بيىل ەلىمىز ءۇشىن مەرەيلى مەرەكە: تاۋەلسىزدىكتىڭ 30 جىلدىعى. 1991 جىلى ەگەمەندىگىن جاريالاپ, شەكاراسىن شەگەندەگەن قازاقستاننىڭ بۇگىنگە دەيىنگى ءوسۋ جولىندا ءتۇرلى وقيعالار, باستامالار مەن ۇلكەن شەشىمدەر بولدى. جەكە مەملەكەت رەتىندە قايتا قالىپتاسۋدىڭ العاشقى كەزەڭى ەلىمىز ءۇشىن وڭايعا سوققان جوق. سوندىقتان ءتاۋ ەتەر تاۋەلسىزدىكتىڭ بەرگەنى مەن بەرەرىن باعامداپ, وتكەن وتىز جىلداعى جەتىستىكتەردى سارالاۋ – بۇگىنگى مەرەكەنىڭ نەگىزگى ماقساتى بولىپ وتىر. القيسسا.
ءوڭىر-وڭىردە ەل تاۋەلسىزدىگىنىڭ 30 جىلدىعىنا ارنالعان ءتۇرلى ءىس-شارا ۇيىمداستىرىلۋدا. وسى ورايدا ەلوردادا قازاقستان رەسپۋبليكاسى قارۋلى كۇشتەرى ۇلتتىق اسكەري-پاتريوتتىق ورتالىعى ورتالىق اسكەري وركەسترىنىڭ ءسوليسى, قازاقستاننىڭ ەڭبەك سىڭىرگەن قايراتكەرى, كاپيتان قايىرجان بەردىبايدىڭ «تاۋەلسىزدىك – تۇعىرىم» اتتى شىعارماشىلىق كونتسەرتى ءوتتى. قايىرىمدىلىق ماقساتىندا وتكەن كەشكە نۇر-سۇلتان قالاسىنىڭ «شاراپات» قارتتار ۇيىنەن كورەرمەندەر كەلىپ قاتىستى.
كەش اۆتورىنىڭ ايتۋىنشا, قايىرىمدىلىق كەشىن وتكىزۋ جوسپارى ءبىر كەزدەگى قارتتار ۇيىندەگى كونتسەرتتەن تۋىنداعان ەكەن.
«كونتسەرتتىڭ نەگىزگى ماقساتى – قارتتارىمىزدىڭ جۇرەگىنە جىلىلىق سىيلاپ, كوڭىلدەرىن كوتەرۋ. الداعى جىلى بالالار ءۇيىنىڭ بالالارىنا دا وسىنداي كەش وتكىزسەم دەيمىن. سول جەردەگى ونەرلى بالالاردى دا ساحناعا شىعارۋ ويدا بار. ودان بولەك مۇگەدەك جاندارعا دا قايىرىمدىلىق كەشىن وتكىزۋ جوسپاردا تۇر», دەيدى ءانشى.
ءاربىر تاريحي ءداۋىردىڭ وزىندىك مادەنيەتى بولاتىنى سەكىلدى ءار حالىقتىڭ وزىنە ءتان داستۇرلەرى بار. اتا داستۇردەن جالعاسقان ۇلتتىق اسپاپتىق مۋزىكا حالقىمىز ءۇشىن ەرەكشە ورىن الادى. شىعارماشىلىق كەشتى سۇيەمەلدەگەن ەركەعالي راحماديەۆ اتىنداعى مەملەكەتتىك اكادەميالىق فيلارمونياسىنىڭ قازاق وركەسترىنىڭ ونەرىن تاماشالاپ وتىرىپ, وسى ويعا تاعى دا بەكي تۇسەسىڭ. ايتا كەتەيىك, وركەستردىڭ باس ديريجەرى – قازاقستاننىڭ مادەنيەت قايراتكەرى نۇرلان بەكەنوۆ بولدى.
