋ», «حالىقتانۋ», «قوعامعا قىزمەت ەتۋ» جانە باسقا دا يننوۆاتسيالىق پاندەر وقىتىلۋدا.