قايىرىمدىلىق كەشىندە اباي, ساكەن, ءىليا جاقانوۆ, رۋدولف فولۆا, الەكساندر زاتسەپيننىڭ – بارلىعى ون سەگىز ءان ورىندالدى. ايتا كەتەيىك, كونتسەرتتە قازاقستاننىڭ ەڭبەك سىڭىرگەن قايراتكەرلەرى سەكەن تۇرىسبەك, جەڭىس ىسقاقوۆا, رامازان ستامعازيەۆ پەن قازاقستان رەسپۋبليكاسى قارۋلى كۇشتەرىنىڭ ۇلتتىق اسكەري-پاتريوتتىق ورتالىعى ورتالىق ءانسامبلىنىڭ حورى ونەر كورسەتتى.
«كونتسەرتتى جۇبان مولداعاليەۆتىڭ رۋحتى وياتاتىن «مەن قازاقپىن» انىمەن باستاۋىمنىڭ ءوز سەبەبى بار. جۇبان مولداعاليەۆ – كولبينگە قارسى سويلەگەن قازاقتىڭ باتىر, ءبىرتۋار ازاماتى. بۇدان بولەك ورىندالعان بارلىق ءان قازاق قۇلاعىنا سىڭگەن, جۇرەگىنەن ورىن العان شىعارمالار. جالپى, الداعى ۇلىق مەرەكە – ەل تاۋەلسىزدىگىنىڭ 30 جىلدىعى قارساڭىندا قازاق ونەرىنىڭ ءىنجۋ-مارجان شىعارمالارىنا اينالعان اندەردى حالىققا ۇسىنىپ, رۋحىن وياتىپ, پاتريوتتىق سەزىم ۇيالاتاتىن كەش وتكىزە العانىما قۋانىشتىمىن. بۇل, ارينە, ەڭ الدىمەن ەل ەگەمەندىگىنىڭ ارقاسى», دەيدى ءانشى.
قايىرجان بەردىبايدىڭ رەپەرتۋارىندا ءىليا جاقانوۆ, سەكەن تۇرىسبەك, مۇقان تولەباەۆ, كەڭەس دۇيسەكەەۆ, يسرايل ساپارباي, مارات ءىلياسوۆ, قاپان مۋسين سىندى باسقا دا كومپوزيتورلاردىڭ اندەرى, سونداي-اق شەتەلدىك شىعارمالار دا بار. ول بۇعان دەيىن اباي اتىنداعى قازاق مەملەكەتتىك اكادەميالىق وپەرا جانە بالەت تەاترىندا ونەر كورسەتكەن. «قىز جىبەك» وپەراسىندا شەگەنىڭ رولىندە ويناعان, سونداي-اق «ريگولەتتو», «تراۆياتا», «ايدا» وپەرالارىندا شاعىن پارتيالاردى ورىنداعان. كەيىن اسكەري قىزمەتكە كەتكەن سوڭ رەپەرتۋارىندا كوبىنەسە پاتريوتتىق اندەر جينالعان.
«اسكەري وركەستردىڭ ءسوليستى بولعاندىقتان, ءتۇرلى جاعدايلاردا ءان شىرقاۋعا تۋرا كەلىپ جاتادى. ماسەلەن, الەم ەلدەرىنىڭ دەلەگاتسيالارى قازاقستانعا رەسمي ساپارمەن كەلگەندە مىندەتتى تۇردە سول ۇلتتىڭ اندەرى ورىندالادى. سوندىقتان مۇنداي جاعدايلارعا دا ءاردايىم دايىن جۇرەمىز», دەيدى ق.بەردىباي. سونداي-اق كەلەسى جىلى ءىليا جاقانوۆتىڭ, يسرايل ساپاربايدىڭ, سەكەن تۇرىسبەكتىڭ شىعارماشىلىق كەشىن جانە كەڭەس دۇيسەكەەۆتى ەسكە الۋ كەشىن جوسپارلاپ جۇرگەنىن ايتتى.